Azərbaycanın baş ziyarətgahı

Ümummilli lider Heydər Əliyevin məzarını ziyarət etmək üçün Fəxri xiyabana geniş insan axını başlayıb. Ziyarətə gələnlər arasında isə ən müxtəlif təbəqədən olan insanlara rast gəlmək mümkündür. Onlardan biri, Vəli Mehdiyev hər il ümummilli liderin qəbrini ziyarət etdiyini bildirir. Onun sözlərinə görə, Heydər Əliyev müasir Azərbaycanın qurucusu kimi yaddaşında qalıb: "Heydər Əliyev hakimiyyətə gələndə ölkədə çox acınacaqlı vəziyyət idi. Silahlı dəstələr cinayətlər törədir, özbaşınalıq baş alıb gedirdi. Ulu öndər Heydər Əliyev bütün bunlara son qoydu. Camaatın güzəranı yaxşılaşdı. Azərbaycanı dünyaya məhz bu dahi lider tanıtdı. Heydər Əliyevin xatirəsi daim yaddaşlarda yaşayacaq. Hər il mən onun məzarını ziyarət edirəm. Özü də buraya tək yox, ailə üzvlərimlə gəlirəm".

Şuşa rayonundan məcburi köçkün düşən Vaqif Cavadov da ümummili liderin xatirəsini yad edənlər arasındadır. O dedi ki, məcburi köçkünlərin vəziyyəti Heydər Əliyev hakimiyyətə gəldikdən sonra yaxşılaşmağa başladı: "Yadımdadır, torpaqlarımız işğal olunduqdan sonra böyük çətinliklərlə üzləşirdik. Heç burada ailə üzvlərimizi düz-əməlli məskunlaşdırmamış bizi cəbhəyə göndərməyə çalışırdılar. Əlbəttə ki, cəbhəyə getməyə hazır idik. Ancaq ailə üzvlərimizi bir yerdə məskunlaşdırmalıydıq axı. Şuşa işğal olunanda Bakıda da vəziyyət o qədər yaxşı deyildi. Yaxşı ki, az sonra Heydər Əliyev xalqın təkidli tələbi ilə hakimiyyətə gəldi. Elə o vaxtdan da məcburi köçkünlərə daha çox diqqət yetirildi. Heydər Əliyevin məcburi köçkünlərin yaşadığı yerlərə tez-tez getməsini, onların dərdinə şərik olmasını heç vaxt unuda bilmərəm".

Sürücü işləyən 38 yaşlı İrşad İbrahimov da hər il ümummilli liderin məzarını ziyarət etdiyini bildirir: "Mən təkcə dekabrda ümummilli liderimizin məzarını ziyarət etmirəm. İldə 4-5 dəfə buraya gəlirəm. Axı o, indiki Azərbaycanı yaradıb, inkişaf etdirdi. Bunu tək mən demirəm, xalq deyir, xaricdən Azərbaycana gələnlər deyir. Heydər Əliyev mənim yaddaşımda el atası kimi qalıb. Müstəqillikdən sonra hakimiyyət başına gələnlər Azərbaycanı nə günə qoymuşdular? Camaat evdən çıxa bilmirdi. Yaxşı ki, Heydər Əliyev hakimiyyətə gəldi və bütün bunlara son qoydu. O olmasaydı, indi Allah bilir, Azərbaycan nə günə qalmışdı. Camaat ulu öndər Heydər Əliyevin gəlişindən sonra xoş gün görməyə başladı. Yaxşı ki, ondan sonra hakimiyyətə layiqli davamçısı gəldi. Prezident İlham Əliyev ümummiili liderin siyasətini çox gözəl davam etdirir. Qarabağ problemi də həll olunduqdan sonra hər şey daha yaxşı olacaq".

62 yaşlı Bəsti Məmmədova isə təqaüdçüdür: "Bala, Heydər Əliyevi mən hələ sovet dövründən yaxşı tanıyıram. Özüm ali təhsilli dil-ədəbiyyat müəlliməsiyəm. 1969-cu ildə Heydər Əliyev Azərbaycana rəhbər seçiləndən sonra ölkəmizi SSRİ məkanında daha yaxşı tanımağa başladılar. Bildilər ki, Azərbaycan təkcə neft ölkəsi deyil. Ziyalı potensialımızı Heydər Əliyev üzə çıxardı. Gənclərimizi SSRİ-nin ən öndə gedən ali məktəblərinə təhsil almağa göndərdi. İkinci dəfə də Heydər Əliyev Azərbaycanın ən ağır günündə rəhbər vəzifəyə gəldi. Onun uzaqgörən, məqsədyönlü siyasəti sayəsində Azərbaycan dünyada tanındı. Artıq ölkəmizlə hesablaşırlar. Onun Azərbaycan qarşısında xidmətləri misilsizdir. Bunları saymaqla qurtarmaz. İndi də onun siması gözlərim önünə gələndə kövrəlirəm".

Azərbaycan.-2008.-12 dekabr.-S.1.