Güclü infrastruktur inkişafın mühüm şərtlərindən biridir

Azərbaycanda həyata keçirilən inkişaf strategiyasının əsas qayəsi ölkənin kompleks inkişafının təmin olunmasıdır. Ulu öndər Heydər Əliyevin əsasını qoyduğu bu kurs Prezident İlham Əliyev tərəfindən layiqincə davam etdirilir. Azərbaycanın inkişafının real mənzərəsi göstərir ki, qarşıya qoyulan məqsədlər gerçəkləşmişdir.

Hazırkı dinamik inkişaf mərhələsində vacib məsələlərdən biri ölkənin hər yerində infrastuktur sahələrinin modernləşməsidir. Çünki davamlı və tarazlı sosial-iqtisadi inkişaf ilk növbədə infrastrukturun yeniləşməsindən, bu sahədə beynəlxalq və müasir standartların tətbiqindən, qabaqcıl biliklərin, texnologiyaların mənimsənilməsindən keçir. Hələ 2004-cü ildə Azərbaycan Respublikası regionlarının sosial-iqtisadi inkişafına dair birinci dövlət proqramı təsdiq olunanda qarşıya qoyulan prioritet vəzifələrdən biri keçmişdən qalan infrastrukturun bərpası və yeniləşdirilməsi, müasir standartlara cavab verən yeni layihələrin həyata keçirilməsi idi. Artıq birinci dövlət proqramının icrası başa çatıb və ümumi nəticələr nəzərdə tutulan bütün vəzifələrin yerinə yetirildiyini təsdiq edir.

2004-cü ildən bu yana Astara, Şəki, Xaçmaz və Naxçıvanda modul tipli elektrik stansiyalarının, Xınalıq, Masallı-Yardımlı, Gəncə-Daşkəsən-Xoşbulaq avtomobil yollarının, Bakı-Qazax magistralının Hacıqabul-Kürdəmir və Şəmkir-Qazax hissələrinin, Gəncədə Beynəlxalq hava limanının, Lənkəran, Naxçıvan, Şirvan və digər şəhərlərdə müalicə-diaqnostika mərkəzlərinin istifadəyə verilməsi, Azərbaycanla İran arasında Şahtaxtı-Poldəşt sərhəd-keçid məntəqəsinin yenidən qurulması, ucqar dağ rayonları olan Lerik və Yardımlıya təbii qazın verilməsi, rayonlarda yeni avtovağzalların, xəstəxanaların tikilməsi və ya əvvəlkilərin müasir səviyyədə yenidən qurulması, bankların filiallarının yaradılması, olimpiya komplekslərinin, turizmin inkişafının əyani təcəssümü olan otellərin, istirahət mərkəzlərinin inşası infrasrukturun yeniləşməsinə mühüm töhfələr verməklə yanaşı, ölkənin sosial-iqtisadi həyatında böyük hadisəyə çevrilmişdir.

Ölkə rəhbərliyi sosial, nəqliyyat, kommunal və xidmət infrastrukturlarının müasir standartlar səviyyəsinə çatdırılmasına xüsusi diqqət göstərir, bu sahələrə əsaslı vəsait qoyuluşunu ilbəil artırır. Ölkənin dörd bir yanında yollar çəkilir, vətəndaşların sosial rahatlığına xidmət edən müxtəlif təyinatlı obyektlər istifadəyə verilir, əvvəllər təbii qaz olmayan rayonlar qazlaşdırılır, hər yerdə su və kanalizasiya xətləri, kənd təsərrüfatında suvarma sistemləri yenidən qurulur, subartezian quyuları qazılır.

2008 və 2009-cu illərin statistikası da ölkəmizdə infrastruktur sahələrinin daha dinamik inkişafından xəbər verir. Bu müddətdə icrası başa çatan layihələrin sayı həm də ölkənin inkişafının real mənzərəsini ortaya qoyur.

Məlumdur ki, hər bir cəmiyyətin həyatında idmanın çox böyük rolu var. İdman həm ölkənin şöhrətini ucaldan, həm də insanları fiziki cəhətdən sağlam edən, eyni zamanda sosial sahədir. Bu amillər idmanı hər bir ölkədə cəlbedici və mühüm sahəyə çevirir. Azərbaycan da istisna deyil.

Hazırda ölkəmiz idman infrastrukturuna görə dünyanın lider dövlətlərindən biridir. Təkcə 2008-ci ilin əvvəlindən Ağdam rayonunun Quzanlı qəsəbəsində, Qusar, Kürdəmir, Sabirabad, Oğuz, Salyan, Biləsuvar, Şəmkir və Şərurda olimpiya idman kompleksləri, Naxçıvan şəhərində əyləncə-idman mərkəzi, Sumqayıtda Paralimpiya İdman Kompleksi, Zaqatalada şəhər stadionu, Lənkəranda Uşaq Sağlamlıq Mərkəzi istifadəyə verilmişdir. Bunlar göstərir ki, ölkəmizdə idmana münasibət ən yüksək səviyyədədir və bu sahənin maddi-texniki bazasının möhkəmlənməsi üçün çox böyük işlər görülür. Bu gün Azərbaycanda idmanla məşğul olmaq üçün çox yaxşı şərait var. Gələcək illərdə dövlətimizin ardıcıl, məqsədyönlü siyasəti nəticəsində Azərbaycanın hər yerində müxtəlif təyinatlı müasir idman qurğuları tikiləcək.

Respublikanın bölgələrində müasir standartlara cavab verən xəstəxanaların, poliklinikaların tikilməsi, köhnə, yararsız vəziyyətdə olanların təmir olunması məqsədilə dövlət büdcəsindən böyük həcmdə vəsaitlərin ayrılması ölkəmizin məqsədyönlü sosial siyasətindən xəbər verir. 2008-2009-cu illərdə Naxçıvanda tibb məktəbi, Doğum Mərkəzi, Gəncə, Qazax, Qəbələ, Zaqatala və Bərdədə müalicə-diaqnostika mərkəzləri, Masallıda akademik Zərifə Əliyeva adına Elmi-Tədqiqat Göz Xəstəlikləri İnstitutunun filialı açılmış, Yevlax şəhərində uşaq xəstəxanası, Göygöldə mərkəzi rayon xəstəxanası, Şahbuzda rayon mərkəzi xəstəxanasının yeni binası inşa olunmuşdur.

Xatırladaq ki, hazırda səhiyyə xərcləri bir neçə il əvvəllə müqayisədə təxminən 10 dəfədən çox artmışdır. Bu, ölkəmizdə həyata keçirilən sosial siyasətin mühüm əlamətlərindən biridir. Bütün bunlar bir daha təsdiq edir ki, tibb sahəsinin inkişafı, güclü səhiyyə infrastrukturunun yaradılması Prezident İlham Əliyevin sosial siyasətinin əsas istiqamətlərindən biridir.

Nəqliyyat infrastrukturunun inkişafı günümüzün reallığıdır. Nəzərə alsaq ki, Azərbaycanda nəqliyyat vasitələrinin sayı sürətlə artır və ölkəmiz bir sıra iri beynəlxalq nəqliyyat dəhlizlərinin qovşağında yerləşir, onda bu infrastrukturun inkişaf etdirilməsinin zəruriliyi məlum olar. Artıq bir neçə ildir ki, ölkəmizin nəqliyyat sferasında mühüm layihələrin həyata keçirilməsinə başlanılıb. Bu layihələrin bəzilərinin icrası başa çatıb, bəziləri isə davam edir. 2008-2009-cu illər ərzində Füzulidə Zobucuq adlanan ərazidə - Quruçayın üzərində, yeni çəkilmiş 15 kilometrlik yolda salınmış körpü, Kürdəmir dairəvi avtomobil yolu, Naxçıvan-Sədərək avtomobil yolu, Balakəndə yeni avtovağzal binası, Zaqatalada hava limanının, Lənkəranda beynəlxalq hava limanı və digər çoxsaylı belə obyektlər istifadəyə verilmişdir.

Respublikamızın sosial-iqtisadi həyatında son illər müşahidə olunan dinamik inkişaf kommunal sektorda, o cümlədən su təchizatı sistemində də öz əksini tapmışdır. Azərbaycan Prezidenti İlham Əliyevin diqqət və qayğısı nəticəsində infrastrukturun vacib sahələrindən olan su təchizatı, irriqasiya və kanalizasiya sistemlərinin yaxşılaşdırılmasına dövlət qayğısı artırılmış, bu sahədə geniş islahatların və proqramların həyata keçirilməsinə başlanmışdır. Xatırladaq ki, 2002-ci ilin dekabr ayında ulu öndər Heydər Əliyev tərəfindən Oğuz və Qəbələ rayonları ərazisindən Bakı şəhərinə su kəmərinin çəkilişi ilə bağlı hazırlıq işlərinin görülməsi üçün müvafiq tapşırıq verilmiş, 2005-ci ildə Prezident İlham Əliyev bu kəmərin maliyyələşdirilməsi barədə sərəncam imzalamışdır. 2007-ci il martın 1-də Prezident İlham Əliyevin iştirakı ilə Oğuz-Qəbələ-Bakı su kəmərinin təməli qoyulmuşdu. Bu kəmərin istifadəyə verilməsi paytaxt Bakının içməli su ilə təminatına əhəmiyyətli dərəcədə təsir edəcək.

Ötən müddətdə Balakəndə içməli su xəttinin açılışı olmuş, Şəmkir çayı üzərində dəryaçanın təməli qoyulmuşdur. Bu dəryaça əkin sahələrinin su ilə təminatında müstəsna əhəmiyyət kəsb edəcək.

Ölkədə mavi qaz və elektrik enerjisinə olan ehtiyaclar da ödənməkdədir. Ötən ildən başlayaraq Ağcabədiyə, Beyləqana, Horadiz şəhərinə, Ağdamın Quzanlı qəsəbəsinə təbii qazın verilməsinə başlanılmışdır. Yeni elektrik stansiyalarının istismara verilməsinin və mövcud su və istilik elektrik stansiyalarının yenidən qurulmasının əhəmiyyətini isə vurğulamağa o qədər də ehtiyac yoxdur. Çünki elektrik enerjisi normal inkişafın lokomotividir. Son illərdə ölkədə bir neçə modul tipli elektrik stansiyası istifadəyə verilmiş, su və istilik elektrik stansiyaları əsaslı şəkildə rekonstruksiya olunmuşdur. Bu yaxınlarda isə Füzuli rayonunda su elektrik stansiyasının təməli qoyulmuşdur.

Məlumdur ki, turizm dünyada ən gəlirli sahələrdən biridir. Azərbaycanda isə bir tərəfdən əsrarəngiz təbiət, digər tərəfdən zəngin tarixi və mədəni irs turizmin inkişafı üçün münbit zəmin yaradır. Son illərdə ölkəmizdə turizmin inkişafı üçün görülən işlərin bəhrəsi göz önündədir. Bu gün turizm baxımından əhəmiyyət kəsb edən elə bir yer yoxdur ki, orada modern turizm infrastrukturu formalaşmasın. Ölkənin bölgələrində müasir standartlarla ayaqlaşan hotellər, istirahət mərkəzləri tikilib turistlərin və istirahət etmək istəyənlərin ixtiyarına verilmişdir. Yeni istifadəyə verilən Oğuz rayonundakı "Afra-otel" kurort və biznes mərkəzi, Lənkərandakı "Qafqaz Sahil", Mingəçevirdəki "River side", Zaqataladakı "Qafqaz" hotelləri də bu qəbildəndir.

Azərbaycan Prezidenti İlham Əliyev Nazirlər Kabinetinin 2009-cu ilin birinci rübünün sosial-iqtisadi yekunlarına həsr olunmuş iclasında demişdir: "Bütün infrastruktur layihələri icra olunur. Dövlət investisiya proqramı xətti ilə aparılan işlər bu il və növbəti illərdə Azərbaycanda infrastruktur layihələrinin yaranmasına xidmət göstərəcəkdir. Artıq Azərbaycan cəmiyyəti də açıq-aydın görür ki, bunun nə dərəcədə böyük əhəmiyyəti var. İnfrastruktur layihələri biznes imkanlarını genişləndirir, insanların normal yaşamasına, Azərbaycanın hərtərəfli inkişafına xidmət göstərir və ölkəmizdə aparılan iqtisadiyyatın şaxələndirilməsi siyasətinə də böyük dəstəkdir".

Dövlətimizin başçısı rayonlara səfərləri çərçivəsində Füzuli rayonunda tibb mərkəzinin, Qusarda mərkəzi rayon xəstəxanasının, Tovuz şəhərində Müalicə-Diaqnostika Mərkəzinin, Qax şəhərində idman kompleksinin, Şəki rayon mərkəzi xəstəxanasının yeni korpusunun təməlqoyma mərasimlərində iştirak etmişdir.

Hazırda Tovuz, Balakən və Qəbələdə olimpiya-idman komplekslərinin, Mingəçevirdə "Kür" olimpiya tədris-idman mərkəzinin, Gəncədə "Ramada Plaza" mehmanxanasının, Ucar-Yevlax avtomobil yolunun tikintisi davam edir və yaxın vaxtlarda istifadəyə veriləcəkdir.

Rəşad CƏFƏRLİ

Azərbaycan.- 2009.- 22 avqust.- S. 1, 3.