Azərbaycan Prezidenti İlham Əliyev "İnter Qlass" ASC-nin şüşə məmulatları zavodunun açılışında iştirak etmişdir

Dekabrın 24-də paytaxtın Qaradağ rayonu ərazisində "İnter Qlass" Açıq Səhmdar Cəmiyyətinin şüşə məmulatları zavodu istifadəyə verilmişdir.

Azərbaycan Prezidenti İlham Əliyev açılış mərasimində iştirak etmişdir.

Dövlətimizin başçısı müasir tələblərə cavab verən zavodun baş planı ilə tanış oldu. Məlumat verildi ki, 2004-cü ilin aprelində İqtisadi İnkişaf Nazirliyi tərəfindən "Qaradağ Rezin Qarışığı" ASC-nin səhmlərinin satışı üzrə keçirilən müsabiqədə "Xəzər Menecment Sistem" MMC qalib gəlmişdir. Bundan sonra müəssisənin istehsal istiqaməti dəyişdirilərək, şüşə məmulatları istehsal olunması üçün lazımi avadanlıq alınmış, əsaslı tikinti və yenidənqurma işləri aparılmışdır. 2004-2008-ci illərdə bütün infrastruktur və kommunikasiya sistemi yenidən qurulmuş, zavoddaxili avtomobil yolları çəkilmiş, dəmir yolu xətti tam bərpa edilmişdir. Müəssisəyə 52 milyon ABŞ dolları sərmayə qoyulmuşdur.

Prezident İlham Əliyev düyməni basaraq müəssisəni işə saldı.

Bildirildi ki, İtaliyadan gətirilmiş ən müasir avadanlığın quraşdırıldığı müəssisə ildə 100 milyon ədəd şüşə məmulatı istehsal etməyə qadirdir. Hazırda 250 işçinin çalışdığı zavodda sutkada 270 min ədəd şüşə məmulatının buraxılması nəzərdə tutulmuşdur.

Əsas xammal Gəncə və Qazaxdan, habelə Ukrayna və Rusiyadan gətirilir. Daxili tələbat ödənildikdən sonra məhsul Rusiya və Gürcüstana da ixrac olunacaqdır.

Prezident İlham Əliyev müəssisənin idarəetmə mərkəzi, istehsal sahələri ilə tanış oldu, istehsal prosesini, hazır məhsulun qablaşdırılması prosesini izlədi.

Dövlətimizin başçısı görülən işləri yüksək qiymətləndirərək, yeni istehsal sahələrinin fəaliyyətə başlamasının iqtisadi baxımdan əhəmiyyətli olduğunu bildirdi, müəssisənin kollektivinə uğurlar arzuladı.

AzərTAc

Azərbaycan.-2008.-25 dekabr.-S.3.