Mənzil-kommunal təsərrüfatının maddi-texniki təchizatının yaxşılaşdırılması ilə əlaqədar əlavə tədbirlər haqqında

Son illər ölkənin regionlarında geniş miqyaslı abadlıq və quruculuq işləri aparılmış, mənzil-kommunal təsərrüfatı müəssisələrinin maddi-texniki bazasının yaxşılaşdırılması üçün bir sıra tədbirlər həyata keçirilmişdir.

2007-2008-ci illərdə dövlət vəsaiti hesabına xüsusi təyinatlı kommunal texnikası alınaraq ölkənin paytaxtına, habelə şəhər və rayonların mənzil-kommunal təsərrüfatı müəssisələrinə verilmişdir.

Azərbaycan Respublikasının şəhər və rayonlarında mənzil-kommunal təsərrüfatının maddi-texniki bazasının müasir tələblərə uyğun qurulması, onun yeni xüsusi təyinatlı kommunal texnikası ilə təmin edilməsi, habelə şəhər və rayonların növbəti qış mövsümünə lazımi səviyyədə hazırlanması işlərinin davam etdirilməsi məqsədi ilə qərara alıram:

1. Şəhər və rayon icra hakimiyyətlərinə xüsusi təyinatlı kommunal texnikasının mərkəzləşdirilmiş qaydada alınması üçün Azərbaycan Respublikasının 2008-ci il dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Bakı Şəhər İcra Hakimiyyətinə 14,0 (on dörd) milyon manat məbləğində vəsait ayrılsın.

2. Azərbaycan Respublikasının Maliyyə Nazirliyi bu sərəncamın 1-ci bəndində nəzərdə tutulmuş vəsaitin maliyyələşdirilməsini müəyyən olunmuş qaydada həyata keçirsin.

3. Azərbaycan Respublikasının Nazirlər Kabineti bu sərəncamdan irəli gələn məsələləri həll etsin.

4. Bu sərəncam imzalandığı gündən qüvvəyə minir.

İlham ƏLİYEV,

Azərbaycan Respublikasının Prezidenti

Bakı şəhəri, 22 dekabr 2008-ci il

Azərbaycan.-2008.-23 dekabr.-S.1.