"Gənc liderlər üçün Yay Universiteti" layihəsinin iştirakçıları mükafatlandırıldı

Gənclər və İdman Nazirliyinin, "İRƏLİ" İctimai Birliyinin və Azərbaycan Respublikası Gənclər Təşkilatlarının Milli Şurasının "Gənc liderlər üçün Yay Universiteti" layihəsi iştirakçılarına diplomların təqdimetmə mərasimi keçirildi. Tədbiri açan "İRƏLİ" İctimai Birliyinin sədri Ceyhun Osmanlı bildirdi ki, layihəyə avqustun 8-də Qazax rayonunda yerləşən Milli Olimpiya Kompleksində start verilmiş, avqustun 17-də başa çatdırılmışdır. "Gənc liderlər üçün Yay Universiteti" layihəsini iştirakçıların sayına və proqramın zənginliyinə görə son illərin ən yaxşı tədbiri hesab etmək olar.

Mərasimdə "Gənc liderlər üçün Yay Universiteti" layihəsini əks etdirən film nümayiş etdirildi. Layihə çərçivəsində 130 gənc lider üçün liderlik təlimləri, ritorik və natiqlik bacarıqları, insan hüquqları, layihələrin yazılması və idarə olunması, şəbəkələşmə, müasir internet texnologiyaları mövzusunda təlimlər, Azərbaycan tarixinin ötən əsri əhatə edən dövrü, azərbaycançılıq ideyası, Azərbaycan tarixi haqqında mühazirələr keçirilmişdir. Layihədə iştirak edənlər əsasən "İRƏLİ" İctimai Birliyinin fəalları, müxtəlif gənclər təşkilatlarının nümayəndələri, ali məktəblərin tələbə-gənclər təşkilatlarının liderləri və fəal gənc jurnalistlər olmuşlar. Eyni zamanda, gənclərin asudə vaxtlarını səmərəli təşkil etmək məqsədilə maraqlı intellektual oyunlar, ekskursiyalar, idman yarışları, mədəni-əyləncəli proqramlar təşkil olunmuşdur. Gənclər layihə çərçivəsində müxtəlif rayonlara səfərlər etmiş, o cümlədən sərhədyanı hərbi hissədə olmuşlar.

Gənclər və idman naziri Azad Rəhimov bildirdi ki, gənclər üçün təşkil edilən belə layihələr onların istedadının, fiziki qabiliyyətlərinin, elmi potensiallarının daha da genişlənməsi üçün xüsusi əhəmiyyət kəsb edir. Müasir Azərbaycanda gənc liderlər nəslinin formalaşması olduqca vacibdir. Buna görə də gələcəkdə yeni layihələrin həyata keçirilməsi zəruridir.

Azərbaycan Respublikası Prezident Administrasiyasının Siyasi təhlil və informasiya təminatı şöbəsinin müdiri Elnur Aslanov hazırda yetişməkdə olan gənc nəslin gələcəkdə cəmiyyətin ayrı-ayrı sahələrini idarə edəcək kadrlara çevriləcəyini deyərək bunun məsul vəzifə olduğunu qeyd etdi. Elmi potensialın daim genişlənməsi, müasir informasiya texnologiyalarının sirlərinə dərindən bələd olmaq hər bir gənci irəli aparacaqdır. Layihədə iştirak edənlər arasında gələcəkdə liderlik xüsusiyyətləri ilə seçilən kadrlar formalaşmaqdadır.

Tədbirin sonunda "Gənc liderlər üçün Yay Universiteti" məzunlarına diplomlar təqdim edildi.

Anar RASİMOĞLU

Azərbaycan.- 2009.- 22 avqust.- S. 3.