"İlham ƏLİYEV: İnkişaf - məqsədimizdir" çoxcildliyinin birinci kitabı çapdan çıxmışdır

"Azərbaycanı çox gözəl gələcək gözləyir... Böyük planlarımız var, böyük perspektivlərimiz, gələcəyimiz var. Bunu həyata keçirmək üçün, qarşımızda duran planları reallaşdırmaq üçün Azərbaycanda Heydər Əliyevin siyasəti davam etməlidir. Azərbaycan xalqı öz seçimini edibdir. 1993-cü ildə bu siyasətə öz səsini veribdir. Bu siyasətə alternativ yoxdur və ola da bilməz. Hər bir alternativ siyasət Azərbaycana böyük faciələr gətirə bilər... Biz Heydər Əliyevin siyasətini davam etdirəcəyik, Azərbaycanı zəngin, qüdrətli dövlətə çevirəcəyik... Biz istəyirik ki, Azərbaycanın hər bir bölgəsi, lap ən balaca, kiçik kəndi, qəsəbəsi, rayonu da inkişaf etsin... Bizim məqsədimiz budur. Əminəm ki, bu, bütövlükdə Azərbaycan xalqının məqsədidir və amalıdır". Hamımıza tanış olan bu sözlər, fikirlər "İlham Əliyev: inkişaf - məqsədimizdir" çoxcildliyinin Azərnəşr tərəfindən yenicə çapdan buraxılmış birinci kitabından, 2003-cü il oktyabrın 11-də Siyəzəndə zavodun istifadəyə verilməsi mərasimində çıxışdan götürülmüşdür. O vaxtdan ötən beş il xalqımıza və ümumən dünyaya da göstərdi ki, həmin çıxışda və sonralar digər tədbirlərdə, görüşlərdə səslənən bu fikirlər indi artıq reallıqdır. Çoxsaylı xarici qonaqların da etiraf etdikləri kimi, bu illər ərzində Azərbaycanın mənzərəsi göz qabağında dəyişmişdir. Regionların sosial-iqtisadi inkişafına dair Dövlət Proqramının həyata keçirilməsi nəticəsində görülmüş, həqiqətən, nəhəng işlər başqa bir vaxtda on illərə kifayət edərdi. Ölkəmiz iqtisadi artımın sürətinə görə dörd ildir dalbadal dünyada birincidir. Azərbaycanın beynəlxalq nüfuzu daha da möhkəmlənmişdir və indi o, müstəqil siyasət yürüdən, öz sözü olan, etibarlı tərəfdaş, Cənubi Qafqaz regionunda lider kimi tanınan və qəbul edilən dövlətdir. Yaxın illərədək qaz idxal edən, xarici sərmayələrin cəlbinə çalışan, indi isə Avropanın enerji təhlükəsizliyinə töhfə verən, özü xaricdə sərmayə qoyan, özünü təmin edən ölkədir.

Hər bir vətənpərvər azərbaycanlının qürur duyduğu bu faktlar yuxarıda sitat gətirilən sözlərin artıq həyati gerçəkliyə çevrildiyini bir daha sübut edir.

Yeni nəşrin buraxılışına məsul Prezidentin İcra Aparatının rəhbəri, akademik Ramiz Mehdiyevdir.

AzərTAc xəbər verir ki, ümummilli lider Heydər Əliyevin 2003-cü il oktyabrın 1-də uzaq Klivlenddən "Azərbaycan xalqına müraciət"i ilə açılan cilddə İlham Əliyevin Azərbaycanın Baş naziri olduğu dövrdəki (2003-cü il avqust-oktyabr) çıxışları, nitqləri, müsahibələri, görüşləri, bəyanatları toplanmışdır.

Bu materiallar arasında "Vaşinqton post" qəzetinə, Rusiyanın kütləvi informasiya vasitələrinə, "Assoşieyted Press" agentliyinin müxbirinə, 15 oktyabr prezident seçkiləri ilə əlaqədar xarici ölkələrin kütləvi informasiya vasitələrinin nümayəndələrinə geniş müsahibələri, Türkiyəyə işgüzar səfəri, Rusiya Prezidenti Vladimir Putinlə söhbəti, Azərbaycan idmançıları, Rus mətbuatının V Ümumdünya Konqresinin iştirakçıları ilə görüşləri, Azərbaycan ziyalıları ilə görüşdə çıxışı mühüm yer tutur.

Xalqımızın və ölkəmizin ən ağrılı problemi olan Ermənistan-Azərbaycan, Dağlıq Qarabağ münaqişəsi məsələsi kitabdakı materialların bir çoxunda öz əksini tapmışdır. Bu baxımdan, Baş nazir İlham Əliyevin 2003-cü il sentyabrın 24-də BMT Baş Məclisinin 58-ci sessiyasındakı çıxışı xüsusi vurğulanmalıdır. Həmin çıxışında o, Ermənistanın ölkəmizə qarşı işğalçılıq və terrorçuluq siyasəti yürütməsini ən mötəbər beynəlxalq təşkilatın tribunasından dünyaya bir daha bəyan etmiş, bu məsələdə respublikamızın prinsipial mövqeyini açıqlamışdır. Eyni zamanda bildirmişdir ki, Azərbaycan güclü, demokratik dövlət, bazar iqtisadiyyatı qurmaq siyasi xəttinə qəti sadiqdir, ölkəmizin, xalqımızın iradəsi və arzusu beynəlxalq sülh və təhlükəsizliyə töhfə verməkdir.

AzərTAc-ın materialları əsasında hazırlanmış cildin sonunda verilmiş qeydlər, şəxs adları və coğrafi adlar göstəriciləri oxuculara bəhs edilən məsələlərlə bağlı əlavə məlumat almaq imkanı da yaradır.

AzərTAc

Azərbaycan.-2008.-20 dekabr.-S.2.