Tanrı sevgisini yaşadan Prezident

Bəşəriyyətin çox sevdiyi yazıçı Viktor Hüqoya məxsus fikirdir: "Ən böyük himn körpə qığıltısıdır". Ailənin, nəslin və millətin səadəti də o zaman mümkünləşir ki, bu bəşəri himnin sədaları daim eşidilsin. Körpə, sadəcə olaraq, valideynlər arasında salınan mənəvi körpü deyildir. Hər bir körpə millətin gələcəyidir.

Azərbaycanda uşaqlara həmişə məhəbbətlə yanaşılıb. Bu qayğının əsası ümummilli lider Heydər Əliyev tərəfindən qranit bünövrələrlə təməllənib. Ulu öndər uşaqlarla görüşməyi, onlarla söhbət etməyi, dinləməyi çox sevərdi. İstedadlılara xüsusi qayğı göstərər, gələcək həyat yollarının düzgün istiqamətlənməsi üçün müxtəlif tədbirlər görərdi. Hələ sovet dövründə Azərbaycanda müxtəlif uşaq tərbiyə müəssisələri, mədəniyyət evləri, istirahət guşələri, sağlamlıq ocaqları yaradılmışdı. Üzvləri ancaq balacalardan ibarət olan "Cücələrim" ansamblının, "Bənövşə" uşaq xorunun şöhrəti dünyanı dolaşırdı.

Ömrümüzün bəxtəvər çağlarında - uşaq gülüşündən doyunca zövq almağa çalışdığımız vaxtlarda sanki həyatımızın nurunu yoxa çəkdilər. 1988-ci ilin payızında indiki Ermənistan adlanan ərazidə məskunlaşmış soydaşlarımızı min cür vəhşiliklə doğma ocaqlarından qovdular. O dəhşətli anlarda varına, dövlətinə yiyə durmayan analar qundaqlarını köksünə sıxıb, belinə bağlayıb ayaqyalın şaxtalı çöllərdə qaçmağa məcbur oldular. Əlbəttə, hamısı bu müdhiş qovhaqov əməliyyatında xilas olmadı. Analı-balalı qurda, quşa tuş gəldilər, çovğunlu dağlarda donub öldülər. Bir də havalar qızanda çör-çöpə ilişmiş paltarları tapıldı. Qurtulmuşların da uşaqlığı solğun keçdi. Qaçqın balası, qaçqın uşaq kimi ağır ləngərli epitetlərə büründülər. Tay-tuşları işıqlı otaqlarda, isti qucaqlarda böyüyəndə onlar da sınıq-salxaq torpaq komalarda, çadırlarda, vaqonlarda, yataqxanalarda, qamışdan hörülmüş daldanacaqlarda ağır həyatla üzləşdilər. Onların uşaqlığı olmadı ki?!

Bəlkə bu uşaqlar da bəxtəvər idilər. Çünki yaşayırdılar, dözürdülər, sabaha inanırdılar. Onların yaşıdlarını daha dəhşətli aqibətlər yaxaladı. Ermənilər Quqark rayonunda 70 uşağı dəmir boruya yığıb hər iki tərəfini qaynaqla qapadaraq boğdular. O binəsiblərin fəryadı eşidənlərin qulaqlarından hələ də çəkilməyib. Erməni vandalları körpə balalarımızı süngülərə keçirdilər. Xocalıda törədilən soyqırımın yer üzündə analoqu yoxdur. Şəhidlər xiyabanında naməlum körpələrin kiçik məzarları ürək ağrılarımıza çevrilib. Bütün bunlardan sonra Azərbaycan anası hər sitəmə, zülmə tab gətirərək dözürdü. Ona görə dözürdü ki, dövlətinə, millətinə, ordusuna, gələcəyinə inanırdı. Heç ola bilməzdi ki, şər ömrü boyu meydan sulasın. Nahaq haqqa qalib gəlsin.

Ümummilli lider Heydər Əliyevin başladığı böyük yolu ləyaqətlə davam etdirən ölkə Prezidenti cənab İlham Əliyevin təşəbbüsü ilə yeni qaçqın şəhərcikləri salındı. Heydər Əliyev Fondunun prezidenti, Milli Məclisin deputatı, YUNESKO və İSESKO-nun xoşməramlı səfiri Mehriban xanım Əliyevanın davamlı fəaliyyəti nəticəsində yeni məktəblər tikildi. Fiziki cəhətdən zəif, eləcə də talassemiyalı uşaqlara xüsusi qayğı göstərildi. Onların normal uşaqlar kimi böyüməsi, tərbiyə alması, oxuması üçün hərtərəfli şərait yaradıldı. Mehriban xanım Əliyevanın rəhbərliyi ilə fondun əsas fəaliyyəti əhalinin ən həssas təbəqəsinin - əsasən qadınların, məcburi köçkünlərin, aztəminatlı ailələrin uşaqlarının, eləcə də uşaq evlərində və internat məktəblərində tərbiyə olunan uşaqların həyat səviyyəsinin yaxşılaşdırılmasına yönəlmişdir. Fond eyni zamanda "Diabetli uşaqlara ən yüksək qayğı" və "Talassemiyasız həyat naminə" adlı layihələr də həyata keçirərək xəstə uşaqların müalicəsinə xüsusi diqqət ayırmışdır. Fondun fəaliyyətinin əsas prioritet istiqaməti budur ki, uşaqlar əziyyət çəkməsinlər. Onlara müasir səhiyyənin hər cür yardımından dəstək göstərilsin.

Böyüməkdə olan nəslin, xüsusilə də ən az müdafiə olunan hissəsinin təhsili ilə bağlı məsələlərə daim diqqət yetirilir. Uşaq evləri və internat məktəblərində tərbiyə alan kimsəsiz uşaqlar unudulmur. Onların təminatı ilə əlaqədar müxtəlif tədbirlər həyata keçirilir. Əlbəttə, Ermənistan-Azərbaycan, Dağlıq Qarabağ münaqişəsi zamanı valideyn qayğısından və diqqətindən məhrum olan uşaqların sayı da xeyli artmışdır. Diqqət çəkən cəhət budur ki, Heydər Əliyev Fondu başda Mehriban xanım Əliyeva olmaqla konkret işlər görərək həm uşaq evlərindəki problemlər həll edilir, həm də müəyyən proqramlar üzərində işlənilir ki, onlar bu gün də, sabah da lazım olacaqlar. Məqsəd budur ki, uşaqlarla bağlı hər bir sahədə uğur qazanmaq üçün müvafiq mütəxəssislər də hazırlansın.

Heydər Əliyev Fondunun dəstəyi ilə ölkəmizdə 30-dan çox uşaq evi və internat məktəbi ən müasir avadanlıqlarla təmin edilib. Bu məktəblərdə və evlərdə yaşayan uşaqlar həmişə dövlətin diqqət mərkəzindədir.

Bu gün respublikanın hər bir bölgəsində Olimpiya idman kompleksləri tikilərək istifadəyə verilib. Dövlətimiz tərəfindən görülən bu işlərin təməlində bir məqsəd dayanır - balalarımızın günləri boş keçməsin. Onlar həm sağlam, fiziki cəhətdən güclü, həm də gələcəkdə hansısa bir peşənin sahibi olsunlar.

Göstərilən qayğı və diqqət də Allaha xoş gedir. Statistika göstərir ki, son illər Azərbaycanda əkiz uşaqlar daha çox doğulur. Tanrının bu bəxşişi hamını ürəkdən sevindirir. Bu gün neçə ailədə Heydər, Zərifə, Mehriban, İlham adlı körpələr böyüyür. Tanrı talelərinə, ölkə başçısı da həmişəki kimi, xoş günlərinə, firavanlıqlarına təminatçı olsun!

Bölgələrdə müntəzəm görüşlər keçirən dövlət başçısı cənab İlham Əliyev hamı ilə mehriban görüşərək hər kəsin problemləri və qayğıları ilə maraqlanır. Uşaqlar ilə ünsiyyəti daha səmimi və yaddaqalan olur. Ölkə Prezidentinin uşaqlarla birlikdə lentə alınmış şəkillərinə baxdıqca duyursan ki, üzündə səmimi təbəssüm, xüsusi sevinc və qürur var. Çünki uşaqları şən və bəxtəvər görən dövlət başçısının könlü həqiqətən fərəhlənməyə bilməz. Xüsusən də yeni salınmış qaçqın şəhərciyində uşaqların gülüşü, şən ovqatı daha sirayətedicidir. Dünənəcən çadır şəhərciyində ağır şəraitdə yaşayan, heç bir əyləncə yeri olmayan, üst-başı nimdaş paltarlı uşaqlar bu gün səliqə-sahmanlı geyinir, işıqlı otaqlarda, zəngin fənn kabinetlərində çalısır, müasir təhsil komplekslərində oxuyur, üz-gözündən məyusluq yox, sevinc süzülür, kömpüter arxasında əyləşir, şahmat oynayır, rəsm çəkir, şeir deyir, rəqs edir, bir sözlə, müasir uşaq ömrünü yaşayır.

Uşaqlar bizim gələcəyimizdir. Bu müdrik fikrin məna çalarları çoxdur. Onların məhz xoş sabahımız olmaları bugünün necəliyindən çox asılıdır. Elə buna görə də ölkə başçısı cənab İlham Əliyev 22 dekabr 2008-ci ildə "2009-cu ilin "Uşaq ili" elan edilməsi haqqında" sərəncam imzalayıb. Sərəncamda bildirilir ki, ölkənin uşaqlarla bağlı demoqrafik perspektivlərinin müəyyənləşdirilməsi məqsədilə respublikada uşaqlara dövlət qayğısı gücləndirilsin, uşaq problemlərinə vətəndaş cəmiyyəti qurumlarının diqqəti artırılsın. Təbii ki, bu məqsədlə müəyyən tədbirlərin hazırlanıb həyata keçirilməsində Ailə, Qadın və Uşaq Problemləri üzrə Dövlət Komitəsi, təhsil, səhiyyə, gənclər və idman, habelə digər nazirliklər "Uşaq ili"nin uğurlu olması üçün Prezidentin sərəncamından irəli gələn vəzifələri düzgün müəyyənləşdirəcəklər.

Beləliklə, ömrümüzü yeni ildə birillik uşaqlara verdik ki, həyatımız xoş və firavan keçsin. Südəmər körpələrin, təbəssümlü uşaqların paklığından, saflığından həyatımıza yeni istəklər, təmizliklər süzülsün. Ömrümüzün "Uşaq ili"nə bürünmüş hər ayı, hər günü şən keçsin. Qədim bir alqışda deyilir ki, Tanrı evlərə uşaq səsi bəxş etsin. Bizim ürəyimizdən də keçən budur ki, əgər ölkə başçısı 2009-cu ili rəsmən "Uşaq ili" elan edibsə, qoy bizim işğalda qalmış torpaqlarımız ermən vandallarından təmizlənərək paklığa çıxsın! Bizə həsrət qalmış yurd yerlərimizdən millətimizi xoş gələcəyə aparan doğma balalarımızın şən səsləri gəlsin!

Deyirlər ki, ürəyində uşaq məhəbbəti qərar tutmuş insan əslində köksündə Tanrı sevgisi daşıyır. Bax, belə bir ülvi hisslərlə yaşayan ölkə Prezidenti İlham Əliyev Azərbaycan uşaqlarının ən sevimli himayədarıdır.

Flora XƏLİLZADƏ

Azərbaycan.-2008.-24 dekabr.-S.7.