Beynəlxalq təşkilatların
Azərbaycanın ərazi bütövlüyünü dəstəkləməsi,
eləcə də Dağlıq Qarabağ münaqişəsinin
yalnız Azərbaycanın ərazi bütövlüyü
çərçivəsində həllinə dair bəyanatları
Ermənistan ictimaiyyətində ciddi narahatlıq yaratmaqda
davam edir. Əsl həqiqəti etiraf edə bilməyən ermənilər
bu dəfə də Beynəlxalq Avropa Hərəkatını
ittiham və tənqid edirlər.
Buna səbəb avqustun
12-dən 14-dək Azərbaycanda səfərdə olan Beynəlxalq
Avropa Hərəkatının baş katibi Dioqo Pintonun verdiyi
açıqlama olmuşdur. D.Pinto yerli kütləvi informasiya
vasitələrinə (KİV) verdiyi müsahibələrində
Avropa Hərəkatının Azərbaycanın ərazi
bütövlüyünü dəstəklədiyini, Ermənistan-Azərbaycan,
Dağlıq Qarabağ münaqişəsinin yalnız Azərbaycanın
ərazi bütövlüyü çərçivəsində
həll edilməsinin vacibliyini bildirmişdir.
Onun bu bəyanatı Ermənistan
ictimaiyyətini ciddi narahat etmişdir. Ermənistan Avropa Hərəkatının
prezidenti Viktor Yengibaryan bu məsələ ilə bağlı
Beynəlxalq Avropa Hərəkatının idarə heyətinə
şikayət etmişdir.
Ermənistan mətbuatı
da ənənəsinə sadiq qalaraq yenə də
yanlış məlumat yayaraq, D.Pintonun guya Dağlıq
Qarabağ münaqişəsinin həllində Qarabağ ermənilərinin
özünün müqəddəratını təyinetmə
prinsipini önə çəkdiyini bildirmiş, Azərbaycan
mediasını yalan məlumat yaymaqda
günahlandırmışdır.
Erməni mətbuatının
bu çıxışları yalandır və bizdə bunu
sübut etməyə kifayət qədər faktlar vardır.
D.Pintonun Bakıya səfərinin
nəticələri ilə bağlı avqustun 14-də
keçirdiyi mətbuat konfransının, eləcə də
Azərbaycan KİV-lərinə verdiyi müsahibələrin
videolentləri, səs yazıları vardır. İkincisi də
baş katib D.Pinto V.Yengibaryana yazdığı cavab məktubunda
da bir daha Azərbaycanın ərazi bütövlüyünə
hörmət edilməli olduğunun vacibliyini
vurğulamışdır.
V.Yengibaryanın
şikayət məktubunda deyilir ki, D.Pintonun bu bəyanatı
Ermənistanın ictimaiyyətində ciddi narahatlıq doğurmuş,
hətta Ermənistan Avropa Hərəkatının bəzi
üzvləri qurumu tərk etmək niyyətindədir.
Biz başa düşə
bilmirik Ermənistana səfər edən Beynəlxalq Avropa Hərəkatının
nümayəndələrini tarixdə baş verməmiş
qondarma "erməni soyqırımı" abidəsinin
qarşısına dəvət etmək, heç bir beynəlxalq
qurum tərəfindən tanınmayan qondarma "Dağlıq
Qarabağ Respublikası"nın xəritəsini bu günədək
öz rəsmi saytlarında saxlayan V.Yengibaryan indi nədən
belə narahatdır?! Görünür, narahatlığa
artıq əsas var və bu əsas da beynəlxalq qurumların
verdikləri obyektiv bəyanatlardır.
Azərbaycan Avropa Hərəkatının
baş katibi Rəşad Xasayoğlu bildirmişdir ki, avqustun
18-də Gürcüstan Avropa Hərəkatı bu məsələyə
öz münasibətini bildirərək, D.Pintonun Bakıda səsləndirdiyi
Azərbaycanın ərazi bütövlüyü ilə
bağlı bəyanatı və baş katibin haqlı
mövqeyini dəstəklədiyini vurğulamışdır.
Bu günlərdə isə Türkiyə Avropa Hərəkatının
da bu məsələyə münasibətinin
açıqlanacağı gözlənilir.
AzərTAc
Azərbaycan.- 2009.- 21
avqust.- S. 2.