Gənc əsgərlər Vətənə sədaqət andı içdilər

Bu gün Azərbaycanda sərhəd mühafizəsi bir çox ölkələrə nümunə olacaq səviyyədədir. Sərhəd Qoşunları qısa zamanda çevik, dövlət sərhədlərinin etibarlı mühafizəsi üzrə qarşıya qoyulan tapşırıqları yerinə yetirməyə qadir olan bir qurumdur. Sərhəd Qoşunları ölkənin və vətəndaşlarımızın təhlükəsizliyinin təmin olunması üçün qaçaqmalçılığa, narkotik maddələrin qanunsuz dövriyyəsinə, qeyri-leqal miqrasiyaya, silah-sursat qaçaqmalçılığına və terrorizmə qarşı mübarizə aparır.

Azərbaycan Sərhəd Qoşunları 2002-ci ilin iyul ayının 31-də ulu öndər Heydər Əliyevin fərmanı ilə Dövlət Sərhəd Xidməti kimi fəaliyyətini davam etdirməyə başlamışdır. Bununla da dövlət sərhədlərinin etibarlı mühafizəsinin önəmliliyi daha da artmışdır.

Azərbaycan sərhəd mühafizəsi yaradılmasının 90 illiyinin qeyd olunduğu gündə Zaqatala Sərhəd Dəstəsinin gənc əsgərləri Vətənə sədaqət andı içdilər. Təntənəli mərasimdə Zaqatala, Balakən və Qax rayonları icra hakimiyyətlərinin, hüquq-mühafizə orqanlarının nümayəndələri, valideynlər, müharibə veteranları və digər qonaqlar iştirak edirdilər. Hərbi hissənin komandiri, polkovnik Elşən Verdiyev tədbir iştirakçılarını salamladıqdan sonra Sərhəd Dəstəsinin döyüş bayrağı meydana gətirildi və gənc əsgərlər təntənəli şəkildə hərbi and içdilər. Azərbaycanın Dövlət himni oxundu. Dövlət Sərhəd Xidmətinin rəisi, general-leytenant Elçin Quliyevin təbrik telefonoqramı səsləndirildi.

Zaqatala Sərhəd Dəstəsinin komandiri, polkovnik Elşən Verdiyev ölkəmizdə sərhəd mühafizəsinin yaranma tarixi ilə bağlı çıxış etdi. Bildirdi ki, 1919-cu il avqustun 18-də Azərbaycan Parlamenti "Azərbaycan Respublikasının gömrük baxımından sərhəd mühafizəsinin təsis edilməsi haqqında" qanun qəbul etmişdir. Bununla da Azərbaycan tarixində ilk dəfə sərhəd qoşunlarının müstəqil dövlət strukturu kimi yaradılmasına başlanılmışdır.

Bu tarixin yaşadılması isə ümummilli lider Heydər Əliyevin adı ilə bağlıdır. Ulu öndərin 16 avqust 2000-ci il tarixli sərəncamı ilə 18 avqust Sərhəd Qoşunlarının peşə bayramı günü kimi təsis edilmişdir.

Ölkəmizin şimal-qərb sərhədlərinin mühafizəsini həyata keçirən Zaqatala Sərhəd Dəstəsinin fəaliyyətindən söz açan polkovnik E.Verdiyev vurğuladı ki, sərhəd dəstəsinin hərbi qulluqçuları qətiyyətlilik və şücaət göstərərək öz vəzifələrinin öhdəsindən layiqincə gəlmək üçün səy və bacarıqlarını əsirgəməmiş, yüksək nəticələr göstərmişlər. Polkovnik demişdir: - Bir neçə gün öncə Azərbaycan Respublikasının Prezidenti İlham Əliyev Sərhəd Qoşunlarının yaranmasının 90-cı ildönümü münasibəti ilə Dövlət Sərhəd Xidmətinin 3 hərbi qulluqçusunun ali zabit rütbəsi ilə və 55 hərbi qulluqçusundan orden və medallarla təltif olunması barədə sərəncam imzalamışdır. Təltif olunanların sırasında bizim sərhəd dəstəsinin 15 hərbi qulluqçusundan birinin "Azərbaycan Bayrağı" ordeni ilə, üçünün "Vətən uğrunda", ikisinin "İgidliyə görə" və doqquzunun "Hərbi xidmətlərə görə" medalları ilə təltif edilməsi Ali Baş Komandanın qayğısının təzahürü və kollektivimiz üçün böyük fərəhdir. Bu bizi xidmətdə daha da yüksək nailiyyətlər əldə etməyə ruhlandırır.

Hərbi hissə komandirinin çıxışından sonra Zaqatala Rayon İcra Hakimiyyəti başçısının müavini Ramazan Məmmədov mərasim iştirakçılarını təbrik edərək sərhədçilərə uğurlar arzuladı. Əsgər V.Süleymanov isə sərhədçi adını şərəflə qoruyacaqlarından söz açdı.

Təltiflər və hədiyyələr təqdim edildikdən sonra çıxışlar oldu.

Şəxsi heyət nizamlı addımlarla tribuna önündən keçdi.

Telman NƏZƏRLİ

Azərbaycan.- 2009.- 20 avqust.- S. 3.