Bakıda Mərkəzi gömrük hospitalı istifadəyə verilmişdir

Dekabrın 25-də Bakıda Mərkəzi gömrük hospitalı istifadəyə verilmişdir. Azərbaycan Prezidenti İlham Əliyev mərasimdə iştirak etmişdir.

Bu hospital Dövlət Gömrük Komitəsinin strukturlarına əlavə edilməsi haqqında Azərbaycan Prezidentinin 2004-cü ildə imzaladığı fərmana uyğun olaraq gömrük orqanlarına xidmətə qəbul olunan əməkdaşların sağlamlıq vəziyyətinin müəyyən edilməsi, gömrük əməkdaşlarının tibbi xidmətə ehtiyaclarının ödənilməsi və tibbi təminatının yaxşılaşdırılması məqsədilə inşa edilən ən müasir sağlamlıq ocağıdır.

Dövlət Gömrük Komitəsinin sədri Aydın Əliyev mərasimə gələn Prezident İlham Əliyevə raport verdi.

Dövlətimizin başçısı əvvəlcə hospitalın foyesində ulu öndər Heydər Əliyevin müxtəlif dövrlərdə səhiyyə işçiləri ilə görüşlərini əks etdirən fotoşəkillərdən ibarət stendə baxdı.

Prezidentə məlumat verildi ki, Mərkəzi gömrük hospitalında quraşdırılmış avadanlıq əsasən Almaniyanın və digər Avropa ölkələrinin istehsalıdır. Mərkəzdə ilk dəfə olaraq dünyada yeni tikilən tibb ocaqlarında istifadə edilən xüsusi havalandırma sistemi tətbiq olunmuşdur. Başqa sözlə, burada hava üç dəfə təmizləndikdən sonra binaya verilir. Əməliyyat otağında, laboratoriyalarda, diaqnostika mərkəzində, intensiv terapiya şöbələrində H12 hepoboksid ultra filtr tətbiq olunmuşdur. Yeniliklərdən biri də pnevmatik ötürücü sistemin quraşdırılmasıdır. Bu sistemin köməyi ilə həm xəstələrə qulluq göstərilir, həm də xəstələrin laborator analizlərinin təcili, 10-15 saniyə ərzində göndərilməsi təmin olunur. Hospitaldakı xüsusi proqram təminatı əməliyyatlar zamanı dünyanın istənilən ölkəsinin qabaqcıl tibb mərkəzləri ilə birbaşa telekörpü yaratmağa imkan verir. Yeni tibb ocağı üçün "Mercedes" markalı 5 ədəd avtomobil, səyyar hospital alınmışdır. Onun köməyi ilə səyyar vəziyyətdə xəstələrə istənilən tibbi yardım göstərmək mümkündür.

Prezident İlham Əliyev hospitalın ayrı-ayrı şöbələri ilə tanış oldu, əməliyyat otaqlarındakı tibbi-texniki avadanlıqla maraqlandı. Hər bir palata telefon rabitəsi ilə təmin olunmuşdur. Ayrı-ayrı xidmət sahələrindəki, xüsusilə də, reanimasiya şöbəsindəki avadanlıq müasirliyi və yüksək keyfiyyəti ilə diqqəti cəlb edirdi.

Dövlətimizin başçısı pnevmatik ötürücü sistemin işi ilə də tanış oldu.

Mərkəzin bütün xidmət sahələrinin ən müasir standartlara cavab verdiyi, əməkdaşların tibbi reabilitasiyası üçün burada bütün şəraitin olduğu qeyd olundu.

Prezident İlham Əliyev tibb işçilərini təbrik etdi, onlara işlərində müvəffəqiyyətlər arzuladı. Müasir sağlamlıq ocağının inşasına görə dövlət başçısına minnətdarlığını bildirən Dövlət Gömrük Komitəsinin sədri Aydın Əliyev hospitalın tikilib istifadəyə verilməsini gömrük orqanları əməkdaşlarına göstərilən yüksək diqqətin nümunəsi kimi dəyərləndirdi.

Mərasimdən xatirə olaraq dövlət başçısına hədiyyə təqdim edildi.

Prezident İlham Əliyev mərkəzin tibbi maşınlarına baxdı, səyyar hospitalda quraşdırılmış avadanlıqla da tanış oldu.

AzərTAc

Azərbaycan.-2008.-26 dekabr.-S.3.