Azərbaycanın ərzaq təminatı ilə bağlı problemi yoxdur

"İqtisadiyyatı güclü olan dövlət hər şeyə qadirdir" - bu sözləri bir neçə il öncə ulu öndər Heydər Əliyev demişdir. Azərbaycanın müstəqilliyinin ilk illərində kəndlinin əli işdən soyumuşdu. Əyalətdəki insanlar şəhərə üz tutmuşdular. Cəmiyyətdə ələbaxımlılıq psixologiyası yaranmışdı. Respublikanın iqtisadiyyatı çökmüşdü.

Böyük dövlətçilik təcrübəsi olan siyasi xadim isə çox gözəl bilirdi ki, dünyanın hər yerində istənilən siyasi və diplomatik müzakirələrdə iqtisadi cəhətdən güclü olanın mövqeyi daha çox səs qazanır. Deməli, səsimizin eşidilməsi üçün ilk növbədə iqtisadiyyatımız dirçəlməli, onun sənayesi, aqrar sahəsi inkişaf etməli idi. Odur ki, ulu öndər bütün çıxışlarında bu fikri vurğulayır, insanları aqrar sahənin, kənd təsərrüfatının inkişafına istiqamətləndirirdi. Bunun üçün kəndlidə stimul yaratmaq lazım idi. Stimul isə əkib-becərdiyi torpağın sahibi olmaq, bir də texnikası, gübrəsi ilə becərdiyi məhsulu bazarda yaxşı qiymətə satmaqdır.

Ulu öndər Heydər Əliyev kəndlini torpağa qaytardı və ona torpaqdan şəxsi mülkiyyəti kimi istifadə etmək hüququ verdi. Bundan başqa torpağa can yandırması, keyfiyyətli məhsul yetişdirməsi üçün kəndli-fermerlərə dövlət dəstəyi də verildi.

Aparılan bu uğurlu iqtisadi siyasət indi bəhrəsini verməkdədir. Azərbaycanın kənd təsərrüfatı sürətlə inkişaf edir. Dünyanın inkişaf etmiş dövlətləri Azərbaycanla aqrar sahədə əməkdaşlığı artırmaq istəyir. Beynəlxalq mütəxəssislər etiraf edirlər ki, qlobal iqtisadi böhranın davam etdiyi bu dövrdə Azərbaycan o dövlətlərdəndir ki, hələ ərzaq təminatı ilə bağlı problemlə üzləşməyib. Əlbəttə, bu uğurların əsasında kənd təsərrüfatının inkişafı və bu sahəyə ayrılan diqqət dayanır. Üç il ərzində iqtisadi artımın sürətinə görə dünyada birinciliyi əldən verməyən Azərbaycanın əldə etdiyi uğurlarda əsasən neft-qaz hasilatı önə çəkilirdisə, son bir-iki ildə aqrar sahənin inkişafından da söhbət gedir. Çünki Azərbaycanın kənd təsərrüfatı doğrudan da son illər sürətlə inkişaf edir. Bu barədə ölkə Prezidenti İlham Əliyev də birmənalı demişdir: "Neft məqsəd yox, vasitə olmalıdır. İqtisadiyyatımızın inkişafını yalnız neft amili ilə bağlamaq düzgün deyil..."

Kənd təsərrüfatının aparıcı sahələrindən biri də heyvandarlıqdır. Kəndli bilir ki, yaxşı yaşayışın və dolanışığın yolu torpaqla ünsiyyət yaratmaq və mal-qaranın sayını artırmaqdır. Maldarlığın gəlirli sahə olduğunu söyləməyə ehtiyac yoxdur. İndi hansı kəndlinin qapısını açsan, həyətində onlarla iri və xırda buynuzlu mal-qara görərsən. Son zamanlar bu sahənin inkişafı da dövlətin diqqətindədir. Belə ki, xaricdən bol südlü iribuynuzlu cins heyvanlar gətirilir, Azərbaycanın iqliminə uyğunlaşması üçün zəruri zootexniki tədbirlər görülür. Bu tədbirlər heyvandarlıq məhsullarının artmasına güclü təsir edir. Aqrar sahənin inkişafında fəaliyyətini genişləndirən "Aqrolizinq" ASC də kənd təsərrüfatının səmərəli inkişafında fermerlərə dəstək olur. Son illər Dövlət Taxıl Fondunun yaradılması ölkəmizin ərzaq təhlükəsizliyi sahəsində atılmış ən uğurlu addımlardan biridir. Çünki ərzaq məhsulları deyəndə ilk növbədə taxıl və taxıl məhsulları nəzərdə tutulur. Taxıl məhsullarının ildən-ilə sürətlə artması ölkə əhalisinin ərzaqla təminatının yaxşılaşmasından xəbər verir. Tarixdə ilk dəfə bu il Azərbaycanda taxıl istehsalının 3 milyon ton, o cümlədən buğda istehsalının 2,2 milyon ton olacağı bildirilir. Bu da o deməkdir ki, ölkəmiz özünün taxıla olan ehtiyacını tamamilə ödəyəcək.

2009-2013-cü illəri əhatə edən regionların sosial-iqtisadi inkişafına dair Dövlət Proqramı, həmçinin ölkə Prezidentinin sərəncamı ilə təsdiq edilmiş 2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramının uğurlu icrası nəticəsində ölkəmizin ərzaq təminatı məsələsi tam həllini tapmış olacaq. Bütün yerli və xarici mütəxəssislərin Azərbaycan haqqında qənaətləri belədir.

R.RZALI

Azərbaycan.- 2009.- 20 avqust.- S. 2.