Bakıda TRASEKA-ya üzv dövlətlərin nəqliyyat nazirlərinin yubiley konfransı keçirilir

AzərTAc xəbər verir ki, dekabrın 3-də Bakıda Avropa-Qafqaz-Asiya beynəlxalq nəqliyyat dəhlizi (TRASEKA) layihəsində iştirak edən dövlətlərin nəqliyyat nazirlərinin yubiley konfransı işə başlamışdır.

Nəqliyyat Nazirliyindən bildirmişlər ki, konfrans Avropa-Qafqaz-Asiya beynəlxalq nəqliyyat dəhlizinin inkişafı üzrə çoxtərəfli razılaşmanın 10 illiyi və Avropa Şurasının TRASEKA layihəsi proqramının 15 illik yubileyinə həsr olunmuşdur.

Tədbirdə 20-dən artıq ölkənin, beynəlxalq təşkilatların və maliyyə qurumlarının nümayəndələri iştirak edirlər. Bu dövlətlərdən 12-si qurumun üzvüdür.

Dekabrın 4-də işini "Gülüstan" sarayında davam etdirəcək yubiley tədbirində nəqliyyat dəhlizinin uzadılması və digər qonşu dövlətlərin bu layihəyə qoşulması məsələləri müzakirə olunacaq, quruma üzv ölkələr arasında əməkdaşlığın genişləndirilməsi və perspektivlər haqqında fikir mübadiləsi aparılacaqdır.

Azərbaycan.-2008.- 4 dekabr.-S.1.