Bakıda Azərbaycan-NATO beynəlxalq məktəbinin qış sessiyası keçirilir

Dekabrın 7-də Bakıda Azərbaycan-NATO Beynəlxalq Məktəbinin (NİSA) qış sessiyası öz işinə başlamışdır.

NİSA-nın icraçı direktoru Mikayıl Yusifov bildirmişdir ki, "Kiber təhlükəsizlik" mövzusunda keçirilən sessiyada kiber hədələrinin təşkilatı və fərdi səviyyəsi, sərhədsiz dünyada milli təhlükəsizlik, NATO-nun kiber siyasəti və informasiya təhlükəsizliyi, Avropa İttifaqının təcrübəsi və digər məsələlər müzakirə olunacaqdır.

Sessiyada çıxış edən Azərbaycanın xarici işlər nazirinin müavini Araz Əzimov müasir dünyada kiber təhlükəsizlik məsələlərinə daha çox diqqət ayrılmasının vacibliyini vurğulamışdır.

Kiber təhdidlərin müəyyənləşdirilməsi və onların qarşısının alınmasının əhəmiyyəti barədə danışan nazir müavini qeyd etmişdir ki, NATO kimi beynəlxalq təşkilatların kiber təhlükəsizliyinə diqqət yetirməsi də bu təhdidin necə böyük rola malik olduğunu göstərir.

A.Əzimov bildirmişdir ki, Azərbaycan NATO ilə imzalanmış Fərdi Tərəfdaşlıq üzrə Fəaliyyət Planının (İPAP) növbəti ikiillik mərhələsinə başlamağa hazırlaşır. Bu, İPAP-ın 3-cü ikiillik mərhələsidir.

İPAP çərçivəsində nəzərdə tutulmuş planların 99 faizinin icra olunduğunu vurğulayan A.Əzimov qeyd etmişdir ki, növbəti ikiillik mərhələnin 2010-cu ilin iyununda başlanacağı gözlənilir. Bununla bağlı aprel-iyun ayları ərəfəsində Azərbaycan hökuməti və NATO tərəfindən ikiillik plan təsdiq olunacaqdır.

Sessiyada yerli və xarici tələbələr, xarici ölkələrin Azərbaycandakı səfirləri, tədqiqatçılar, hökumət və qeyri-hökumət təşkilatlarının nümayəndələri iştirak edirlər.

Azərbaycan Xarici İşlər Nazirliyinin və NATO-nun İctimai Diplomatiya İdarəsinin dəstəyi ilə keçirilən sessiya dekabrın 13-dək davam edəcəkdir.

AzərTAc

Azərbaycan.- 2009.- 8 dekabr.- S. 4.