Müasir çağırışlara cavab verən, beynəlxalq səviyyəli ali təhsil ocağı

AzərTAc xəbər verir ki, dekabrın 5-də Milli Təhlükəsizlik Nazirliyinin Heydər Əliyev adına Akademiyasının yaradılmasının 10 illik yubileyinə həsr olunmuş təntənəli mərasim keçirilmişdir.

Milli təhlükəsizlik naziri, general-leytenant Eldar Mahmudov başda olmaqla nazirliyin rəhbər işçiləri və akademiyanın şəxsi heyəti əvvəlcə Fəxri xiyabana gələrək Azərbaycanın təhlükəsizlik orqanlarının milliləşmə prosesinin banisi, müstəqillik illərində milli təhlükəsizlik orqanlarının ölkəmizin mənafelərini və dövlət maraqlarını qoruyan, yüksək peşəkarlığa malik qurum kimi formalaşmasında misilsiz xidmətləri olan ümummilli lider Heydər Əliyevin xatirəsini ehtiramla yad etmiş, məzarı önünə əklil qoymuşlar.

Görkəmli oftalmoloq alim, akademik Zərifə xanım Əliyevanın da xatirəsi ehtiramla yad edilmiş, məzarı üzərinə tər çiçək dəstələri düzülmüşdür.

Daha sonra təntənəli yubiley mərasimi Milli Təhlükəsizlik Nazirliyinin Heydər Əliyev adına Akademiyasında davam etmişdir. Tədbirdə görkəmli ziyalılar, ictimai-siyasi xadimlər, millət vəkilləri iştirak etmişlər. Milli Təhlükəsizlik Nazirliyinin rəhbərliyi və mərasimdə iştirak edən qonaqlar akademiyanın həyətində Azərbaycan xüsusi xidmət orqanlarının inkişafında əvəzsiz rolu olan ulu öndər Heydər Əliyevin abidəsi önünə əklil qoymuş, xatirəsini ehtiramla yad etmişlər. Milli təhlükəsizlik naziri general-leytenant Eldar Mahmudov akademiyanın şəxsi heyətini təbrik etdikdən sonra ümummilli liderin xatirəsi bir dəqiqəlik sükutla anılmış, dövlət himni səslənmişdir. Bundan sonra meydana ali təhsil ocağının bayrağı gətirilmiş və kursantlar tribunanın önündən təntənəli marşla keçmişlər.

Təntənəli mərasimdə iştirak edən Prezidentin İcra Aparatının hüquq-mühafizə orqanları ilə iş şöbəsinin müdiri Fuad Ələsgərov, təhsil naziri Misir Mərdanov, Milli Məclisin deputatları və respublikanın ali təhsil ocaqlarının, o cümlədən hərbi tədris müəssisələrinin rektorları və rəisləri akademiyada "Şöhrət" muzeyində olmuşlar. Qonaqlara məlumat verilmişdir ki, muzeydə Azərbaycan milli təhlükəsizlik orqanlarının formalaşmasında və inkişafında misilsiz xidmətləri olmuş ulu öndər Heydər Əliyevin mənalı həyat və fəaliyyətini əks etdirən zəngin fotomateriallar, sənədlər və çoxsaylı eksponatlar toplanmışdır. Burada ulu öndərin həm keçmiş Sovet İttifaqı dönəmində, həm də ölkəmizin müstəqillik illərində Azərbaycanın tərəqqisi və nüfuzunun artması naminə gördüyü işləri də əks etdirən fotomateriallar toplanmışdır. Qonaqlara ümummilli liderin fəaliyyətinə həsr edilmiş musiqili kompozisiya nümayiş etdirilmişdir.

Daha sonra milli təhlükəsizlik naziri Eldar Mahmudov tərəfindən akademiyanın xidmətdə və tədrisdə fərqlənən bir qrup əməkdaşına fəxri fərman, medal, döş nişanları və digər mükafatlar təqdim olunmuş, xatirə şəkli çəkdirilmişdir.

Akademiyanın iclas zalında davam edən tədbirdə ali təhsil ocağının yaradılmasının 10 illik yubileyi münasibətilə Azərbaycan Prezidenti, Silahlı Qüvvələrin Ali Baş Komandanı İlham Əliyevin təbrik məktubunu Prezidentin İcra Aparatının şöbə müdiri Fuad Ələsgərov oxumuşdur.

Mərasimdə çıxış edən milli təhlükəsizlik naziri Eldar Mahmudov yubiley münasibətilə iştirakçıları təbrik edərək demişdir ki, müstəqil Azərbaycanın təhlükəsizliyini təmin edəcək peşəkar zabit kadrlarının hazırlanmasında xüsusi əhəmiyyətə malik olan bu ali təhsil ocağı ulu öndər Heydər Əliyevin 1998-ci il 1 dekabr tarixli Sərəncamı ilə yaradılmışdır. Milli Təhlükəsizlik Nazirliyinin Heydər Əliyev adına Akademiyasının təsis edilməsi ümummilli liderin müstəqil Azərbaycanın təhlükəsizlik orqanlarının inkişafına göstərdiyi böyük qayğının ifadəsi idi. Keçmiş SSRİ vaxtında bu sahə üçün kadrlar Moskva, Leninqrad və Minsk şəhərlərində hazırlansa da, müstəqil dövlətimiz üçün belə mütəxəssislərin kənarda hazırlanması mümkün deyildi.

Nazir Eldar Mahmudov qeyd etmişdir ki, on il ərzində akademiyanın maddi-texniki bazasının yaradılması, təlim və tədrisin təşkili sahəsində bir sıra işlər görülmüşdür. Xüsusi təhsil ocağının fəaliyyətə başladığı ilk dövrlə müqayisədə bu gün vəziyyət tamamilə dəyişmişdir. Son illər burada böyük təmir və yenidənqurma işləri aparılmış, təzə korpuslar inşa olunmuş, maddi-texniki bazanın möhkəmləndirilməsi, ən müasir texnoloji vasitələrin tətbiqi təmin edilmişdir.

Yaxın ötən dövr ərzində ümumilikdə milli təhlükəsizlik orqanlarında baş verən ciddi dəyişiklikləri qeyd edən nazir bunun Prezident, Ali Baş Komandan İlham Əliyevin göstərdiyi diqqət və qayğının nəticəsi olduğunu vurğulamışdır. Akademiyaya şəxsən gələn dövlətimizin başçısı döyüş bayrağını təqdim etmiş, burada görülmüş işləri yüksək qiymətləndirmişdir. Ali Baş Komandanın "Burada işlər yüksək səviyyədə qurulub, akademiya ən yüksək dünya standartlarına cavab verir" sözləri təhsil ocağının fəaliyyətinə verilən ən yüksək qiymətdir.

Akademiyada tədrisin xüsusi xidmət orqanlarının xüsusiyyətləri nəzərə alınmaqla qurulduğunu bildirən nazir bu ali təhsil müəssisəsində bilikləri mənimsəyən gənclərin əsl peşəkarlar kimi yetişməsi ilə yanaşı, onların vətənə və xalqa sədaqət ruhunda tərbiyəsinə, dünyagörüşlərinin inkişafına ciddi diqqət yetirildiyini bildirmişdir.

General-leytenant Eldar Mahmudov vurğulamışdır ki, milli təhlükəsizlik orqanlarının müasir tələblərə və çağırışlara uyğun təkmilləşməsi, yeniləşməsi istiqamətində həyata keçirilən tədbirlər bundan sonra da uğurla davam etdiriləcək, müstəqil Azərbaycan dövlətinin təhlükəsizliyini təmin edəcək kadrların hazırlanması işinə müstəsna önəm veriləcəkdir.

Mərasimdə çıxış edən təhsil naziri Misir Mərdanov yubiley münasibətilə akademiyanın müəllim və kursant heyətini respublikanın təhsil işçiləri adından təbrik etmişdir. Nazir demişdir ki, 10 il tarix baxımından qısa dövr olsa da, bu gün MTN-in Heydər Əliyev adına Akademiyasında bir neçə onilliyə sığmayacaq işlər aparılmışdır. Azərbaycanda son illər təhsilə dövlət səviyyəsində böyük diqqət və qayğının göstərildiyini qeyd edən təhsil naziri akademiyanın buna ən bariz nümunə olduğunu bildirmişdir. Bu gün milli təhlükəsizlik orqanlarına xalqımızda böyük inam və hörmətin formalaşdığını qeyd edən nazir bunun son illər Milli Təhlükəsizlik Nazirliyində aparılmış ciddi dəyişikliklərlə bağlı olduğunu vurğulamışdır.

Yeni Azərbaycan Partiyasının sədr müavini, icra katibi, Milli Məclisin deputatı Əli Əhmədov bildirmişdir ki, bu təhsil ocağında çalışanların və təhsil alanların tam iftixar və qürur hissi keçirmək hüququ vardır. Çünki yubileyinə toplaşdığımız akademiya həm ulu öndər Heydər Əliyev tərəfindən təsis edilmişdir, həm də onun adını şərəflə daşıyır. Azərbaycanın son illər sürətlə inkişaf etdiyini, xarici dövlətlərlə qarşılıqlı faydalı əlaqələr qurduğunu qeyd edən Əli Əhmədov bildirmişdir ki, bu inkişaf həm də qaçılmaz rəqabət yaradır. Belə bir şəraitdə dövlətimizə qarşı müəyyən təhdidlərin, terror təhlükəsinin qarşısının alınmasında Milli Təhlükəsizlik Nazirliyinin rolu xüsusi əhəmiyyət kəsb edir. Fərəhli haldır ki, milli təhlükəsizlik orqanları ölkəmizə qarşı yönəlmiş bu təhdidlərin qarşısını vaxtında və peşəkarlıqla alır, müstəqil dövlətçiliyimizin qorunması üçün böyük fədakarlıq nümayiş etdirirlər. Bütün bunların arxasında vətənə, xalqa, Azərbaycan dövlətçiliyinə böyük məhəbbət və sevgi hissi dayanır.

Akademiyanın kollektivini yubiley münasibətilə təbrik edən YAP sədrinin müavini əmin olduğunu bildirmişdir ki, təhlükəsizlik orqanları dövlətimizin, xalqımızın narahatlıq keçirməsinə heç zaman yol verməyəcəklər.

Mərasimdə çıxış edən Azərbaycan Respublikasının Prezidenti yanında Dövlət İdarəçilik Akademiyasının rektoru, professor Seyfəddin Qəndilov müasir Azərbaycan dövlətinin yaradıcısı Heydər Əliyevin irsinin bu gün etibarlı əllərdə olduğunu bildirmişdir. Son illər Azərbaycanın bütün sahələrdə görünməmiş sürətlə inkişaf etdiyini söyləyən rektor vurğulamışdır ki, bu inkişafın qorunmasında, mühafizə olunmasında milli təhlükəsizlik orqanlarının mühüm rolu vardır. Rektor qeyd etmişdir ki, dövlətçilik üçün xüsusi əhəmiyyət kəsb edən Milli Təhlükəsizlik Nazirliyində gənc kadrların hazırlanmasına, onların müasir tələblərə uyğun yetişdirilməsinə xüsusi diqqət yetirilir. Akademiya ilə tanışlıq deməyə əsas verir ki, Azərbaycanın müasir çağırışlara cavab verən xüsusi təyinatlı ali təhsil ocağı vardır.

Akademiyanın rəisi general-leytenant Ziya Yusifzadə bu təhsil ocağında təlim və tərbiyə prosesinin müasir tələblər səviyyəsində qurulması məqsədi ilə həyata keçirilmiş tədbirlər haqqında ətraflı məlumat vermişdir. Rektor qeyd etmişdir ki, akademiyada yaradılmış müasir tələblərə cavab verən şərait dövlətimizin başçısının diqqət və qayğısının, eləcə də bu siyasətin həyata keçirilməsinə Milli Təhlükəsizlik Nazirliyi rəhbərliyinin gündəlik nəzarətinin bəhrəsidir və kollektivimiz buna görə Ali Baş Komandana minnətdardır. General-leytenant Ziya Yusifzadə akademiyada ən müasir standartlar səviyyəsində aparılan təhsil-tədris, təlim-tərbiyə, eləcə də kursantların mənəvi yetkinliyi və fiziki sağlamlığı istiqamətində görülən işlər barədə də geniş məruzə etmişdir.

Sonra MTN-in Heydər Əliyev adına Akademiyasının şəxsi heyətinin Prezident İlham Əliyevə müraciəti qəbul olunmuşdur.

Sonda akademiyanın 10 illik yubileyi münasibətilə hazırlanmış "Şücaət və şöhrətin ünvanı" adlı sənədli film nümayiş olunmuşdur.

Azərbaycan.-2008.- 7 dekabr.-S.3.