Azərbaycanın Moskvadakı səfirliyində xatirə günü qeyd olunmuşdur

Azərbaycanın Rusiyadakı səfirliyində ümummilli lider, görkəmli siyasət və dövlət xadimi Heydər Əliyevin vəfatının beşinci ildönümü qeyd olunmuşdur.

Mərasimdə Moskva ictimaiyyətinin, Azərbaycan diasporunun nümayəndələri, habelə bir vaxtlar Heydər Əliyevlə işləmiş və ünsiyyətdə olmuş insanlar toplaşmışdılar.

Tədbir iştirakçıları Azərbaycan xalqının dahi oğlu, müasir Azərbaycanın memarı və qurucusu Heydər Əlirza oğlu Əliyevin xatirəsini anmış, ulu öndərin səfirliyin qarşısındakı büstü önünə güllər qoymuşlar.

Səfir Polad Bülbüloğlu toplaşanlara müraciətlə demişdir ki, bu kədərli gün Moskvada hər il qeyd olunur, insanlar Azərbaycanın dahi liderinin nurlu xatirəsini anmaq üçün buraya gəlirlər. Böyük rəhbər özündən sonra inkişafda olan və çiçəklənən bir ölkə qoymuşdur, onun banisi olduğu dövlət siyasəti Azərbaycan Prezidenti İlham Əliyev tərəfindən uğurla davam etdirilir.

Diplomat xatırlatmışdır ki, məhz Heydər Əliyev 1990-cu il yanvarın 21-də ölkəmizin Rusiyadakı daimi nümayəndəliyində mətbuat konfransı keçirmiş və sovet rəhbərliyinin Azərbaycan xalqına qarşı təcavüzkarlıq aksiyası həyata keçirdiyini birinci olaraq bəyan etmişdir. O vaxt bu, olduqca əhəmiyyətli ictimai-siyasi akt, cəsarətli addım, vətəndaşlıq hünəri idi.

Sonra Azərbaycan səfirliyində ehsan verilmişdir.

Asya HACIZADƏ,

AzərTAc-ın xüsusi müxbiri

Moskva

Azərbaycan.-2008.-13 dekabr.-S.2.