Ulu öndər gənclərə xüsusi qayğı göstərirdi

XX əsrdə Azərbaycan xalqının ən böyük nailiyyəti, şübhəsiz, müasir Azərbaycan dövlətinin yaradılmasıdır. Öz müstəqilliyini bərpa edən Azərbaycan demokratik, hüquqi, dünyəvi dövlət kimi möhkəm təməllər üzərində inkişaf edir. Müstəqillik illərində yaşayışımızın bütün sahələrini əhatə edən köklü dəyişikliklər və dərin islahatların həyata keçirilməsi məhz Heydər Əliyevin adı ilə bağlıdır. Heydər Əliyev ötən əsrin 70-ci illərində başladığı islahatların yekunu kimi xalqımızı əsrin sonlarına doğru müstəqil Azərbaycan dövləti kimi əzəmətli bir reallığa qovuşdurdu. Qurub-yaratdığı müstəqil dövlətin sarsılmazlığının, demokratik yüksəlişinin, əbədiliyinin, tutduğu müstəqillik yolunun dönməzliyinin təmin edilməsi də Heydər Əliyevin kökü min illər əvvəllərə söykənən Azərbaycan tarixi qarşısındakı müstəsna xidmətləridir.

Müstəqil Azərbaycan dövləti bu gün tarixinin ən böyük yüksəliş dövrünü yaşayır. Ölkəmiz artıq Cənubi Qafqazda deyil, Qərbə inteqrasiyaya can atan postsovet məkanının aparıcı dövlətlərindən birinə çevrilmişdir. Bu həqiqəti ölkəmizin həm regionda oynadığı geosiyasi rol, həm də bu amilin arxalandığı real iqtisadi göstəricilər sübut edir. Respublikamıza investisiya axını sürətlənir. Azərbaycan xarici kapital yatırımına görə Şərqi Avropa məkanında lider mövqeyini qoruyub saxlayır. Regionda elə bir beynəlxalq layihə yoxdur ki, ölkəmizin razılığı və fəal iştirakı olmadan həyata keçirilsin. Bütün bunlar ümummilli lider Heydər Əliyevin əsasını qoyduğu və Prezident İlham Əliyevin uğurla davam etdirdiyi siyasi kursun bəhrəsi kimi dəyərləndirilir. Bu gün hər bir Azərbaycan vətəndaşı şahiddir ki, ölkəmizə gələn investisiya axını, neft gəlirləri insanların mənafeyinə, sosial rifahının yaxşılaşdırılmasına xidmət edir. Vətəndaşlarımızın daha firavan həyatı üçün müxtəlif sahələri əhatə edən dövlət proqramlarının icrası uğurla reallaşdırılır. İşsizlik probleminin həlli istiqamətində inamlı addımlar atılır, yoxsulluq aradan qaldırılır. Ən ucqar kəndlərimizə belə yeni yollar, qaz, elektrik, su xətləri çəkilir. Bakı və Bakıətrafı qəsəbələrin inkişafı üçün əhəmiyyətli layihələr həyata keçirilir. Ölkəmizin hər yerində sağlamlıq ocaqları, diaqnostika mərkəzləri, xəstəxanalar tikilir. Əhalinin sağlamlığının qorunması dövlətimizin prioritet vəzifəsi olaraq qalır. Bir həkim kimi bütün bunlar məni ürəkdən sevindirir.

Heydər Əliyev hər bir Azərbaycan vətəndaşının yaddaşında qüdrətli şəxsiyyət, səmimi, təcrübəli rəhbər kimi yaşayır. Ulu öndəri orta məktəbdə oxuduğum illərdə tez-tez görür, onun yüksək qayğıkeşliyinin şahidi olurdum. Dahi şəxsiyyət qayğıkeş olduğu qədər də tələbkar bir valideyn idi. Ötən əsrin 70-ci illərində Heydər Əliyev tez-tez Bakının 6 nömrəli məktəbinə baş çəkər, hazırda dövlətimizə rəhbərlik edən oğlu İlham Əliyevin dərsləri ilə ciddi maraqlanardı. Bəzən Zərifə xanımla birlikdə gələrdi, müəllimlərin fəaliyyəti ilə maraqlanar, siniflərə baş çəkər, hər bir şagirdlə şirin-şirin söhbətləşər, hal-əhval tutardılar. Azərbaycan Respublikasına rəhbərlik edən nüfuzlu dövlət xadiminin böyük səmimiyyəti biz şagirdlərin qəlbində heç vaxt unudulmayacaq təəssürat yaradırdı. 1977-ci ilin 25 may gününü yaxşı xatırlayıram. Məktəbimizdə keçirilən buraxılış gecəsinə gələnlər arasında Heydər Əliyevlə Zərifə xanım Əliyevanı görəndə həm həyəcanlandıq, həm də hədsiz sevindik. Həmin günün söhbətləri, keçirilən şənliklər bütün şirinliyi ilə hafizəmdədir. İndi o illəri yada salanda Heydər Əliyev əzəməti, Heydər Əliyev böyüklüyü bir daha gözlərimin qarşısında canlanır.

İllər keçdi, Heydər Əliyev Moskvada Sovet İttifaqı rəhbərliyinin böyük postunda çalışdı. Yenidən vətənə döndü. Müstəqil Azərbaycana rəhbərlik etməyə başladı. Dahi insan öz xarakteri, ənənələrinə sadiqliyi ilə milyonlara nümunə olduğunu bir daha sübut etdi. Ölkədə həyata keçirilən radikal islahatların başlıca məqsədi kimi insanların sağlamlığını, rahat həyat tərzini ortaya qoydu. Bütün bu addımlar böyük insanın bütün azərbaycanlılara, balalarımıza olan məhəbbətindən, sevgisindən qaynaqlanırdı. O, hamını sağlam, gümrah, həyat eşqli görmək istəyirdi. Çox şükürlər olsun ki, ümummilli liderin arzuları bu gün sürətlə reallaşmaqdadır. Azərbaycanın hər yerində istifadəyə verilən sağlamlıq, istirahət və idman kompleksləri gənc nəslin xoşbəxt gələcəyinə xidmət edir. Ölkə başçısı İlham Əliyevin rəhbərliyi ilə həyata keçirilən dövlət proqramlarının ali məqsədi də bir qayda olaraq məhz Azərbaycanın gələcəyini yaradan, ölkəmizin inkişafını sürətləndirən gənc oğlan və qızların sosial rifahının yüksəldilməsinə hesablanır.

Azad RƏŞTİYEV,

Nəsimi rayon

GEM-in direktoru

Azərbaycan.-2008.-13 dekabr.-S.5.