Heydər Əliyev Fondu ölkəmizin tərəqqisinə misilsiz töhfələr verir

YUNESKO ilə əməkdaşlıq bəşəri dəyərlərə istinad edir

Ölkəmizin gələcək sosial-iqtisadi tərəqqisində mühüm rol oynayan təhsil sisteminin inkişafı, yüksək intellektə malik gənc kadrların yetişdirilməsi Heydər Əliyev Fondunun prezidenti Mehriban xanım Əliyevanın daim diqqət mərkəzindədir. Bu istiqamətdə həyata keçirilən proqramlar və layihələrdə YUNESKO ilə əməkdaşlığın genişləndirilməsi mühüm rol oynayır. 2005-ci ilin avqustunda YUNESKO ilə birgə keçirilmiş "YUNESKO-Azərbaycan: gələcəyə körpü" mövzusunda beynəlxalq konfrans təhsil sahəsində aparılan mütərəqqi islahatların başlanğıc mərhələlərindən idi. Gələcək fəaliyyət istiqamətləri ətrafında geniş fikir mübadiləsi aparılan konfransda Avropa təhsil sisteminə inteqrasiya və digər mühüm məsələlər müzakirə edildi.

YUNESKO ilə tərəfdaşlığın daha da möhkəmləndirilməsi baxımından 2008-ci il uğurlu dövrlərdən biri kimi yadda qaldı. Həmin ilin mayında Heydər Əliyev Fondunun və Təhsil Nazirliyinin təşkilatçılığı ilə dünyada savadlılığın dəstəklənməsi üzrə YUNESKO-nun regional konfransları silsiləsindən "Avropada subregional çərçivədə savadlılıq problemlərinə baxış: tərəfdaşlıq əlaqələrinin qurulması və innovativ yanaşmaların tətbiqinə dəstək" mövzusunda keçirilən Bakı konfransı qlobal savadlılığın dəstəklənməsinə yönəlmiş YUNESKO konfranslarının davamı, milli, regional və beynəlxalq səviyyələrdə savadlılığın təşviqinə yönəlmiş səylərin bir hissəsi idi. Heydər Əliyev Fondunun təşəbbüsü ilə keçirilən tədbir həm də Avropa ictimaiyyətinin savadlılıq və böyüklərin təhsili sahəsində ən aktual məsələlərin həllinə diqqət cəlb etmək məqsədi daşıyırdı. Dünyada savadlılığın dəstəklənməsi üzrə regional konfranslar silsiləsindən olan bu tədbirin Bakıda keçirilməsi xüsusi əhəmiyyətə malik idi. Forum müxtəlif hökumətlərin və beynəlxalq təşkilatların gördüyü tədbirlər haqqında məlumat verərək dialoqu gücləndirdi, savadlılıq və təhsil sahəsindəki problemlərin həlli üçün milli strategiyaların formalaşdırılmasına mühüm töhfə bəxş etdi.

Mədəniyyətlərarası dialoqda yeni mərhələ - Bakı forumu

BMT Baş Məclisinin qərarı ilə 2001-ci il sivilizasiyaların dialoqu ili elan olunsa da, məhz 2008-ci ilin 10 iyununda Heydər Əliyev Fondunun təşəbbüsü sayəsində YUNESKO və İSESKO-nun dəstəyi ilə Bakıda keçirilən "Mədəniyyətlərarası dialoqda qadınların rolunun genişləndirilməsi" beynəlxalq forumu ümumbəşəri mədəniyyətə, sülhün və əmin-amanlığın bərpa olunmasına hesablanmış ən böyük addım idi. Dünyanın müxtəlif ölkələrindən 300-dən çox nümayəndənin, mötəbər şəxslərin qatıldığı həmin forum bir çox beynəlxalq toplantıların və konfransların əsas mövzusu olan mədəniyyətlərarası dialoq predmetinin araşdırılmasında yeni mərhələnin əsasını qoydu. Forum müxtəlif ölkələrin və mədəniyyətlərin təmsilçilərini bir araya gətirməkdə böyük əhəmiyyət kəsb etdi, geniş fikir və təcrübə mübadiləsinin aparılmasına imkan yaratdı.

Forumun məqsəd və məramından söhbət açan Heydər Əliyev Fondunun prezidenti Mehriban xanım Əliyeva bir sıra vacib məsələlərə toxunaraq dedi: "Son 15 ildə alimlər və yazıçılar, din xadimləri və siyasətçilər çox sadə səslənən bir suala cavab axtarırlar: Dialoq, yoxsa qarşıdurma? Bu problem bir çox beynəlxalq forumların və konfransların əsas mövzusu olubdur. Zənnimcə, hər bir belə toplantı özlüyündə dialoq olaraq müxtəlif ölkələrin və mədəniyyətlərin təmsilçilərini bir araya gətirməklə böyük əhəmiyyət kəsb edir. Belə görüşlər ən azı insanların bir-birini daha dərindən tanımasına, fikir və təcrübə mübadiləsinin aparılmasına xidmət edir. Bu gün biz mədəniyyətlər və sivilizasiyalararası dialoq probleminə qadınların gözü ilə baxmalıyıq, qadın mövqeyini qabartmalıyıq".

Heydər Əliyev Fondunun təşəbbüsü ilə mədəniyyətlərarası dialoqda qadınların rolu mövzusunun məhz ölkəmizdə müzakirə edilməsi Azərbaycanın sivilizasiyalar arasında körpü rolu oynadığını bir daha sübut etdi. Respublikamızın beynəlxalq foruma ev sahibliyi etməsi isə ölkəmizin insan hüquq və azadlıqlarının qorunmasına verdiyi önəmin xüsusi göstəricisi, demokratik dəyərlərə, qadın hüquqlarının qorunmasına və mövcud problemlərin həllinə göstərdiyi diqqətin parlaq təzahürü idi.

"Mədəniyyətlərarası dialoqda qadınların rolunun genişləndirilməsi" mövzusunda beynəlxalq forum çərçivəsində Gənclər forumu da keçirildi. Müxtəlif ölkələrin yüksək səviyyəli nümayəndələrinin iştirak etdikləri tədbirdə gənc qadınların cəmiyyət həyatının iqtisadi, mədəni, sosial və siyasi sahələrində rolunun genişləndirilməsi istiqamətində qanunların gücləndirilməsi, gənc qadınların hüquqlarını müdafiə etmək üçün milli təsisatların və vətəndaş cəmiyyəti təşkilatlarının işinin təkmilləşdirilməsi, təhsil problemlərinin həlli və digər məsələlər müzakirə edildi.

Azərbaycan mədəniyyəti və elminin dünya miqyasında uğurlu təbliği

YUNESKO ilə əməkdaşlıq çərçivəsində Azərbaycan mədəniyyətinin dünya miqyasında uğurlu təbliği Heydər Əliyev Fondunun xüsusi önəm verdiyi məsələlərdəndir. Fondun dəstəyi ilə 2008-ci il mayın 20-də Parisdə YUNESKO-nun qərargahında xoşməramlı səfirlərin illik yığıncağı çərçivəsində ölkəmizin gənc istedadlarının "Azərbaycanın xoşməramlı mələkləri" adlı böyük konsert proqramı bu qəbildən idi. Konsertdə respublikamızın təbiət mənzərələrini, turizm güşələrini, qədim xalq sənətlərini, əfsanəvi Neft Daşlarını, gündən-günə gözəlləşən Bakının görməli yerlərini əks etdirən film nümayiş etdirildi.

Noyabrın 10-da Parisdə, YUNESKO-nun iqamətgahında ədəbiyyatımızın görkəmli nümayəndəsi Mir Cəlal Paşayevin 100 illiyinə həsr olunmuş mərasimin yüksək səviyyədə qeyd edilməsi isə ilk növbədə Azərbaycan elminə, mədəniyyətinə və ədəbiyyatına dünya miqyasında verilən dəyərin təzahürüdür. 2008-2009-cu illərdə YUNESKO-nun dünya miqyaslı hadisələrinin və şəxsiyyətlərinin yubileylərinin qeyd olunması ilə bağlı qərarına Mir Cəlal Paşayevin adının daxil edilməsi Heydər Əliyev Fondunun prezidenti Mehriban xanım Əliyevanın xoşməramlı səfir kimi bu sahədə geniş və səmərəli fəaliyyətinin bu qurumla əlaqələrin inkişafına verdiyi töhfə idi.

"Orta əsr əlyazmalarında tibb və əczaçılıq" mövzusunda beynəlxalq konfransda fondun dəstəyi ilə Əlyazmalar İnstitutunda saxlanılan qədim təbabətə dair 3 nadir tibb əlyazmasının YUNESKO-nun Dünya Yaddaşı Proqramının beynəlxalq siyahısına daxil edilməsi də mühüm hadisə sayıla bilər. Azərbaycanın tarixi və mədəni irsinin dünya miqyasında geniş təbliği öz bəhrəsini çox gözlətmədi.

Ölkəmizdəki yüksək tolerantlığı nəzərə alan Latın Mədəniyyəti Akademiyası özünün sayca XIII konfransının respublikamızda təşkilinə qərar verdi. Bakıda Heydər Əliyev Fondu ilə birgə keçirilən "Avrasiyada mədəniyyət müxtəlifliyi: Azərbaycan - sivilizasiyalararası dialoqun keçmişi və bu günü" XIII beynəlxalq konfrans ölkəmizdə dini etiqad azadlığının, dini dözümlülüyün yüksək səviyyədə olduğunu, eləcə də Azərbaycanın Şərq və Qərb sivilizasiyalarının ən yaxşı ənənələrini özündə birləşdirməsi reallığının əyani təcəssümü idi.

Müasir dövrdə demokratiyanın inkişafının getdikcə daha böyük vüsət alması, yeni-yeni əraziləri əhatə etməsi bütün xalqların və millətlərin demokratiyanı dövrümüzün həlledici inkişaf təmayülü kimi qəbul etməsinə səbəb olmuşdur. Ümummilli liderin anadan olmasının 85 illik yubileyinə həsr etdilmiş, Heydər Əliyev Fondu ilə Yeni Azərbaycan Partiyasının birgə təşkilatçılığı ilə keçirilən "Demokratiya və sabitlik naminə: əməkdaşlığın yeni imkanları" mövzusunda keçirilən beynəlxalq konfrans fundamental ictimai-siyasi məsələlərin müzakirəsini reallaşdırdı.

Gələcək inkişafı təmin edən gənclər siyasəti

Ölkə gənclərinin məşğulluğunun təmin edilməsi, onların ictimai-siyasi proseslərdə yaxından iştiraka cəlb olunması Heydər Əliyev Fondunun ümummilli liderin ideyalarına dəstək konsepsiyasının tərkib hissələrindən biridir. Ətraf mühit problemlərinin həllində gənc liderlərin iştirakı, gənclərin məşğulluğuna təsir göstərən maneələrin qlobal, milli səviyyələrdə müzakirəsi və digər məsələlər ötən ilin sentyabrında Heydər Əliyev Fondunun, Gənclər və İdman Nazirliyinin təşkilatçılığı ilə Dünya Gənclərinin IV Məşğulluq Sammitində (YES) diqqət mərkəzində oldu. Azərbaycanın birinci xanımının himayəsi ilə keçirilən sammit ölkəmizdə dövlət gənclər siyasətinin uğurla həyata keçirildiyini, bununla bağlı mühüm qərar və qanunların, dövlət proqramlarının icra olunmasını nümayiş etdirdi. Tədbirdə aparılan fikir mübadiləsi və problemlərin müzakirəsi gənclərin məşğulluğu kimi qlobal problemlərin həlli baxımından faydalı oldu. Heydər Əliyev Fondunun prezidenti Mehriban xanım Əliyeva Azərbaycanın gənc ölkə olduğunu diqqətə çatdıraraq ölkəmizdəki iqtisadi artım səviyyəsindən, respublikamızın sosial-iqtisadi tərəqqisindən söhbət açdı. Sammitin müxtəlif bölmələrinin iclasında kənd yerlərində gənc nəslin gəlirləri, bu zümrənin imkanlarının genişləndirilməsi və məşğulluğunun təmin edilməsində dünyanın ən qabaqcıl təcrübələri, məşğulluq mərkəzlərinin yaradılması, sahibkarlıqla bağlı maarifləndirmə, insan kapitalının idarə edilməsi, təhsildən kənar qalan gənclərlə iş və digər məsələlər müzakirə olundu, təkliflər səsləndi.

Heydər Əliyev Fondunun fəaliyyəti fərqli sivilizasiyaların uğurlu dialoquna, keçmişlə gələcək arasında körpü salınmasına, insanlara yüksək mənəvi-etik dəyərlərin əxz edilməsinə yönəlmişdir.

İctimai həyatımızın ayrı-ayrı sahələrində həyata keçirilən layihələr, beynəlxalq təşkilatlarla uğurlu əməkdaşlıq Azərbaycanın uğurlu gələcəyinin təmin olunmasına, respublikamızın sivil dünyaya inteqrasiyasına hesablanıb. Ulu öndərin ideyalarına sadiq qalan, onun əməllərini yaşadan və ideyalarını gerçəkləşdirən fond səmərəli fəaliyyəti ilə ölkəmizin tərəqqisinə, dövlət quruculuğuna yeni-yeni töhfələr bəxş edir.

Anar RASİMOĞLU

Azərbaycan.- 2009.- 22 avqust.- S. 2.