Azərbaycan diasporu Murmansk vilayətində ən fəal diasporlardan biridir

Ümumrusiya Azərbaycan Konqresinin (ÜAK) Murmansk regional bölməsinin mətbuat xidmətindən AzərTAc-a bildirmişlər ki, vilayət hökumətinin İctimai Əlaqələr İdarəsinin rəisi Svetlana Parşkova Azərbaycan xalqını Dünya Azərbaycanlılarının Həmrəyliyi Günü münasibətilə təbrik edərək ona xoşbəxtlik və uğurlar arzulamışdır: "Sərt iqlimi olan bu diyarı inkişaf etdirmək üçün müxtəlif xalqların nümayəndələri onilliklər ərzində vilayətə gəlmişlər. Əzəldən burada mehriban qonşuluq, qarşılıqlı hörmət və bir-birinə kömək ənənələri yaranmışdır. Mürəkkəb şəraitdə yaşadığımız üçün qarşılıqlı dəstəksiz keçinməyimiz mümkün deyildir. Son illərdə vilayət hökumətinin vəzifəsi belə ab-havanı saxlaya bilməkdir. Ona görə də Kola yarımadasına gələn bütün insanlara bu hissləri və münasibətləri aşılamağa çalışırıq. Hələlik buna nail oluruq.

Azərbaycan diasporu vilayətdə ən fəal diasporlardan biridir. Bu, ən müxtəlif sahələrdə özünü büruzə verir. Murmansk hökumətində Millətlərin İşləri üzrə Məsləhət Şurası fəaliyyət göstərir. ÜAK-ın Murmansk regional bölməsinin sədri Afil Hüseynov və RF Prezidenti yanında Şimal-Qərb Akademiyasının məzunu, jurnalist Əlihüseyn Şükürov həmin Şuranın üzvləridir. Burada biz ümumi işlərimizi, tədbirlərimizi, konsertlərimizi, digər aksiyalarımızı razılaşdırırıq. Azərbaycan diasporu xeyriyyə işlərində yaxından iştirak edir. Onun üzvləri əlil uşaqların anaları klubunun, pensiyaçıların, veteranların problemlərinin həllinə kömək edir. Biz çox şadıq ki, aramızda Kola yarımadasının bütün xalqları ilə sülh və əmin-amanlıq şəraitində yaşayıb öz zəhməti ilə xariqələr yaradan insanlar vardır".

Svetlana Parşkova əlavə etmişdir ki, Murmansk vilayətinin qubernatoru Yuri Yevdokimov da Dünya Azərbaycanlılarının Həmrəyliyi Günü və Yeni il bayramı münasibətilə Azərbaycan diasporuna təbrik məktubu göndərmişdir.

Azərbaycan.-2008.-30 dekabr.-S.9.