Dağlar insanın qəlbində
həmişə möhtəşəm duyğular oyadır.
Bu duyğularda heç vaxt xırda, cılız hisslərə
yer olmur. Ta başdan-binadan dağlarla insanların sevgisi
qarşılıqlı olub. Gün çıxandan gün
batana qədər üzü dağlara yaşayan,
dağların "gözləri" qarşısında
ömür sürən insanların hərdən
sözünü-söhbətini, sevincini-kədərini
dağlarla bölüşməyə də ehtiyacı olur.
Zirvəsindən bəyaz
qarı, pənbə buludları əskik olmayan vüqarlı
dağlar həmişə insanların səsinə,
harayına əks-səda ilə cavab verib. Neçə
gündən bəri məmləkətimizin, sözün həqiqi
mənasında, axar-baxarlı, dilbər guşələrindən
olan qədim Qəbələ torpağında,
yaşıllıqlar, gözəlliklər qoynunda keçirilən
Beynəlxalq musiqi festivalı da, burada səslənən
dünya musiqi inciləri də uca dağların fonunda əks-səda
verərək hər yana yayılır.
Dağlar bu möhtəşəm
musiqili günləri, dünyanın müxtəlif ölkələrindən
gəlmiş qonaqların ona zillənən maraq dolu
baxışlarını əbədi olaraq yaddaşına
yazır, əvəzində öz vüqarından, əzəmətindən
onların da qəlbinə heç vaxt unuda bilməyəcəkləri
möhtəşəm duyğular bəxş edir. Belə bir
festivalın Qəbələdə yaşıl dağlar
qoynunda keçirilməsi yəqin ki, həm də rəmzi məna
daşıyır.
Dünyanın 16 ölkəsindən
-ABŞ-dan, Fransadan, Rusiyadan, Çindən, Xorvatiyadan və
digər ölkələrdən gəlmiş musiqili qonaqlar
bir daha şahid oldular ki, Azərbaycanda belə
dünyamiqyaslı tədbirlərin keçirilməsi
üçün təkcə paytaxt Bakıda deyil, ölkənin
regionlarında da hər cür şərait yaradılır.
Son dövrlərdə yüksək sürətlə
inkişaf edən Qəbələ rayonu müasir görkəmi,
milli memarlıq nümunələri, abad yolları, bir sözlə,
yüksək infrastruktur səviyyəsi ilə gələn
qonaqları doğrudan da heyran etmişdir.
Heydər Əliyev
Fondunun dəstəyi ilə keçirilən Beynəlxalq Qəbələ
festival-müsabiqəsi proqram zənginliyi ilə də diqqəti
çəkirdi. İştirakçılar hər cür
qayğı ilə əhatə olunmuşdu.
Bir çox dünya
şöhrətli ifaçıların
çıxışları, korifey sənətkarlar
qarşısında öz məharətlərini
nümayiş etdirən gənclərin həyəcanlı
sevinc dəqiqələri "Qafqaz Resort otel"ə
toplaşmış tamaşaçılar tərəfindən
alqışlarla qarşılanırdı. Festival
iştirakçıları ilə görüşüb təəssüratlarını
soruşduq.
İlya MAKSİMOV, pianoçu: - Rusiyanın
Yekaterinburq şəhərindən gəlmişəm . Müsabiqədə
birinci yeri tutaraq "Qran-Pri" mükafatına layiq
görüldüyüm üçün çox xoşbəxtəm.
Bu yerlər, buraların insanları maraqlı və
istiqanlıdırlar. Salonda ifa zamanı güclü musiqi
atmosferi, musiqi ovqatı hiss edirdirm. Bu mənə ruh yüksəkliyi
verirdi. Buraların təbiəti çox gözəldir. Məşqlərdən
və ifadan əvvəl bu dağlara baxanda həyəcanımı,
nigarançılığımı unudurdum. Qəbələni
isə heç vaxt unutmayacağam.
Fərhad BƏDƏLBƏYLİ, xalq artisti, Beynəlxalq
Qəbələ Festival-Müsabiqəsinin bədii rəhbəri:
- Belə bir festivalın Azərbaycanda keçirilməsi
olduqca qürurvericidir. Həm böyük məsuliyyət, həm
də perspektivli bir işdir. Heydər Əliyev Fondunun dəstəyi
sayəsində bütün təşkilat işləri
yüksək səviyyədə həll olunub.
Bir hissimi gizlətməməliyəm,
ilk günlər mənə elə gəlirdi ki,
tamaşaçı sarıdan bir az çətinliyimiz olacaq,
ancaq şükürlər olsun ki, maraq çox böyük
oldu. Təkcə Qəbələdən deyil, qonşu
rayonlardan - Oğuzdan, Ağdaşdan, İsmayıllıdan,
Şəkidən və digər rayonlarımızdan da o qədər
tamaşaçı gəlirdi ki, fərəhdən ürəyimiz
dağa dönürdü. Bu festival bir daha göstərdi ki,
Azərbaycanda beynəlxalq tədbirlər yüksək səviyyədə
keçirilir. Mən çox diqqət yetirirdim,
iştirakçılar məşqlərdən imkan tapan kimi
yurdumuzun bənzərsiz gözəllikləri ilə
maraqlanır, dağlara, meşələrə heyran-heyran
baxmaqdan həzz alırdılar. Bu festival münasibətilə
bütün xalqımızı, bütün musiqi ictimaiyyətimizi
təbrik edirəm.
Robert KARRASS, musiqişünas
(Kanada): - Görkəmli ifaçılar
iştirak etdilər. Onların ifalarından çox şey öyrəndik.
Tamaşaçılar isə çox
duyğulu, istiqanlı
idilər.
Azərbaycanlı
pianoçu Toğrul Hüseynlinin cəmi 16 yaşı olsa
da, çox bacarıqlı və istedadlıdır.
Həssas pianoçu
barmaqları, güclü hissiyyatı var. Toğrul daha
çox çalışsa, daha böyük uğurlar
qazanacaq. Qəbələyə vuruldum. Qəbələ Moskva,
Toronto olmasa da gözəl və müasirdir. Hər şey əla
idi. Ürəyim buralardan ayrılmaq istəmir.
Festival günləri
gözəl bir xatirə kimi təkcə insanların deyil, bu
sehrli gözəlliklər diyarının, bu uca
dağların da yaddaşında uzun müddət
yaşayacaqdır. Hər gün, hər axşam yaşıl
dağlara sarı uzanan bəyaz musiqi
işığının sehri həm də yeni əsərlərin,
yeri əlaqələrin yaranmasına öz təsirini göstərəcəkdir.
Telman NƏZƏRLİ
Azərbaycan.- 2009.- 22
avqust.- S. 2.