Ermənilər növbəti dəfə gülünc iddiaları ilə özlərini beynəlxalq səviyyədə rüsvay etmişlər

Neçə illərdir dünya ictimaiyyətini aldadaraq 1915-ci ildə Osmanlı dövlətində baş verən hadisələrə "erməni soyqırımı" donu geyindirərək beynəlxalq sığorta təşkilatlarından təzminat almaq istəyən ermənilərin ümidləri gözlərində qaldı. Çünki ABŞ-ın Federal Məhkəməsi qondarma soyqırımla bağlı ermənilərin beynəlxalq sığorta təşkilatlarından həyat sığortası adı altında təzminat almasına imkan verən qanunu ləğv etdi və "soyqırımı" ifadəsi işlətmək qadağan olundu.

Amerikada güclü fəaliyyət göstərən erməni lobbisinin gərgin əməyi nəticəsində son illər bu məsələ nəinki gündəmdən düşmür, hətta bir neçə Avropa ölkəsi də bu məsələni dəstəkləyərək tarixi gerçəklikləri öyrənmədən 1915-ci il hadisələrini "erməni soyqırımı" adı altında qanun şəklində qəbul etdi. Lakin ulularımız demiş, haqq da yerin tapır... Dəfələrlə soyqırımı məsələsi kimi bəzi ölkələrin parlamentlərində gündəmə gətirilən və bununla da Türkiyəyə təzyiq göstərmək üçün düşmən qüvvələrin əlinə bəhanə verən ermənilər sonda özləri gülünc vəziyyətə qaldılar.

Federal Məhkəmə ləğvetmə qərarını onunla izah edib ki, "erməni soyqırımı" haqqında qanun Federal Məhkəmə səviyyəsində deyil, ABŞ-ın bir ştatı tərəfindən qanun formasında hazırlanıb və ona əsaslandırılıb. Bu səbəbdən də həmin qanunun heç bir hüquqi qüvvəsi yoxdur.

Məhkəmənin qərarında bildirilir: "ABŞ-ın xarici siyasətinə təsir göstərən hər hansı əyalət qanunu qeyri-qanunidir və belə məsələlərdə yalnız Federal Dövlətin qanunu əsas götürülür". Hakim David Tomson bildirib ki, ABŞ-da Federal Dövlət I Dünya müharibəsi zamanı "erməni ölüləri" mövzusunda siyasi anlamlar daşıyan "soyqırımı" ifadəsini işlətməmək haqqında qərar qəbul etmişdir

Xatırladaq ki, ermənilərin maraqlarına uyğun olan bu qanun ABŞ-ın Kaliforniya ştatında yaşayan və geniş lobbiçilik fəaliyyəti göstərən ermənilərin təkidilə 2000-ci ildə qəbul edilmişdi. Həmin qanuna əsasən 1915-ci ildə Osmanlı dövlətində "soyqırıma" məruz qalan ermənilərin miraslarına səlahiyyət verilirdi ki, onlar sığorta təşkilatlarına qarşı məhkəmə işi açsınlar və yüksək məbləğdə vərəsəyə sahib olsunlar.

Həmin qanunun üstündən 9 il keçməsinə baxmayaraq, arzusuna çatmayan ermənilər məsələ ətrafında həddən artıq hay-küy qaldırır, hətta onlara pul ödəməyən beynəlxalq sığorta şirkətlərinə qarşı məhkəmə iddiası irəli sürmək niyyətində olduqlarını bəyan edirdilər. Onların bu hay-küyü ABŞ Federal Məhkəməsini məsələyə yenidən baxmağa vadar etdi və ermənilər tərəfindən hiddət və hüznlə qarşılanan qərar qəbul etdi.

İndi ermənilər vəkil axtarışına çıxıblar. Onları müdafiə edən vəkil Bruan Kabatek məlum qərarı yanlış və böyük fəlakət kimi dəyərləndirərək deyib ki, bu işi Yüksək Məhkəməyə çıxardacaq. Vəkilin bu iddiasını zarafat kimi qəbul edən həmkarları isə bildiriblər ki, hər halda, cənab Bruan əsəbidir. O, çox yaxşı bilir ki, Yüksək Məhkəmə ABŞ-ın hər hansı bir ştatında qəbul edilən və heç bir hüquqi qüvvəyə malik olmayan qanunu deyil, Federal Məhkəmənin qərarını dəstəkləyəcək.

Bunu nəzərə alan ABŞ Federal Məhkəməsi məsələyə yenidən qayıtmış və ermənilərin etirazına səbəb olan qərar qəbul etmişdir. Bununla da ermənilər növbəti dəfə gülünc iddiaları ilə özlərini beynəlxalq səviyyədə rüsvay etmişlər.

R.RZALI

Azərbaycan.- 2009.- 23 avqust.- S. 1.