Azərbaycan Respublikasında dövriyyəyə buraxılmış dövlət özəlləşdirmə paylarından (çeklərindən) özəlləşdirmə prosesində istifadənin təmin olunması sahəsində əlavə tədbirlər haqqında

Azərbaycan Respublikasında dövriyyəyə buraxılmış dövlət özəlləşdirmə paylarından (çeklərindən) özəlləşdirmə prosesində daha geniş istifadənin təmin olunması məqsədi ilə qərara alıram:

1. Azərbaycan Respublikası Prezidentinin 2000-ci il 10 avqust tarixli 383 nömrəli fərmanı (Azərbaycan Respublikası Qanunvericilik Toplusu, 2000-ci il, №8, (III kitab), maddə 606; 2001-ci il, №10, maddə 640; 2002-ci il, №4, (II kitab), maddə 189, №10, maddə 592; 2003-cü il, №10, maddələr 566, 569; 2004-cü il, №6, maddə 432; 2005-ci il, №5, maddələr 400, 403, 405; 2006-cı il, №7, maddə 590, №8, maddə 678, №9, maddə 742) ilə təsdiq edilmiş "Azərbaycan Respublikasında Dövlət əmlakının özəlləşdirilməsinin II Dövlət Proqramı"nın 1.5-ci bəndində və 10.4-cü bəndinin ikinci abzasında "2010-cu" rəqəmi "2011-ci" rəqəmi ilə əvəz edilsin.

2. "Dövlət əmlakının özəlləşdirilməsi haqqında" Azərbaycan Respublikası Qanununun icrası ilə bağlı əlavə tədbirlər barədə" Azərbaycan Respublikası Prezidentinin 2000-ci il 23 dekabr tarixli 432 nömrəli fərmanı (Azərbaycan Respublikasının Qanunvericilik Toplusu, 2000-ci il, №12, maddə 844; 2001-ci il, №7, maddə 470, №10, maddə 640; 2002-ci il, №12, maddə 725; 2003-cü il, №9, maddə 475, №10, maddələr 569, 585; 2004-cü il, №9, maddə 678; 2005-ci il, №5, maddə 400; 2006-cı il, №7, maddə 590; 2007-ci il, №6, maddə 599) ilə təsdiq edilmiş "Dövlət özəlləşdirmə opsionları haqqında Əsasnamə"nin 12-ci bəndində "2010-cu" rəqəmi "2011-ci" rəqəmi ilə əvəz edilsin.

3. "Azərbaycan Respublikasında dövriyyəyə buraxılmış dövlət özəlləşdirmə paylarından (çeklərindən) istifadənin müddətinin uzadılması haqqında" Azərbaycan Respublikası Prezidentinin 2004-cü il 11 iyun tarixli 75 nömrəli fərmanının (Azərbaycan Respublikasının Qanunvericilik Toplusu, 2004-cü il, №6, maddə 432; 2006-cı il, №7, maddə 590) 1.1-ci bəndində "2010-cu" rəqəmi "2011-ci" rəqəmi ilə əvəz edilsin.

4. Azərbaycan Respublikasının Əmlak Məsələləri Dövlət Komitəsinə tapşırılsın:

4.1. dövriyyəyə buraxılmış dövlət özəlləşdirmə paylarının (çeklərinin) dövlət əmlakının özəlləşdirilməsində daha geniş istifadəsi üçün zəruri tədbirlərin görülməsini təmin etsin;

4.2. dövriyyədə olan dövlət özəlləşdirmə paylarının (çeklərinin) dövlət əmlakının özəlləşdirilməsi zamanı tədiyə vasitəsi kimi istifadə müddəti başa çatdıqdan sonra özəlləşdirmə prosesində dövlət müəssisələrinin əmək kollektivləri üzvlərinə və onlara bərabər tutulan şəxslərə verilən güzəştlərin həyata keçirilməsinin, habelə dövlət əmlakının satışının yeni mexanizmlərinin müəyyən edilməsi ilə bağlı təkliflərini üç ay müddətində Azərbaycan Respublikası Prezidentinə təqdim etsin.

5. Azərbaycan Respublikasının Nazirlər Kabinetinə tapşırılsın ki, bir ay müddətində:

5.1. qüvvədə olan normativ hüquqi aktların bu fərmana uyğunlaşdırılması barədə təkliflərini hazırlayıb Azərbaycan Respublikasının Prezidentinə təqdim etsin;

5.2. Nazirlər Kabinetinin və müvafiq mərkəzi icra hakimiyyəti orqanlarının normativ hüquqi aktlarının bu fərmana uyğunlaşdırılmasını təmin etsin və bu barədə Azərbaycan Respublikasının Prezidentinə məlumat versin;

5.3. Bu fərmandan irəli gələn digər məsələləri həll etsin.

İlham ƏLİYEV,

Azərbaycan Respublikasının Prezidenti

Bakı şəhəri, 23 dekabr 2009-cu il

Azərbaycan.- 2009.- 24 dekabr.- S. 4.