Azərbaycanın xarici işlər naziri ATƏT-in Bakı ofisinin rəhbəri ilə görüşmüşdür

Xarici İşlər Nazirliyinin mətbuat xidmətindən AzərTAc-a bildirmişlər ki, dekabrın 18-də nazir Elmar Məmmədyarov Azərbaycanda fəaliyyətini başa çatdıran ATƏT-in Bakı ofisinin rəhbəri Xose Luis Herrero Ansola ilə görüşmüşdür.

Görüşdə X.L.Herrero Ansola ölkəmizdə işlədiyi müddətdə rəhbərlik etdiyi təşkilatın Azərbaycanın icra strukturları və xüsusən də, Xarici İşlər Nazirliyi ilə həyata keçirilən səmərəli əməkdaşlığından danışmışdır. Azərbaycanı xoş təəssüratlarla tərk etdiyini deyən diplomat növbəti iş yerinin Makedoniyada ATƏT-in missiyasının rəhbəri vəzifəsi olduğunu söyləmişdir.

Nazir E.Məmmədyarov ötən müddət ərzində ATƏT-in Bakı ofisi ilə əməkdaşlıqdan məmnunluğunu bildirmiş, bu dövr ərzində Azərbaycanda aparılmış fəal demokratik islahatlar barədə danışmış, habelə X.L.Herrero Ansolaya yeni təyinatında müvəffəqiyyətlər arzulamışdır.

Azərbaycan.-2008.-19 dekabr.-S.5.