Azərbaycan Avropa Standartlaşdırma Komitəsinin üzvü seçilmişdir

Gələn il yanvarın 1-dən etibarən Azərbaycan Avropa Standartlaşdırma Komitəsinin (CEN) müşahidəçi üzvü statusuna sahib olacaqdır.

Standartlaşdırma, Metrologiya və Patent üzrə Dövlət Komitəsinin mətbuat xidmətindən bildirmişlər ki, qurum bundan sonra CEN-in üzvü kimi Avropa standartlarının əldə edilməsi, tətbiqi, həmin standartlar əsasında milli standartların hazırlanması işini həyata keçirəcək və təşkilatın texniki komitələrində iştirak edəcəkdir.

Dünya Ticarət Təşkilatına (DTT) üzvlük yolunda ölkəmizdə aparılan iqtisadi islahatlar Avropa və dünya iqtisadiyyatına inteqrasiyanı təmin etməkdədir. Əsas məqsəd Azərbaycanda keyfiyyət infrastrukturunun inkişaf prioritetlərini Avropa Birliyinin bu sahədəki müvafiq qanunvericiliyinə və DTT-nin tələblərinə uyğunlaşdırmaqdır. Görülən işlər Azərbaycanda qeyri-neft sektorunun ixrac potensialının artırılmasına, milli sənayenin təşviqinə, yerli istehsalçıların xarici bazarlara çıxışının təmin edilməsinə və texniki maneələrin aradan qaldırılmasına təkan vermişdir.

Bu istiqamətdə görülən işlər CEN çərçivəsində daha da inkişaf edəcək, təşkilata üzv olmaqla Avropa Birliyinin texniki tənzimləmə sistemində son nailiyyətlərin əldə edilməsində və müasir keyfiyyət infrastrukturunun ölkəmizdə qurulmasına geniş imkanlar açılacaqdır.

AzərTAc

Azərbaycan.- 2009.- 8 dekabr.- S. 4.