Doğma yurdun ocaqları daha gur yanacaq

Son illər Azərbaycan dövləti qaçqın və məcburi köçkünlərin problemlərinin həlli istiqamətində nəzərəçarpan işlər görmüş, dünyanın bir sıra aparıcı dövlətlərinin, beynəlxalq qurumların iştirakı ilə əhəmiyyətli layihələr həyata keçirmişdir. Dövlət Neft Fondunun vəsaiti hesabına məcburi köçkünlər üçün bütün sosial-texniki infrastrukturu ilə birlikdə salınmış yeni qəsəbələr bu kateqoriyadan olan insanların həyat şəraitinin yaxşılaşdırılmasına xidmət edir.

Dövlət başçısı İlham Əliyev hələ 2003-cü il oktyabrın 1-də prezident seçkiləri ərəfəsində Biləsuvar rayonu ərazisində məcburi köçkünlər üçün salınmış yeni qəsəbədə görüş keçirərkən verdiyi "Ölkədə bir dənə də çadır şəhərciyi qalmayacaq" bəyanatı artıq reallığa çevrilmişdir. Ölkə rəhbərinin Ermənistan-Azərbaycan, Dağlıq Qarabağ münaqişəsinin həlli istiqamətində apardığı uğurlu xarici siyasət nəticəsində beynəlxalq səviyyədə mühüm tədbirlərin həyata keçirilməsi davam etdirilməkdədir. 2008-ci ilin martında BMT Baş Assambleyasının 62-ci sessiyasında "Azərbaycanın işğal olunmuş ərazilərində vəziyyət" adlı qətnamə qəbul edilmişdir. Bu mühüm sənəddə erməni silahlı qüvvələrinin Azərbaycanın işğal altında olan bütün ərazilərindən çıxması tələb edilərkən bir daha göstərilmişdir ki, problem birmənalı şəkildə Azərbaycan Respublikasının beynəlxalq sahədə tanınmış sərhədləri çərçivəsində, ölkəmizin ərazi bütövlüyü və suverenliyinə hörmət prinsiplərinə əsasən həll edilməlidir.

Hazırda ata-baba yurdlarını itirmiş 1 milyondan artıq soydaşımızın həyətyanı sahəsi və hər cür kommunal rahatlığı olan mənzillərlə təmin olunması, iş yeri və dolanışıq tapması üçün zəruri tədbirlər ardıcıllıqla davam etdirilir. Ölkə başçısının 2007-ci il 31 oktyabr tarixli sərəncamı ilə Dövlət Proqramına edilmiş əlavələr üzrə Məcburi Köçkünlərin Sosial İnkişaf Fondu tərəfindən bir sıra işlərin görülməsi də bu qəbildəndir. Adıçəkilən qurum 15 fin tipli qəsəbədə müvəqqəti məskunlaşmış 6 min 227 məcburi köçkün ailəsi və ölkənin bir sıra rayon və kəndlərindəki məktəblərdə məskunlaşmış 2 min 768 məcburi köçkün ailəsi üçün yeni qəsəbələr salınmasını, hündürmərtəbəli və fərdi yaşayış evlərinin tikintisini həyata keçirir. Bu sahədə artıq mühüm irəliləyişlər nəzərə çarpmaqdadır.

Goranboy rayonunun inzibati ərazisində Kəlbəcərdən olan 596 ailə üçün 120 hektar torpaq sahəsi ayrılmışdır. Bu ilin iyunundan həmin ərazidə evlərin, sosial obyektlərin, mühəndis-kommunikasiya qurğularının tikintisinə başlanmışdır. Kəlbəcərlilər üçün bu ərazidə 89 birotaqlı, 275 ikiotaqlı, 200 üçotaqlı və 32 dördotaqlı birmərtəbəli yaşayış evləri tikiləcək. Yeni qəsəbədə 360 şagirdlik orta məktəb, 50 yerlik uşaq bağçası, klub-icma mərkəzi, poçt binası, yanğınsöndürmə deposu, ambulatoriya, anbar və inzibati binalar da istifadəyə veriləcək. Qəsəbənin içməli su, qaz və elektriklə təchizatı da nəzərdə tutulmuşdur.

İmişli, Yevlax, Ağcabədi rayonlarında və Mingəçevir şəhərində məcburi köçkünlər üçün tikiləcək fərdi evlərin layihə-smeta sənədləri hazırlanmış, torpaq sahələri ayrılmış, digər təşkilati tədbirlər həyata keçirilmişdir.

Xocalı rayonundan olan 500 ailə üçün Goranboy rayonu ərazisində 4 yeni qəsəbənin salınması da gündəlikdədir. Qeyd edək ki, Aşağı Ağcakənddə 150 ailəlik, Böyrü kəndində 130 ailəlik, Meşəlidə 100 ailəlik qəsəbələrin tikintisi artıq başa çatdırılmışdır. Yuxarı Ağcakənd qəsəbəsində 120 ailəlik yaşayış məntəqəsinin tikintisi də tamamlanmaq üzrədir. Bu qəsəbələrdə orta məktəb, uşaq bağçası, klub-icma mərkəzləri və inzibati binaların tikilməsi də nəzərdə tutulmuşdur. Beyləqan rayonu ərazisində müvafiq mühəndis-kommunikasiya qurğuları olan 500 ailəlik yeni qəsəbə artıq təhvil verilmişdir. Burada da zəruri sosial obyektlər və xidmət sahələri yaradılmışdır. Paytaxtın Pirşağı qəsəbəsində Elmi-Tədqiqat Əkinçilik İnstitutunun yardımçı binalarında müvəqqəti məskunlaşmış əsasən Zəngilan rayonundan olan 31 məcburi köçkün ailəsi üçün məhəllənin tikintisi də tamamlanmışdır.

Nazirlər Kabinetinin 9 oktyabr 2007-ci il tarixli sərəncamının icrası ilə əlaqədar Göygöl və Qəbələ rayonları ərazisində müvafiq olaraq 25 və 155 məcburi köçkün ailəsi üçün bələdiyyə mülkiyyətində olan torpaq sahəsi ayrılmışdır. Tikinti işlərinin aparılması üçün layihə-smeta sənədləri hazırlanmışdır. Hazırda Qəbələdə iki beşmərtəbəli yaşayış evinin və 188 şagirdlik məktəb binasının tikintisi davam edir. Bu məhəllənin su, kanalizasiya, elektrik və qaz təchizatı xətlərinin tikintisi başa çatmaqdadır.

Binəqədi rayonundakı 2 nömrəli evtikmə kombinatının ərazisində Qaçqınların və Məcburi Köçkünlərin İşləri üzrə Dövlət Komitəsinə ayrılan 3 hektar torpaq sahəsində tikiləcək çoxmərtəbəli evlərdə 369 məcburi köçkün ailəsi məskunlaşacaq. Burada işlərin 80 faizi artıq görülmüşdür. Füzuli rayonunun Horadiz şəhəri ərazisində yeni idman kompleksinin tikintisinin başa çatdırılması 2010-cu ilə təsadüf edəcək. Biləsuvar rayonu ərazisində isə Cəbrayıl Rayon İcra Hakimiyyətinin inzibati binasının tikintisi başa çatmaqdadır.

Göründüyü kimi, ölkəmizdə məcburi köçkünlərin həyat şəraitinin yaxşılaşdırılması, onların zəruri sosial ehtiyaclarının daha dolğun ödənilməsi üçün rasional tədbirlər uğurla davam etdirilir.

Soydaşlarımız dövlət başçısı İlham Əliyevin həyata keçirdiyi uğurlu daxili və xarici siyasəti ürəkdən bəyənir, dəstəkləyir və ümid edirlər ki, işğal altında olan torpaqlarımız tezliklə azad ediləcək, o yerlərdə yenidən təzə imarətlər, mədəniyyət ocaqları, təhsil müəssisələri, səhiyyə obyektləri tikiləcək. Qarabağlıların öz əzəli yurdlarında yandırdıqları ocaqlar daha gur işıq saçacaq!

Akif CABBARLI

Azərbaycan.- 2009.- 22 avqust.- S. 5.