Ucarda Azərbaycan Kənd Bələdiyyələri Milli Assosiasiyasının ümumi yığıncağı keçirilmişdir

AzərTAc xəbər verir ki, dekabrın 26-da Ucar rayonunun Qazıqumlaq kəndində Azərbaycan Kənd Bələdiyyələri Milli Assosiasiyasının ümumi yığıncağı keçirilmişdir.

Əvvəlcə Azərbaycanda yerli özinüidarəetmə orqanlarının fəaliyyətinə həsr olunmuş sənədli film nümayiş etdirilmişdir.

Assosiasiyanın son bir ildə gördüyü işlər barədə qurumun sədri Şəmistan Yusifovun, nəzarət-təftiş komissiyasının hesabat məruzələri dinlənilib müzakirə olunmuşdur.

Qeyd edilmişdir ki, assosiasiya fəaliyyətini yerli əhəmiyyətli sosial məsələlərin həllində qabaqcıl bələdiyyə təcrübəsinin öyrənilib yayılması və vətəndaş cəmiyyətinin qurulmasında, demokratik prinsiplərin tətbiqində bələdiyyələrin rolunun artırılması istiqamətlərində qurmuşdur. Qabaqcıl təcrübənin öyrənilməsi üçün məqsədyönlü işlər aparılmış, "Bir bələdiyyəyə azı bir layihə" təşəbbüsü çərçivəsində həyata keçirilən bütün layihələr barədə məlumat toplanmış, təhlillər nəticəsində layihələri reallaşdıran bələdiyyələr müəyyənləşdirilmişdir. Əldə olunan nəticələr bunu söyləməyə imkan verir ki, bu gün bələdiyyələrimiz yerlərdə Prezident İlham Əliyevin rəhbərliyi ilə həyata keçirilən sosial- iqtisadi məsələlərin həllində fəal iştirak edir, kommunal xidmətlərin həyata keçirilməsində, küçə və parkların abadlaşdırılmasında, vətəndaşları narahat edən bir sıra yerli əhəmiyyətli problemlərin aradan qaldırılmasında fəallıq göstərirlər. Bu il aprelin 5-də Göyçayda keçirilmiş "dəyirmi masa" bir daha göstərmişdir ki, artıq bələdiyyələr idarəetmədə öz yerini tutmuş, həyati məsələləri həll edə bilən, ictimai fikri formalaşdıran bir qüvvəyə çevrilmişdir. Aprelin 16-da Bakıda təşkil edilmiş "Bələdiyyə: yeni forma, yeni məzmun" adlı ümumrespublika konfransı da yerli özünüidarəetmə orqanlarının həyatında mühüm hadisə olmuşdur. Konfransda Yevlax, Şirvan, Xırdalan, Xaçmaz, Yasamal, Qaraçuxur, Tovuz, Çaxırlı və Cəyirli bələdiyyələrinin iqtisadi, sosial və ekoloji sahələrdə topladıqları müsbət iş təcrübələri müzakirə olunmuşdur.

Məlumat verilmişdir ki, milli assosiasiyalar konfransda toplanmış qabaqcıl təcrübə əsasında yeddi yeni təşəbbüslə çıxış etmişlər və onların hamısı iştirakçılar tərəfindən bəyənilmiş, yayılması barədə qərar qəbul edilmişdir. "Seçicilərimizi eşidək", "Bələdiyyə günü", "Abad məhəllə", "Abad kənd", "Bizim ünvan", "Sadə idman qurğularına bələdiyyə qayğısı", "Bir bələdiyyəyə azı bir layihə" bələdiyyələrin yerli əhəmiyyətli məsələlərin həllində fəal iştirakının bariz nümunələridir. Təkcə "Bir bələdiyyəyə azı bir layihə" çərçivəsində kənd bələdiyyələri yaşayış məntəqələrinin sosial-iqtisadi inkişafına dair ümumi dəyəri 11 milyon 260 min manat olan 2739 layihə reallaşdırmışlar.

İyunun 25-də Yevlaxda bələdiyyə sədrlərinin "Vətəndaş cəmiyyətinin qurulmasında və demokratik prinsiplərin tətbiqində bələdiyyələrin qarşısında duran vəzifələr" mövzusunda keçirilmiş II Ümumrespublika toplantısının yekunları, tədbirdə Prezidentin İcra Aparatının rəhbəri, akademik Ramiz Mehdiyevin dərin məzmunlu çıxışı da xatırladılmışdır.

İstər məruzədə, istərsə də ayrı-ayrı çıxışlarda bələdiyyələrin fəaliyyətindəki uğurlarla yanaşı, çatışmazlıqlar, nöqsanlar da sadalanmış, onların aradan qaldırılması ilə bağlı təkliflər verilmişdir. Təklif edilmişdir ki, bələdiyyə büdcəsinin sabitliyi üçün müvafiq müəssisə və xidmət sahələrinin, əlavə gəlir mənbələrinin yaradılması vacibdir.

Bələdiyyələrin həyatında mühüm yeniliklərdən bəhs edən natiqlər ölkə başçısının bələdiyyə torpaqlarının torpaq hərracları və ya müsabiqələri vasitəsilə verilməsinin tənzimlənməsi ilə əlaqədar 2008-ci il 10 dekabr tarixli fərmanının xüsusi əhəmiyyət daşıdığını bildirmişlər. Qeyd olunmuşdur ki, həyata keçiriləcək dəyişikliklər bələdiyyə torpaqlarının alqı-satqısında şəffaflığın təmin edilməsinə, bu sahədə mənfi halların aradan qaldırılmasına, o cümlədən bələdiyyələrin cəmiyyətə yalnız torpaq satışı ilə məşğul olan qurum kimi təqdim edilməsinin qarşısının alınmasına imkan verəcəkdir.

Həmçinin qeyd edilmişdir ki, torpaqların özgəninkiləşdirilməsi hesabına yerli büdcənin formalaşmasına yeganə gəlir mənbəyi kimi baxmaq düzgün deyildir. Artıq elə tədbirlər görülməlidir ki, bələdiyyələrin dayanıqlı gəlir mənbələri yaradılsın.

Təəssüflə vurğulanmışdır ki, ölkədə bələdiyyə müəssisələrinin yaradılması işi çox zəifdir. Əslində, bir neçə bələdiyyə istisna olunmaqla, qalan yerli özünüidarəetmə orqanları bu sahədə heç bir iş görməmişlər.

Qarşıda duran vəzifələrdən də bəhs edilmişdir. Natiqlər potensialı az olan bələdiyyələrin birləşdirilməsinin müsbət nəticələr verəcəyini söyləmiş və xüsusi qeyd edilmişdir ki, həmin qurumların ləğv olunması və ya birləşdirilməsi onların özündən və vətəndaşların təşəbbüsündən asılıdır. Sadəcə, müvafiq bələdiyyələrdə və onların seçiciləri arasında tarazlaşdırılmış izahat işləri aparılmalıdı. Bu işdə birləşmənin gətirəcəyi faydaya inandırma, ümumiyyətlə isə, maarifləndirmə çox vacibdir.

Ölkəmizdə gələn il keçiriləcək bələdiyyə seçkiləri ilə əlaqədar ətraflı fikir mübadiləsi aparılmışdır.

Tədbirdə Prezidentin İcra Aparatının regional idarəetmə və yerli özünüidarəetmə orqanları ilə iş şöbəsinin bələdiyyələrlə iş sektorunun baş məsləhətçisi Rüfət Əliyev, respublika Ədiliyyə Nazirliyinin bələdiyyələrlə iş mərkəzinin baş məsləhətçisi Hafiz Əliyev çıxış etmişlər.

Yığıncaqda assosiasiyanın nəzarət-təftiş komissiyasının hesabatı, habelə 2009-cu il üçün büdcə layihəsi təsdiq edilmişdir.

Azərbaycan.-2008.-27 dekabr.-S.4.