Konstitusiya Məhkəməsi "Azərbaycan Respublikası Konstitusiyasına əlavələr və dəyişikliklər edilməsi haqqında" Referendum Aktı layihəsinə rəy vermişdir

AzərTAc xəbər verir ki, dekabrın 24-də Azərbaycan Respublikası Konstitusiya Məhkəməsi Plenumunun iclası keçirilmişdir.

Konstitusiya Məhkəməsinin sədri Fərhad Abdullayev iclası açaraq bildirdi ki, bu gün xüsusi Konstitusiya icraatı qaydasında Azərbaycan Respublikası Milli Məclisi tərəfindən Azərbaycan Respublikası Konstitusiyasının 153-cü maddəsinin tələbinə əsasən Azərbaycan Respublikası Konstitusiya Məhkəməsinin rəyinin alınması üçün təqdim olunmuş "Azərbaycan Respublikası Konstitusiyasına əlavələr və dəyişikliklər edilməsi haqqında" Referendum Aktının layihəsi ilə bağlı məsələyə baxılır.

Məhkəmə iclasının katibi İ.İsmayılov bildirdi ki, iclasda xüsusi Konstitusiya icraatı üzrə maraqlı subyekt qismində Azərbaycan Respublikası Milli Məclisi Aparatının rəhbəri Səfa Mirzəyev, parlamentin Hüquq siyasəti və dövlət quruculuğu məsələləri daimi komissiyasının sədri Əli Hüseynov, İnsan hüquqları daimi komissiyasının sədri Rəbiyyət Aslanova iştirak edirlər.

Konstitusiya Məhkəməsinin sədri Fərhad Abdullayev məhkəmənin tərkibini elan etdi, "Azərbaycan Respublikasının Konstitusiya Məhkəməsi haqqında" Qanunun 43-cü maddəsində nəzərdə tutulmuş maraqlı subyektlərin qanuni nümayəndələrinin hüquq və vəzifələrini izah etdi. Bildirdi ki, qanuna əsasən, onlar Konstitusiya Məhkəməsi Plenumunun iclasında iştirak və çıxış edə, sübutlar və digər materialları təqdim edə, vəsatət və təkliflər verə, onlara ünvanlanan sualları cavablandıra, şahid və ekspertlərin dəvət olunmasını xahiş edə və yekun söz söyləyə bilərlər.

Sonra F.Abdullayev məruzəçi hakimlərə söz verdi.

Konstitusiya Məhkəməsinin hakimləri F.Babayev və E.Məmmədov məruzə etdilər.

Əvvəlcə Azərbaycan Respublikası Konstitusiyasına əlavə və dəyişikliklər edilməsi qaydaları haqqında məlumat verildi. Bildirildi ki, 1995-ci ildə ümumxalq səsverməsi ilə Konstitusiyanın qəbulundan sonrakı dövrdə Azərbaycanın iqtisadi inkişafı, siyasi həyatında baş verən müsbət dəyişikliklər və beynəlxalq əlaqələrinin daha da genişlənməsi Konstitusiyaya müəyyən dəyişikliklərin edilməsi zərurətini ortaya çıxarmışdı. 2002-ci ildə Azərbaycan Konstitusiyasına edilmiş dəyişikliklər də bu zərurətdən yaranmışdı.

Son illər Azərbaycanın iqtisadi inkişafı, sürətlə gedən siyasi islahatlar, demokratik inkişaf istiqamətində əldə edilmiş nailiyyətlər Konstitusiyanı təkmilləşdirmək zərurətini yenidən meydana gətirmişdir. Son vaxtlar Konstitusiyaya əlavə və dəyişikliklər edilməsi haqqında vətəndaşlar və ziyalılar tərəfindən irəli sürülən təkliflər, bununla bağlı cəmiyyətdə gedən müzakirələr, nəhayət, Milli Məclisin deputatlarının təklif etdikləri əlavə və dəyişikliklər bunun bariz nümunəsidir. Milli Məclisin Hüquq siyasəti və dövlət quruculuğu, İnsan hüquqları daimi komissiyalarının birgə iclasında Konstitusiyaya əlavələr və dəyişikliklər edilməsi məsələsi geniş müzakirə olunmuş və parlamentin gündəliyinə çıxarılmışdır.

Milli Məclisdə müzakirələr zamanı təklif olunmuş əlavə və dəyişikliklərin vətəndaşların hüquq və azadlıqlarının təminatının genişləndirilməsinə, milli qanunvericiliyin daha da möhkəmləndirilməsinə xidmət edəcəyi əsas götürülmüşdür.

Milli Məclisin "Azərbaycan Respublikası Konstitusiyasına əlavələr və dəyişikliklər edilməsi haqqında" Referendum Aktı layihəsinin Konstitusiya Məhkəməsinə göndərilməsi barədə 2008-ci il 19 dekabr tarixli qərarı ilə bağlı hüquqi məqamlara toxunuldu. Bildirildi ki, Konstitusiyanın 153-cü maddəsi Milli Məclisə hüquq verir ki, belə dəyişiklikləri təklif etsin.

Diqqətə çatdırıldı ki, referendum keçirilməsinə dair hüquqi əsaslar Konstitusiyanın xalq hakimiyyətinə dair müddəalarında öz əksini tapmışdır. Azərbaycan Respublikası Konstitusiyasının qəbul edilməsi və ona dəyişikliklərin edilməsi yalnız referendum yolu ilə mümkündür. Konstitusiyanın mətnində dəyişiklikləri Milli Məclis və ya Azərbaycan Prezidenti təklif etdikdə bununla bağlı əvvəlcədən Konstitusiya Məhkəməsinin rəyi alınmalıdır. Konstitusiya Məhkəməsi təklif olunan dəyişikliklərin Azərbaycan Respublikasının Konstitusiyasının 155-ci maddəsinin tələblərinə uyğunluğu haqqında əsaslandırılmış rəy qəbul etməlidir.

Bildirildi ki, Milli Məclisin təqdim etdiyi Referendum Aktı layihəsindəki təkliflər hüquqi nöqteyi-nəzərdən Konstitusiyanın bir çox normalarını təkmilləşdirmək məqsədi daşımaqla, insan hüquq və azadlıqlarının daha səmərəli müdafiə və təmin olunmasına, ali dövlət hakimiyyəti orqanlarının, habelə məhkəmə hakimiyyəti orqanlarının, bələdiyyələrin işinin təkmilləşdirilməsinə istiqamətlənmişdir.

Sonra Milli Məclisin Hüquq siyasəti və dövlət quruculuğu məsələləri daimi komissiyasının sədri Əli Hüseynov çıxış edərək Milli Məclis tərəfindən təqdim olunmuş "Azərbaycan Respublikası Konstitusiyasına əlavələr və dəyişikliklər edilməsi haqqında" Referendum Aktının layihəsində əksini tapan təkliflər haqqında məlumat verdi.

Bildirildi ki, təklif olunan əlavələr və dəyişikliklər insan hüquqları ilə bağlı təminatları daha da genişləndirir, dəqiqləşdirir və beynəlxalq müqavilələrdə əksini tapmış təminatları özündə əks etdirir.

Konstitusiyanın "Dövlət hakimiyyəti" bölməsinə təklif olunan əlavələr və dəyişikliklər ilk növbədə Azərbaycan dövlətinin konstitusion əsaslarının daha da möhkəmləndirilməsi zərurətindən irəli gəlir. Bütövlükdə, əlavələr və dəyişikliklər demokratik, hüquqi dövlətdə hakimiyyətin bölünməsi prinsipinə tam uyğundur.

Komissiya sədri məhkəmənin hakimlərinin suallarını ətraflı cavablandırdı.

Məhkəmə araşdırmaları bitdikdən sonra Konstitusiya Məhkəməsinin sədri Fərhad Abdullayev "Azərbaycan Respublikası Milli Məclisinin Azərbaycan Respublikasının Konstitusiyasında dəyişikliklər edilməsi haqqında təkliflərinə rəy verilməsi barədə" Azərbaycan Respublikası Konstitusiya Məhkəməsinin Plenumunun Qərarını oxudu.

(Konstitusiya Məhkəməsinin Qərarı qəzetin bugünkü nömrəsində dərc olunur).

***

Bununla da Konstitusiya Məhkəməsi Plenumunun iclası bağlı elan edildi.

Azərbaycan.-2008.-25 dekabr.-S.5-6.