Müəllim əməyinin nəticəsi imtahanda üzə çıxır

Məlum olduğu kimi, XXI əsr "Təhsil əsri" elan edilmişdir. Ölkədə təhsil sisteminə dövlət qayğısı isə ildən-ilə artırılır. Prezident İlham Əliyevin, Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın bu sahənin inkişafına göstərdikləri müntəzəm diqqət sayəsində yeni məktəb binaları inşa edilir, təhsil müəssisələrinin maddi-texniki bazaları möhkəmləndirilir, informasiya və kommunikasiya texnologiyaları ilə təmin olunur, müxtəlif istiqamətlər üzrə ciddi islahatlar aparılır.

Qəbələ rayonunda da ötən tədris ili müvəffəqiyyətlə başa çatmışdır. Bəlli həqiqətdir ki, müasir təhsil mühitinin formalaşdırılması üçün məktəblərin zəruri ləvazimat və avadanlıqlarla təchiz olunması vacib amillərdəndir. Rayon təhsil şöbəsinin müdiri Oqtay Hacıyev bu yöndə müəyyən işlərin görüldüyünü bildirərək dedi ki, Qəbələnin 50 məktəbində 412 ədəd kompüterdən istifadə olunur. Ötən müddət ərzində rayonun 47 məktəbi həftədə 5 günlük iş rejiminə keçmişdir. Həmçinin ötən dərs ilində rayon məktəblərinin fənn kabinetlərində və laboratoriyalarında 140 adda 21120 ədəd əyani vəsaitdən istifadə edilmiş, uşaq bağçalarına 17 min nüsxə əyani vəsait verilmişdir.

Rayon təhsil şöbəsində internetə çıxışı olan informasiya mərkəzi yaradılmışdır. Məktəblərin də bu mərkəzə qoşulması üçün hazırlıq işləri görülür. Artıq 43 təhsil ocağı rayon təhsil şöbəsindəki informasiya mərkəzinə qoşulmaq üçün tam hazırdır.

Söhbət əsnasında Oqtay Hacıyev pedaqoji işçilərin ixtisas və peşə hazırlığının təkmilləşdirilməsi məsələsinə də toxundu: - Bu istiqamətdə ardıcıl iş aparılmış və yeni təlim metodlarını öyrənmək üçün 320 müəllim həftəlik İKT kurslarına cəlb olunmuşdur. 100-dən çox müəllim müxtəlif ixtisaslar üzrə Bakı şəhərində ixtisasartırma kurslarında olmuşdur.

Məlumdur ki, istedadlı şagirdlərin üzə çıxması və onların gələcək fəaliyyətinin düzgün istiqamətləndirilməsində fənn olimpiadalarının böyük əhəmiyyəti vardır.

Ötən müddət ərzində olimpiadanın rayon turunun son mərhələsində 9 şagirdimiz respublika turuna vəsiqə qazanmış, Qəbələ şəhər 1 nömrəli məktəbin, onlardan Zarağan və Əmirvan kənd məktəblərinin şagirdləri respublika üzrə bilik yarışmasında mükafata layiq yer tutmuşlar.

Ölkə Prezidentinin 17 aprel 2006-cı il tarixli sərəncamı ilə təsdiq edilmiş "Xüsusi istedada malik uşaqların (gənclərin) yaradıcılıq potensialının inkişafı Dövlət Proqramı"nın yerinə yetirilməsi ilə bağlı işlər davam etdirilir. Ümummilli lider Heydər Əliyevin anadan olmasının 86-cı ildönümünə həsr olunmuş respublika inşa müsabiqəsində Qəbələ şəhər 3 saylı məktəbin IX sinif şagirdi Aygül Şəfizadə yüksək nəticə əldə edərək Təhsil Nazirliyinin fəxri fərmanı ilə təltif edilmişdir. Fizika və biologiya fənləri üzrə Vəndam 1 saylı və Aydınqışlaq məktəbinin şagirdləri fərqlənmişlər.

Şagirdlərin hərbi vətənpərvərlik ruhunda tərbiyəsində kütləvi idman yarışlarının və hərbi idman oyunlarının rolu danılmazdır. Belə yarışlarda Qəbələ məktəbliləri xüsusi fəallıq göstərmiş və Vəndam qəsəbə 2 saylı orta məktəbin "Sərhəd" hərbi-idman komandası Astara şəhərində keçirilmiş respublika turunda ikinci yeri tutmuşdur. Məktəblilərimizin fəal iştirak etdiyi "Biz sülh istəyirik", "Vətən sərhədi toxunulmazdır" mövzularında rəsm-sərgi müsabiqələrinin rayon və zona birincilikləri başa çatmış və qaliblər Şəki sərhəd dəstəsinin komandanlığı tərəfindən mükafatlandırılmışdır.

Ümumilikdə, ötən tədris ilini qənaətbəxş hesab edən O.Hacıyev bildirdi ki, test üsulu ilə mərkəzləşdirilmiş qaydada keçirilmiş buraxılış imtahanlarından sonra rayonda orta təhsil kursunu 1118 şagird bitirmişdir. Aydınqışlaq, Mamaylı, Zarağan 2 saylı, Qəbələ 4 saylı və Vəndam qəsəbə 2 saylı orta məktəblərin göstəriciləri daha yaxşı olmuşdur.

Məktəblərin tədris və maddi-texniki bazasını genişləndirmək məqsədilə Dızaxlı kəndində yeni əsas məktəbin açılması təsdiq olunmuşdur. Məktəb yeni dərs ilində fəaliyyətə başlayacaqdır. Bundan əlavə, Heydər Əliyev Fondu tərəfindən inşa edilmiş Kürd, Abrıx orta və Kiçik Əmili əsas məktəblərində, "Regionların sosial-iqtisadi inkişafına dair Dövlət Proqramı" xətti ilə inşa edilmiş 480 yerlik Yenikənd orta və 360 yerlik Yemişənli kənd orta məktəblərində son tamamlama işləri başa çatmışdır və məktəblər növbəti dərs ilinə hazırdır.

Telman NƏZƏRLİ

Azərbaycan.- 2009.- 20 avqust.- S. 4.