Astanada Xəzərin statusuna dair Konvensiyanın hazırlanması üzrə xüsusi işçi qrupunun 24-cü iclası başa çatmışdır

Azərbaycan xarici işlər nazirinin müavini Xələf Xələfovun rəhbərliyi ilə nümayəndə heyətinin də qatıldığı tədbirdə Qazaxıstan, Rusiya, Türkmənistan və İranın nümayəndələri iştirak etmişlər.

Görüşün birinci günü Qazaxıstanın xarici işlər naziri Marat Tajin iştirakçıları salamlayaraq bildirmişdir ki, iki gün ərzində Xəzərin hüquqi statusuna dair hazırlanan Konvensiyanın maddələri üzərində iş davam etdiriləcək və mən əminəm ki, bir sıra irəliləyişlər əldə olunacaqdır.

Görüşün yekunları ilə əlaqədar keçirilən mətbuat konfransında nümayəndə heyətlərinin rəhbərləri iştirak etmişlər.

Xələf Xələfov AzərTAc-ın müxbirinə demişdir: "Məlum olduğu kimi, Xəzərin statusu ilə əlaqədar Azərbaycan, Qazaxıstan və Rusiya arasında ikitərəfli və üçtərəfli sənədlər imzalanmışdır və bu, Konvensiyanın hazırlanmasında baza rolunu oynaya bilər. Biz Türkmənistan və İranla bu istiqamətdə danışıqlar aparırıq və elə bilirəm ki, bu, öz bəhrəsini verəcəkdir.

Bu görüşdə Konvensiya üzərində iş davam etdirilmişdir, bəzi məsələlərdə prinsipial razılıq əldə edilmişdir, elə məsələlər var ki, müzakirə olunur.

Xəzərin statusu ilə əlaqədar Konvensiya layihəsində bir çox məsələlər - sərhədlərin müəyyən edilməsi, Xəzərin ehtiyatlarından istifadə olunması, dənizin dibinin bölünməsi, enerji ehtiyatlarının nəqli, təhlükəsizlik, su səthindən istifadə olunması, balıqçılıq məsələləri, dənizin ekoloji vəziyyəti və bir sıra digər problemlərin həlli bütün Xəzəryanı dövlətlər üçün eyni dərəcədə vacibdir. Bütün dövlətlər dənizin statusunun həll olunmasında maraqlıdır və bu dövlətlərin hamısı Xəzəri sülh, dostluq, əməkdaşlıq, əmin-amanlıq dənizi kimi görür və biz bu istiqamətdə işləyirik".

Görüşün yekunları ilə əlaqədar rəsmi sənəd qəbul edilmişdir.

Xəzərin statusuna dair Konvensiyanın hazırlanması üzrə xüsusi işçi qrupunun 25-ci iclası Moskvada keçiriləcəkdir.

Qulu KƏNGƏRLİ,

AzərTAc-ın xüsusi müxbiri

Astana

Azərbaycan.-2008.-25 dekabr.-S.6.