Oğuzda "Sağlam həyat tərzi və idman" layihəsinin açılışı olmuşdur

Avqustun 18-də Oğuzda Azərbaycan Respublikası Gənclər Təşkilatları Milli Şurası, Gənclər və İdman Nazirliyi, BMT-nin Uşaq Fondunun (YUNİSEF) təşkilatçılığı ilə "Sağlam həyat tərzi və idman" adlı "Həmyaşıddan-həmyaşıda" təhsil layihəsi çərçivəsində Gənclərin Yay Məktəbinin açılışı olmuşdur.

Gənclər Təşkilatları Milli Şurasının mətbuat xidmətindən bildirmişlər ki, açılış mərasimində gənclər və idman naziri Azad Rəhimov, Milli Məclisin deputatları Çingiz Əsədullayev, Rövşən Rzayev, Eyvaz Qurbanov, Rauf Əliyev, Sabir Hacıyev, Fuad Muradov, BMT-nin Uşaq Fondunun (YUNİSEF) ölkəmizdəki nümayəndəsi Mark Hervord iştirak etmişlər.

Gənclər Təşkilatları Milli Şurasının sədri, deputat Fuad Muradov ölkəmizdə gənclər siyasətinin dövlətin əsas prioritetlərindən biri olduğunu söyləmiş, Azərbaycanın bu sahədə beynəlxalq təşkilatların və inkişaf etmiş dövlətlərin təcrübəsinə yiyələnməkdə maraqlı olduğunu bildirmişdir. O demişdir ki, gənclərin sağlamlığı və idmanın təbliği istiqamətində görülən bütün işlər dövlətimizin başçısının gənclərin asudə vaxtının səmərəli təşkili ilə bağlı imzalandığı xüsusi proqramın tərkib hissəsidir.

Gənclər və idman naziri Azad Rəhimov çıxış edərək sağlam həyat tərzi və idman sahəsində aparılan işlərin nazirlik üçün çox vacib istiqamət olduğunu vurğulamış, Milli Şuranın təşkil etdiyi bütün tədbirlərin daim dəstəkləndiyini bildirmişdir.

Rayon icra hakimiyyətinin başçısı Aydın Əlihüseynov tədbirin Oğuzda keçirilməsinin böyük əhəmiyyət daşıdığını və inkişaf etmiş ölkələrdə gənclərin sağlam həyatının mühüm əhəmiyyətini vurğulamışdır.

YUNİSEF-in Azərbaycandakı nümayəndəsi Mark Hervord təmsil etdiyi təşkilatın bu cür tədbirlərin keçirilməsini hər zaman dəstəklədiyini, dünyanın hər bir ölkəsində gənclər arasında sağlam həyat tərzini təbliğ etdiyini diqqətə çatdırmışdır. O, Azərbaycan hökumətinin gənclər siyasətinə çox böyük önəm verməsini, gənclərlə bağlı imzalanmış Dövlət Proqramını yüksək qiymətləndirmişdir.

Avqustun 23-dək davam edəcək Yay Məktəbinin iştirakçıları "Sağlam həyat tərzi və idman" mövzusunda təlimlər təşkil edəcək, gənclər arasında sağlam həyat tərzinin aşılanmasının səmərəli üsullarına dair biliklərini artıracaq, əyləncə və idman tədbirləri vasitəsilə maarifləndirmə metodlarını həyata keçirəcəklər.

Yay Məktəbində Bakı şəhərinin Əzizbəyov rayonu, Masallı və Hacıqabuldan 16-24 yaş arasında 35 nəfər gənc iştirak edir.

Qeyd edək ki, Yay Məktəbinin davamı olaraq Gənclər Təşkilatlarının Milli Şurasının gənc təlimçiləri tərəfindən 2009-cu ilin sentyabr-dekabr aylarında Əzizbəyov rayonu, Gəncə, Quba, Lənkəran, Füzuli, Şirvan, Masallı və Hacıqabulda 2 min 700 gəncə "Sağlam həyat tərzi və idman" mövzusunda təlim sessiyaları təşkil ediləcəkdir.

AzərTAc

Azərbaycan.- 2009.- 19 avqust.- S. 3.