Heydər Əliyev adına Bakı Dərin Özüllər Zavodunun kollektivinə

Hörmətli neftçilər!

Sizi - Heydər Əliyev adına Bakı Dərin Özüllər Zavodunun kollektivini müəssisənin təməlinin qoyulmasının 30 illiyi münasibətilə ürəkdən təbrik edirəm!

Keçmiş Sovetlər İttifaqında analoqu olmayan bu unikal müəssisə məhz xalqımızın ümummilli lideri Heydər Əliyevin gərgin səyləri və təşəbbüskarlığı sayəsində Azərbaycanda yaradılmışdır. Bilavasitə ulu öndərin rəhbərliyi altında tikilən zavod respublikamızın neft sənayesinin inkişafında əlamətdar hadisəyə çevrilmiş, hələ keçən əsrin 80-ci illərində neft yataqlarının işlənilməsi üçün zəruri metal konstruksiyaların istehsalında müstəsna rol oynamışdır.

Azərbaycan Respublikası Dövlət Neft Şirkətinin avanqardında gedən Bakı Dərin Özüllər Zavodu bütün postsovet məkanında zəngin texniki, kadr və intellektual potensialı ilə bu tipli yeganə müəssisə olaraq tanınır.

1984-cü ilin aprel ayında istismara verilən zavod ötən dövr ərzində nəhəng dəniz platformaları hazırlamaqla müstəqil Azərbaycanın iqtisadiyyatına töhfələr vermiş, ölkəmizin iştirakçısı olduğu beynəlxalq layihələrdə özünəməxsus yer tutmuşdur. Müəssisədə inşa edilən və dənizdə quraşdırılan "Günəşli", "Çıraq", "Mərkəzi Azəri", "Qərbi Azəri", "Şərqi Azəri", "Dərinsulu Günəşli" blokları və müvafiq üst tikililəri Azərbaycanın neft strategiyasının gerçəkləşməsində mühüm əhəmiyyətə malik sənaye obyektlərindəndir.Təsadüfi deyil ki, bu gün də əmək ənənələrinin davamı kimi "Ümid" yatağının qazma və texnoloji stasionar özüllərinin dayaq bloklarının hazırlanması sizin çalışdığınız flaqman müəssisədə həyata keçirilir.

Əminəm ki, Bakı Dərin Özüllər Zavodunun daim öz peşəkarlığı, zəhmətsevərliyi və fədakarlığı ilə fərqlənən kollektivi gələcəkdə də Azərbaycanın neft-qaz sənayesinin perspektiv inkişafı naminə səylərini əsirgəməyəcək, ölkəmizin dünya iqtisadiyyatına inteqrasiyasına layiqincə xidmət edəcəkdir.

Bir daha müəssisənizin bütün kollektivinə ən xoş arzularımı çatdırır, hər birinizə möhkəm cansağlığı, firavan həyat və işlərinizdə uğurlar diləyirəm.

İlham ƏLİYEV,

Azərbaycan Respublikasının Prezidenti

Bakı şəhəri, 23 dekabr 2008-ci il.

Azərbaycan.-2008.-25 dekabr.-S.1.