Azərbaycan-Əfqanıstan əlaqələrinin böyük potensialı vardır

AzərTAc xəbər verir ki, Əfqanıstan Milli Assambleyasının sədri Məhəmməd Yunis Qanuni dekabrın 1-də Milli Məclisin Beynəlxalq münasibətlər və parlamentlərarası əlaqələr daimi komissiyasının sədri Səməd Seyidovla görüşmüşdür.

S.Seyidov Azərbaycanın Əfqanıstan ilə əlaqələrin inkişafına böyük önəm verdiyini bildirmişdir. Hər iki ölkənin terrordan əziyyət çəkdiyini diqqətə çatdıran komissiya sədri demişdir ki, Əfqanıstanın Dağlıq Qarabağ məsələsi ilə bağlı beynəlxalq təşkilatlar çərçivəsində ölkəmizin haqlı mövqeyini müdafiə etməsi Azərbaycanda razılıqla qarşılanır və yüksək qiymətləndirilir.

Daimi komissiyanın sədri Milli Məclisdə Əfqanıstanla parlamentlərarası əlaqələrə dair dostluq qrupu yaradıldığını vurğulamış və qarşı tərəfin də belə bir qrup yaradacağına ümidvar olduğunu demişdir. O, hər iki dostluq qrupunun ölkələrimiz arasında əlaqələrin inkişafına xidmət edəcəyinə inamını ifadə etmişdir.

Məhəmməd Yunis Qanuni ölkəsinin Azərbaycan ilə əlaqələrin inkişafına böyük önəm verdiyini qeyd etmişdir və demişdir ki, Azərbaycana bu səfəri əlaqələrimizin inkişafında mühüm rol oynayacaqdır.

Əfqanıstanın terrordan əziyyət çəkdiyini deyən Məhəmməd Yunis Qanuni terrorla mübarizədə səylərin əlaqələndirilməsinin vacibliyini vurğulamışdır.

Daha sonra görüşdə qarşılıqlı maraq doğuran digər məsələlər müzakirə edilmiş, belə səfərlərin ölkələrimiz arasında əlaqələrin inkişafına mühüm töhfələr verəcəyinə inam ifadə edilmiş, Azərbaycan-Əfqanıstan münasibətlərinin böyük potensialı olduğu xüsusi vurğulanmışdır.

Azərbaycan.-2008.-2 dekabr.-S.4.