Ədliyyə Nazirliyində kollegiya iclası keçirilmişdir

AzərTAc xəbər verir ki, Ədliyyə Nazirliyinin dekabrın 24-də keçirilmiş kollegiya iclasında ulu öndər Heydər Əliyevin siyasi kursunun dövlət başçısı İlham Əliyev tərəfindən uğurla davam etdirilməsi, iqtisadiyyatın sürətli inkişafına görə ölkəmizin lider dövlətə çevrilməsi, demokratik hüquqi dövlət quruculuğunda, xüsusilə məhkəmə-hüquq islahatlarının nailiyyətləri diqqətə çatdırılmışdır.

Ölkə Prezidentinin ədliyyə sisteminə göstərdiyi yüksək diqqət və qayğısı, Azərbaycan ədliyyəsinin 90 illik yubileyi ərəfəsində nazirliyin yeni embleminin və Ədliyyə Akademiyasının nizamnaməsinin təsdiq edilməsi, işçilərin maddi təminatının yaxşılaşdırılması, bir qrup ədliyyə işçisinin yüksək dövlət təltiflərinə və fəxri adlara layiq bilinməsi vurğulanaraq, "Tərəqqi" və "Hərbi xidmətlərə görə" medalları ilə təltif edilmiş ədliyyə işçilərinə nazir Fikrət Məmmədov tərəfindən bu yüksək dövlət mükafatları təqdim edilmişdir.

Ədliyyə orqanlarında qulluqda fərqləndiklərinə görə təltif olunmuş əməkdaşlar çıxışlarında onlara göstərilən yüksək etimadı bundan sonra da doğruldacaqlarını söyləmiş, ölkəmizin başçısına dərin minnətdarlıqlarını və doğum günü münasibətilə səmimi təbriklərini ifadə etmişlər.

İclasda, həmçinin ümumbəşəri sosial bəla olan korrupsiya ilə mübarizə sahəsində təsirli tədbirlərdən danışılmış, ölkə Prezidentinin 2007-ci il 28 iyul tarixli Sərəncamı ilə təsdiq edilmiş Şəffaflığın artırılması və korrupsiyaya qarşı mübarizə üzrə Milli Strategiyanın ədliyyə orqanlarında icrası üzrə 2009-cu ildə görüləcək antikkorupsiya tədbirləri geniş müzakirə olunmuşdur.

Bununla yanaşı, istintaq zamanı müasir texnologiyaların köməyi ilə konkret cinayət işinin eksperimental elektron versiyasının ilk dəfə təcrübədə tətbiqinin müsbət nəticələri müzakirə olunmuş, onun həm məhkəmə prosesinin tərəfləri, həm də ictimaiyyət tərəfindən alqışlandığı bildirilmiş və bu praktikanın gələcəkdə geniş istifadə olunması məsələsinə baxılmışdır.

Eyni zamanda, qeyri-kommersiya hüquqi şəxslərin dövlət qeydiyyatı prosedurunu ətraflı tənzimləyən, müsbət təcrübəni özündə əks etdirməklə hazırlanmış yeni Qaydalar müzakirə olunaraq bəyənilmiş, onların qeydiyyat işinin daha səmərəli qurulmasına və səviyyəsinin yükəldilməsinə xidmət edəcəyi vurğulanmışdır.

İclasda digər məsələlərə baxılmış, 50-yə yaxın qeyri-kommersiya təşkilatı, həmçinin Azərbaycan Milli Demokrat Partiyası dövlət qeydiyyatına alınmışdır.

Azərbaycan.-2008.-25 dekabr.-S.6.