Səbail rayonunda gənclərin
hərbi vətənpərvərlik tərbiyəsinin möhkəmləndirilməsi,
onların Vətənin layiqli keşikçisi kimi tərbiyə
olunması işləri hər zaman diqqət mərkəzində
olmuşdur. Bu istiqamətdə görülən işlərin
daha səmərəli və yaddaqalan olması məqsədi
ilə təşkil edilən tədbirlər rayon ərazisindəki
hərbi hissələrin şəxsi heyətinin, rayon veteran və
gənclər təşkilatlarının, ictimaiyyət
nümayəndələrinin iştirakı ilə
keçirilir.
Belə tədbirlərdən
biri rayonun Badamdar qəsəbəsindəki N saylı hərbi
hissədə keçirilən "And yerimiz Vətəndir!"
mövzusunda toplantı olmuşdur.
Hərbi hissənin
şəxsi heyətinin, rayon Veteran Təşkilatları və
Ağsaqqallar Şurasının, Azərbaycan Vətən
Müharibəsi Veteranları Birliyi Səbail rayon şöbəsinin,
rayon gənclərinin nümayəndələrinin
iştirakı ilə keçirilən tədbirdə Səbail
Rayon Gənclər və İdman İdarəsinin rəisi
Vüqar Mürsəlov qeyd etmişdir ki, dövlət gənclər
siyasətinin əsas istiqamətlərindən biri gənclərin
mənəvi-əxlaqi və vətənpərvərlik tərbiyəsi
ilə bağlı aparılan işlərdir. Gənclərin
milli-mənəvi dəyərlərimizə hörmət,
dövlətçiliyimizə sədaqət, Vətənə
məhəbbət ruhunda tərbiyə edilməsi, müstəqil
dövlətimizin gələcək təminatçıları
kimi mənəvi və fiziki cəhətdən sağlam
inkişaf etdirilməsi ümummilli konsepsiya əsasında həyata
keçirilir. V.Mürsəlov Səbail rayonunda gənclərlə
bağlı görülən işlər barədə məlumat
vermiş və nəzərdə tutulan işlərdən
danışmışdır.
Tədbirdə
çıxış edənlər İkinci Dünya
müharibəsi illərində və Qarabağ savaşı
zamanı azərbaycanlı gənclərin döyüşlərdə
göstərdiyi qəhrəmanlıqlardan, ümummilli lider
Heydər Əliyevin gərgin əməyi və səyləri
nəticəsində yaradılmış Azərbaycan Ordusunun
keçdiyi döyüş yolundan danışmış,
ölkəmizin ərazi bütövlüyünün bərpa
olunmasında gənc əsgərlərimizə uğurlar
arzulamışlar.
Çıxış edənlər bildirmişlər ki, Azərbaycan
Respublikasının Prezidenti, Silahlı Qüvvələrin
Ali Baş Komandanı İlham Əliyevin səyləri nəticəsində
ordumuza diqqət və qayğı gündən-günə
artmaqdadır, milli ordunun silah, texniki və digər təminatı
ən yüksək səviyyədədir.
Tədbirdə
rayondakı hərbi hissələrin şəxsi heyəti
arasında keçirilmiş şahmat üzrə yarış
barədə də məlumat verilmiş və turnirdə
müvafiq olaraq birinci üç yeri tutmuş Əfşar
Mehdiyev, Elbrus Kəlbiyev, Rüstəm Çələbiyev
qiymətli hədiyyə və diplomlarla
mükafatlandırılmışlar.
AzərTAc
Azərbaycan.- 2009.-
21avqust.- S. 3.