Azərbaycan Prezidenti İlham Əliyev Türkiyə Silahlı Qüvvələri Baş Qərargah rəisinin müavini, ordu generalı Hasan İğsızın başçılıq etdiyi nümayəndə heyətini qəbul etmişdir

Azərbaycan Respublikasının Prezidenti İlham Əliyev dekabrın 22-də Türkiyə Silahlı Qüvvələri Baş Qərargah rəisinin müavini, ordu generalı Hasan İğsızın başçılıq etdiyi nümayəndə heyətini qəbul etmişdir.

Dövlətimizin başçısı Azərbaycanla Türkiyə arasında dostluq və qardaşlıq münasibətlərinin bütün sahələrdə uğurla inkişaf etdiyini bildirdi. Türkiyənin Baş Qərargah rəisinin bir müddət əvvəl Azərbaycana səfərini xatırladan Prezident İlham Əliyev ölkələrimiz arasında hərbi sahədə əməkdaşlığın əhəmiyyətini və bunun bölgədə sülhün təmin olunmasındakı rolunu vurğuladı. Dövlətimizin başçısı Türkiyə Silahlı Qüvvələri Baş Qərargah rəisinin müavini, ordu generalı Hasan İğsızın başçılıq etdiyi nümayəndə heyətinin ölkəmizə bu səfərinin də əməkdaşlıq imkanlarını müzakirə etmək və faydalı danışıqlar aparmaq baxımından əhəmiyyətli olacağına ümidvar olduğunu bildirdi.

Dost və qardaş ölkə olan Azərbaycana səfərindən məmnunluğunu söyləyən ordu generalı Hasan İğsız ölkələrimiz arasında bütün digər sahələrdə olduğu kimi, hərbi sahədə də əlaqələrin böyük əhəmiyyət kəsb etdiyini və səfərin bu sahədə əməkdaşlığın daha da genişləndirilməsinə xidmət edəcəyinə əminliyini vurğuladı.

Azərbaycan.-2008.-23 dekabr.-S.1.