Lənkəranda Fövqəladə Hallar Nazirliyinin Cənub Regional Mərkəzi istifadəyə verilmişdir

AzərTAc-ın müxbiri xəbər verir ki, Lənkəran şəhərində Fövqəladə Hallar Nazirliyinin (FHN) Cənub Regional Mərkəzi istifadəyə verilmişdir.

Üçmərtəbəli inzibati binanın həyətində salınmış bağda ümummilli lider Heydər Əliyevin büstü qoyulmuşdur.

Cənub bölgəsinin 7 rayonuna xidmət göstərəcək mərkəz ilkin mərhələdə 4 ədəd yanğınsöndürən maşınla və 1 "Reonomobil"lə, çadır, elektrik generatorları ilə təmin edilmişdir. Mərkəz tədricən lazımi avadanlıq və texnika ilə kifayət qədər təmin ediləcək, beləliklə də cənub bölgəsində baş verən təbii fəlakətlərin nəticələrini aradan qaldırmaq üçün əlavə qüvvələr gətirilməsinə ehtiyac qalmayacaqdır.

Bölgənin iş adamları tikililər üçün lisenziyaların alınmasında, layihə-smeta sənədlərinin təsdiq edilməsində və müayinəsində "Bir pəncərə" prinsipi ilə mərkəzin xidmətindən istifadə edə biləcəklər. Burada FHN-nin bütün idarələrinin şöbələri fəaliyyət göstərəcəkdir.

Regional Mərkəzin açılış mərasimində iştirak edən fövqəladə hallar naziri Kəmaləddin Heydərov və Lənkəran Şəhər İcra Hakimiyyətinin başçısı Süleyman Mikayılov əvvəlcə ümummilli lider Heydər Əliyevin mərkəzin həyətindəki büstünün önünə gül dəstələri qoymuş, böyük öndərin xatirəsini ehtiramla yad etmişlər.

Kəmaləddin Heydərov və Süleyman Mikayılov rəmzi qırmızı lenti kəsdikdən sonra mərasim iştirakçıları mərkəzin otaqları və burada işçilər üçün yaradılan şəraitlə yaxından tanış olmuşlar.

Azərbaycan.-2008.-16 dekabr.-S.4.