Ədliyyə Nazirliyi ilə ATƏT arasında ikitərəfli əməkdaşlıq yüksək səviyyədədir

AzərTAc xəbər verir ki, Azərbaycanın ədliyyə naziri, Məhkəmə-Hüquq Şurasının sədri Fikrət Məmmədov Azərbaycanda fəaliyyət müddəti başa çatan ATƏT-in Bakı ofisinin rəhbəri Xose Luis Herrero Ansola ilə görüşmüşdür.

Nazirliyin mətbuat xidmətindən bildirmişlər ki, Prezident İlham Əliyevin tapşırıqlarına əsasən məhkəmə-hüquq sisteminin təkmilləşdirilməsi üzrə genişmiqyaslı tədbirlərin görüldüyünü vurğulayan F.Məmmədov, hakimlərin ən mütərəqqi üsullarla seçimini, onların xarici mütəxəssislərin iştirakı ilə tədrisinin beynəlxalq standartlara uyğun keçirildiyini bildirmişdir.

Bu proseslərə ATƏT-in verdiyi töhfələr və Xose Luis Herrero Ansolanın xidmətləri qeyd olunaraq, ona təşəkkur edilmiş, yeni təyinatında müvəffəqiyyətlər arzulanmışdır.

İkitərəfli əməkdaşlığın ən yüksək səviyyəyə çatdığını deyən qonaq Azərbaycanda çalışdığı müddətdə mütərəqqi proseslərin şahidi olduğunu bildirmiş, o cümlədən regionlarda apellyasiya məhkəmələrinin yaradılmasını mühüm nailiyyət kimi qiymətləndirmişdir. Ədliyyə Nazirliyi ilə qurulmuş sıx işgüzar əlaqələrdən məmnunluğunu ifadə edən səfir, məhkəmə sisteminin inkişafı, hakimlərin treninqi və Avropa Məhkəməsi presedent hüququnun öyrənilməsi, əhaliyə hüquqi yardımın göstərilməsi və s. sahələr üzrə əməkdaşlığın bundan sonra da davam etdiriləcəyini vurğulamışdır.

Azərbaycan.-2008.-23 dekabr.-S.2.