Şeyxülislam müqəddəs Ramazan ayı münasibətilə iftar süfrəsi açmışdır

Xəbər verdiyimiz kimi, avqustun 28-də Qafqaz Müsəlmanları İdarəsinin sədri şeyxülislam Allahşükür Paşazadə müqəddəs Ramazan ayı münasibətilə öz iqamətgahında iftar süfrəsi açmışdır.

Azərbaycan Prezidenti İlham Əliyev iftar mərasimində iştirak etmişdir.

Mərasimi şeyxülislam açdı.

Qafqaz Müsəlmanları İdarəsinin sədri şeyxülislam Allahşükür Paşazadənin çıxışı

- Bismillahir-rəhmanir-rəhim!

Zati-aliləri, möhtərəm cənab Prezident!

Əziz din qardaşlarım!

Möhtərəm səfirlər!

Hörmətli qonaqlar!

Ənənəvi iftar məclisimizə təşrif gətirən bütün əziz qonaqlarımızı, xüsusən dövlətimizin rəhbəri, möhtərəm cənab İlham Əliyevi səmimi qəlbdən salamlayır, dəvətimizi qəbul etməklə islam aləminin önəmli mərasiminə ehtiram göstərdiyinizə görə Azərbaycan müsəlmanları adından və şəxsən öz adımdan dərin təşəkkürümü bildirirəm.

Biz hər il sizinlə mübarək Ramazan ayında, iftar mərasimində görüşürük. Bu görüşlərimiz adi tədbirlərdən deyildir. Bu məclis biz dindarlar üçün dövlətimizin qədim və müqəddəs islam dininə olan ehtiramının göstəricisi, xalqımız üçün milli-mənəvi dəyərlərə verilən yüksək qiymət, dünya ictimaiyyəti üçün isə Azərbaycanda din və dövlət münasibətlərinin zirvə məqamı deməkdir. Əslində bu, yalnız iftar süfrəsi deyil, birliyimizin, qardaşlığımızın, tolerantlığımızın, Prezidentimizin ətrafında sıx birləşməyimizin nümunəsidir. Şükr edirəm ki, bu görüşün səadətini və bu ayın nemətini Allah-Taala bizə bəxş edir.

Əlbəttə, biz hər dəfə böyük ehtiramla qeyd edirik ki, Azərbaycanın iqtisadi, ictimai-siyasi və mədəni həyatında yaranan dönüş böyük tarixi şəxsiyyət, mərhum Heydər Əliyevin adı ilə bağlıdır. Ölkədə demokratik, hüquqi, dünyəvi dövlətçiliyin əsaslarını quran Heydər Əliyev milli ideologiyada dini dəyərlərin mühüm yer tutduğunu daim bəyan edirdi. Bizim çoxmillətli regionda xalqlarımızın dostluğunun möhkəmlənməsində, dinlərarası tolerantlıq münasibətlərinin inkişafında, Qafqazda sabitliyin təminatında Heydər Əliyevin xidmətləri əvəzsizdir.

Ulu öndərimiz Heydər Əliyevə Allah rəhmət eləsin!

Mərhum Heydər Əliyevlə məni bağlayan ünsiyyət tellərinin, səmimi münasibətlərin tarixi çox böyükdür. Uzun illik tanışlığımız ərzində milli mənəviyyatımızın, istər ölkə daxilində, istərsə də xaricdə şeyxülislamlıq məktəbinin formalaşmasında Heydər Əliyevin böyük zəhməti olmuşdur. İllərin sınağından keçən bu ənənələrin bu gün müasir Azərbaycanın lideri, dövlətimizin başçısı əlahəzrət İlham Əliyevin timsalında davam etməsini Allah-Taalanın lütfü kimi qiymətləndirirəm.

Mən cənab Prezident haqqında ən yüksək və layiqli fikirləri söyləməkdən yorulmuram: bizim Prezidentimiz bunlardan daha yüksəkdə duran şəxsiyyətdir. Ölkənin ən çətin məqamlarında, iqtisadi böhranlar və ictimai gərginliklər dönəmində cənab Prezident milli dəyərlərimizə, dindarlarımızın arzu və ehtiyaclarına həssaslıqla yanaşıb, mərasimlərimizdə iştirak edib, vəd etdiyi tikintilərin - Bibiheybət, Təzəpir, Əjdərbəy, İçərişəhər Cümə məscidlərinin təmir və bərpasına diqqətini bir gün belə əsirgəməyib. Hər bir azərbaycanlı, hər bir müsəlman üçün qürur mənbəyinə çevrilmiş bu müqəddəs abidələrin hər daşında Prezidentimizin zəhməti və qayğısı vardır. O, xalqımızın qəlbində həm dini abidələrimizin, həm də zəfərli gələcəyimizin memarı adını qazanıb. Allah, etdiyi bütün gözəl əməllərdə ona yardımçı olsun! Bu, təkcə mənim yox, bütün Azərbaycan xalqının ən səmimi dualarıdır. Azərbaycan xalqı, ölkəmizin dindarları möhtərəm Prezidentimiz İlham Əliyevin nəcib amallarını ürəkdən bəyənir və dövlətimizin başçısına daim dəstək olacaqlarını bəyan edirlər!

Cənab Prezident! Möhtərəm qonaqlar!

Bu il Azərbaycanın dini mühitində bir sıra önəmli hadisələr baş vermişdir. Hər şeydən əvvəl, biz Bakının islam mədəniyyətinin paytaxtı seçilməsinin sevincini yaşamaqdayıq. Buna görə ilk növbədə Heydər Əliyev Fondunun prezidenti, xoşməramlı səfirimiz, Azərbaycanın nəcabətli xanımı Mehriban Əliyevaya minnətdarıq. Məhz onun təşəbbüsü ilə Bakı qədim islam mədəniyyətinin nümunəsi kimi dünyaya təqdim olunub.

Qafqazın tarixi-dini mərkəzi sayılan Təzəpir məscidi kompleksinin və Qafqaz Müsəlmanları İdarəsinin yeni binalarının istifadəyə verilməsi 2009-cu ilin əlamətdar hadisələri siyahısındadır. Bu ilin iyun ayında Moskvada MDB ölkələri müsəlman icmalarının Məşvərət Şurasının yaradılması və sədarətin mənə həvalə olunması da, əslində, Azərbaycanın beynəlxalq nüfuzunun artmasına xidmət edən amillərdəndir. Dövlətimizin dünya birliyində mövqelərinin güclənməsinin təzahürüdür ki, Rus Pravoslav Kilsəsi, Roma Katolik Kilsəsi, ərəb müsəlman aləmi ilə bir cərgədə yer alan Qafqaz Müsəlmanları İdarəsi YUNESKO-nun nəzdində dinlərarası Məşvərət Şurasının üzvüdür. Ənənəvi dinlərin liderləri sırasında Azərbaycan təmsilçisi kimi şeyxülislamın iştirakı da dövlətimizin beynəlxalq aləmdə artan nüfuz və etimadından irəli gəlir.

Bugünkü fürsətdən istifadə edərək dövlətimizin rəhbərinə 60 illik yubileyimin yüksək səviyyədə keçirilməsinə razılıq verdiyinə və ən əsası, ölkəmizin ali mükafatlarından olan "Şərəf" ordeni ilə təltif edildiyimə görə dərin təşəkkürümü bildirmək istəyirəm. Mən fəxr edirəm ki, həyatımın 30 ili bir şeyxülislam kimi böyük qardaşım, dostum, fenomen şəxsiyyət, mərhum Heydər Əliyevlə birgə olub və onun dəyərli tövsiyələri ilə Allah yoluna, islamın, vətənimizin tərəqqisinə və Azərbaycan dövlətçiliyinə xidmət etmişəm. Vətənimizin müstəqilliyi, xalqımızın birliyi, ölkəmizin ərazi bütövlüyü və gələcəyi naminə, cənab Prezident, Sizi dəstəkləyir və həmişə də dəstəkləyəcəyik. Vətən yolunda şəhid olanların ruhuna rəhmət diləyir və əmin olduğumu bildirirəm ki, inşallah, Sizin rəhbərliyinizlə Azərbaycan daha böyük uğurlar əldə edəcəkdir!

Zati-aliləri! Hörmətli qonaqlar!

Ramazan on bir ayın sultanı, saflıq və səmimiyyətin məkanı, Qurani-Kərimin nazil olma tarixidir. Belə gözəl bir məqamda mənim evimi mənəvi ocaq bilib bir dost, bir qardaş kimi məclisimizdə iştirakınıza görə möhtərəm Prezidentimiz, Zati-aliləri, Sizə minnətdarlıq edirəm. Sizin hər gəlişiniz bizim üçün şərəf və iftixardır və həm də Allahın mərhəmətidir. Allah-Taala Qurani-Kərimdə Bəqərə surəsinin 185-ci ayəsində buyurur ki, "İnsanlara doğru yolu göstərən, bu yolu açıq dəlilləri ilə aydınlaşdıran və haqqı batildən ayıran Quran Ramazan ayında nazil edilmişdir".

Hamınıza bir daha təşəkkürlərimi bildirir, oruc və namazlarınızın qəbul olunması üçün Allahdan xeyir-dualar diləyirəm.

Allah qəbul eləsin!

Vəssalamu əleykum və rəhmətullahi və bərəkatuhu.

* * *

Azərbaycan Prezidenti İlham Əliyev iftar mərasimində çıxış etdi (Dövlətimizin başçısının çıxışı qəzetin bugünkü nömrəsində dərc olunur).

Rus Pravoslav Kilsəsinin Bakı və Xəzəryanı Yeparxiyasının rəhbəri Aleksandr Atanın çıxışı

- Zati-aliləri, möhtərəm cənab Prezident!

Çox hörmətli, əziz yubilyar şeyx həzrətləri!

Hörmətli Semyon Borisoviç!

Xanımlar və cənablar!

Ənənəvi iftarda biz - siyasətçilər, din xadimləri, Azərbaycanda akkreditə edilmiş diplomatlar görüşmək, ölkənin dini həyatının spesifikası ilə tanış olmaq, bir-birimizlə üzbəüz ünsiyyət imkanı əldə edirik. Biz burada dəfələrlə demişik ki, ümummilli lider Heydər Əliyev Azərbaycanın müasir həyatının elə möhkəm təməlini qoymuşdur ki, onun sayəsində hətta indiki iqtisadi böhran dövründə də ölkə uğurla inkişaf edir. Bunun sayəsində Azərbaycan, xoşbəxtlikdən millətlərarası ayrı-seçkilikdən və dinlərarası münaqişələrdən yan keçmişdir. Lakin zaman keçir, həyat bizim qarşımızda yeni vəzifələr qoyur, yeni təhdidlərlə üzləşirik. Burada diplomatlardan biri dedi ki, ekspertlərin öyrəndiyi predmetlər arasında təkcə neft, Azərbaycanın faydalı qazıntıları deyil, həm də ölkəmizdə çox yüksək səviyyədə yaradılan tolerantlıq məsələsi olmalıdır.

Mən vurğulamaq istərdim ki, möhtərəm şeyxin bu yubiley ili həqiqətən əlamətdar zəfərlər ili olmuşdur. Azərbaycanda həyat tərzi, o cümlədən dini münasibətlər də bütün dünyada nümunə olmuş və yüksək qiymətə layiq görülmüşdür. Qeyd etməliyəm ki, MDB müsəlmanlarının qurultayı keçirilmiş və həmin forumda bizim çox hörmətli şeyximiz Birlik ölkələri müsəlman icmalarının Məşvərət Şurasının sədri seçilmişdir. Bu, MDB müsəlmanları arasında şeyxin nə qədər yüksək qiymətləndirilməsinin təsdiqidir. Bundan əlavə, bu il Birləşmiş Millətlər Təşkilatı yanında Dinlərarası Məşvərət Şurası yaradılmışdır. Bu təşəbbüsün müəlliflərindən biri bizim möhtərəm şeyx olmuşdur.

Hazırda artıq YUNESKO yanında rəsmi işçi orqan yaradılır. O, din xadimlərinin, ictimai və siyasi xadimlərin bir-biri ilə ünsiyyət qurmasına kömək edəcəkdir. Düz iki gün bundan əvvəl mən Rus Pravoslav Kilsəsinin baş keşişi, zati-müqəddəsləri patriarx Kiril ilə görüşmüşəm. O, mənimlə söhbət zamanı şeyxin dinlərarası fəaliyyətinə çox yüksək qiymət verdi və dinlərarası sülhün, həmrəyliyin və anlaşmanın möhkəmlənməsi işində şeyxin irəli sürdüyü bütün təşəbbüsləri dəstəkləmək arzusunda olduğunu bildirdi. Mən də əziz yubilyarımıza ünvanlanmış təbriklərə qoşuluram, ona nəcib fəaliyyətində uğurlar və əlbəttə, uzun ömür arzulayıram ki, biz burada bu gözəl evdə dəfələrlə görüşə bilək, Azərbaycanın həyatında mövcud olan problemləri müzakirə edək və Azərbaycanın iri addımlarla irəliləməsinə, XXI əsrdə milli və dini sülh nümunəsi olmasına sevinək. Hamınıza təşəkkür edirəm və hamınızı ürəkdən təbrik edirəm.

Azərbaycan Dağ Yəhudiləri İcmasının sədri Semyon İxiilovun çıxışı

- Zati-aliləri möhtərəm İlham Heydər oğlu!

Möhtərəm şeyxülislam!

Möhtərəm Aleksandr Ata!

Əziz qonaqlar!

Bu gün yenidən iftar məclisində olmağım mənə çox xoşdur. Burada ən əziz qonaq Azərbaycan Respublikasının Prezidenti İlham Heydər oğlu Əliyevdir. O, güclü, təcrübəli, tolerant, müdrik, öz azad ölkəsində hər bir insana hörmət bəsləyən insandır. Cənab Prezident, biz Sizi burada salamlayırıq, gördüyünüz bütün işlərə görə Sizə təşəkkür etmək istəyirik.

Mən Azərbaycanın bütün yəhudiləri adından hörmətli cənab Prezident, Sizin şəxsinizdə, möhtərəm şeyx Sizin şəxsinizdə bütün Qafqaz müsəlmanlarını müqəddəs Ramazan ayı münasibətilə təbrik etmək, möhkəm cansağlığı, xoşbəxtlik diləmək, ən xoş arzularımı çatdırmaq istəyirəm.

Allah namazınızı və orucunuzu qəbul eləsin.

* * *

Şeyxülislam Allahşükür PAŞAZADƏ: Cənab Prezident, mənim haqqımda söylədiyiniz xoş sözlərə, əməyimə verdiyiniz yüksək qiymətə görə Sizə minnətdarlığımı bildirirəm. Əlbəttə ki, həyatda hər bir şəxsin müəllimi olur. Mənim də müəllimim ulu öndər Heydər Əliyev həzrətləridir. Mən onu özümə müəllim bilirəm. Əgər onun məsləhətləri, onun göstərdiyi yollar olmasaydı, mən bu zirvəyə çata bilməzdim. Ona görə də bu gün istərdim ki, mənim həm mənəvi, həm də dünyəvi həyatımda böyük rol oynayan ulu öndərimiz Heydər Əliyevi yada salaq, onun ömür-gün yoldaşını yada salaq.

Ümumiyyətlə, torpaq uğrunda şəhid olanların xatirəsini yad edək. Bugünkü iftar süfrəsinin müqəddəsliyi naminə Qurani-Şərifdən bir neçə ayə oxuyaq. Sonra Ramazan duası oxunacaqdır. Allah sizi qorusun. Çox sağ olun.

* * *

Sonra Quran oxundu, iftar süfrəsi açıldı.

İftar mərasimində Milli Məclisin sədri Oqtay Əsədov, Prezident Administrasiyasının rəhbəri Ramiz Mehdiyev, xarici dövlətlərin ölkəmizdə akkreditə olunmuş səfirləri, dini icmaların nümayəndələri, Milli Məclisin deputatları iştirak edirdilər.

AzərTAc

Azərbaycan.- 2009.- 30 avqust.- S. 2.