Bura Şəkidir...

"Şəki qədim olduğu qədər də gözəl şəhərdir. Çox şadam ki, xalqımızın adət-ənənələrinə, zəngin tarixi-mədəni irsimizə burada böyük diqqət göstərilir!"

İlham Əliyev

170 min nəfər əhalisi, bir şəhəri, iki qəsəbəsi, altmış səkkiz kəndi olan Şəki Azərbaycanın şimal-qərbində, Böyük Qafqaz dağlarının cənub yamacında, dəniz səviyyəsindən 632 metr yüksəklikdə yerləşir. Şəki zəngin təbiətə, nadir tarixi-memarlıq abidələrinə, çoxşaxəli sənətkarlıq xüsusiyyətlərinə malikdir. Regionların sosial-iqtisai inkişafına dair II Dövlət Proqramında göstərildiyi kimi, Şəki-Zaqatala iqtisadi rayonuna aiddir.

Şəki qədim tarixi, zəngin təbiəti, bənzərsiz abidələri ilə maraqlı olduğu qədər, qədirbilən və torpaqsevər insanları ilə də yaddaşlarda yer tutur. Rayona qədəm basan kimi bilirsən ki, bura Şəkidir. Salam verib, salam alan, harasa tələsən və ya baş-başa şirin-şirin söhbətləşən insanlarından tutmuş, yoluna-izinə, havasına-suyuna qədər hər şey Şəkidə olduğunu xatırladır. Ləhcə şirinliyi, söz və təbəssüm bolluğu öz yerində, davranış və hərəkətləri ilə o qədər məhrəmlik, canıyananlıq edirlər ki, fikirləşirsən ki, bəlkə illərdir mən də bu adamların arasında yaşayıram. Adi bir "sağ ol"u beşqat şirinliyi ilə adamın özünə qaytarırlar. Şəkililəri səciyyələndirən xüsusiyyətlərdən biri də dəqiqlikdir. Bilmədiklərini və ya az bildiklərini heç vaxt tam şəkildə dillərinə gətirməzlər. Bu da insanlararası münasibətlərin saflığına, rəvanlığına olduqca müsbət təsir edir.

Şəkidə önəmli məsələlərdən biri də böyük-kiçik münasibətlərinin əxlaqi yöndən sürüşmələrə məruz qalmaması, mənəvi dəyərlərin üzərinə yabançı basqıların çat yaradacaq dərəcədə təzyiqinin olmamasıdır. Şəki həm öz milli şəhər xüsusiyyətləri ilə, həm də insanlarının doğulduğu torpağa, soy-kökə bağlılığı ilə qədimliyini uzunömürlü edir. Düzdür, Şəkidə də geniş abadlıq-quruculuq işləri görülür, müasir yenidənqurma tədbirləri həyata keçirilir. Ancaq bu yeniliklər Şəkinin qədimliyini, milli-tarixi simasını kölgədə qoymur.

Şəkinin küçə və xiyabanlarının, prospektlərinin, həmçinin yerli əhəmiyyətli yollarının abadlaşdırılması daim gündəmdə saxlanılır, asfaltlaşma və əsaslı təmir işləri görülür, şəhərin əsas küçə və prospektlərində müasir işıqlandırma sistemlərinin qurulması davam etdirilir. Şəkiyə xüsusi yaraşıq verən Heydər Əliyev adına park daha da genişləndirilib.

Burada gözoxşayan yaşıllıqlar salınıb, xidmət sahələri yaradılıb, attraksionlar quraşdırılaraq sakinlərin ixtiyarına verilib. Digər park və meydanların yenidən qurulması istiqamətində də işlər başa çatmaq üzrədir. Şəhərin müxtəlif ərazilərində musiqili fontanların tikintisi, müasir işıq dirəklərinin basdırılması, saatların quraşdırılması da yekunlaşmaq ərəfəsindədir.

Şəki Şəhər İcra Hakimiyyətinin başçısı Nazim İbrahimov görülən və nəzərdə tutulan işlərdən söz açmaqla yanaşı, xüsusi vurğuladı ki, Şəkidəki abadlıq-quruculuq işləri rayon sakinlərinin ürəyincə olmasa, bu işlərin heç bir qədir-qiyməti olmaz. Tələb olunan nədir? Hər bir tədbir, hər bir yenilik Şəki sakinlərinin həyat tərzinə müsbət təsir etsin, sosial vəziyyətlərini yaxşılaşdırsın. Nazim İbrahimov onu da qeyd etdi ki, görülən iş vətəndaşın ürəyincə olanda, heç vaxt seyrçi mövqeyində qalmır, necə deyərlər, qolunu çırmayıb işin bir qulpundan o da yapışır. Bu isə şəxsi istək və mənafeləri ümumi mənafe naminə birləşdirməyə imkan verir.

Şəkililərin vətəndaş təəssübkeşliyini Nazim İbrahimov geniş maarifləndirmə tədbirləri və görülən işlərin şəffaflığı ilə də əlaqələndirir. Hamıya məlumdur ki, Şəki qonaq-qaralı yerdir. Elə ay olmur ki, Şəkidə müxtəlif mövzularda bir neçə beynəlxalq tədbir keçirilməsin. "Kitab bayramı"ndan tutmuş, musiqi festivallarına, elmi-praktik konfranslara qədər keçirilən tədbirlərdə yerli sakinlər aktiv iştirak edirlər. Nazim İbrahimov vurğulayır ki, uca Tanrının Şəkiyə bəxş etdiyi nemətlər gələn qonaqları, turistləri, müxtəlif sənət sahiblərini heyran qoyursa, şəkili niyə öz yurdu, şəhəri, milli tarixi ilə fəxr etməsin, qürur duymasın! Ancaq qürur duymaq və sevmək hələ azdır, həm də bu yurdun inkişafı üçün çalışmaq, öhdəsinə düşən vəzifəni ləyaqətlə yerinə yetirmək lazımdır.

Şəkinin gələn qonaqları heyran qoyan abidələri bütünlükdə Azərbaycan üçün qiymətlidir. Ölkə Prezidenti İlham Əliyevin dediyi kimi, "Şəkidə Azərbaycan mədəniyyətinin çox dəyərli abidələri vardır. Bu abidələri qoruyub saxlamalı və bərpa etməliyik. Onlar bizim milli sərvətimiz, mədəniyyətimiz və tariximizdir".

Son dövrlər mədəni irsin qorunub saxlanmasına, Azərbaycan xalqının zəngin mədəniyyətinin təbliğ olunmasına diqqət daha da artırılıb. Ölkə Prezidenti İlham Əliyevin bu məsələ ilə bağlı müvafiq sərəncamları böyük əhəmiyyətə malikdir.

2008-ci ildə İslam Konfransı Təşkilatına üzv olan ölkələrin "İpək yolu" layihəsində iştirak edən turizm operatorları Şəkinin turizm potensialı, habelə iqtisadiyyatı, mədəniyyəti, görməli yerləri, tarixi və memarlıq abidələri ilə tanış olmaq üçün buraya gəlmişlər. Həmin tədbirlərdə iştirak edən Ümumdünya Turizm Təşkilatının nümayəndəsi Vanessa Satur demişdir: "Çox sevinirəm ki, Şəki ilə tanış oldum. Şəki tarixi abidələrin qorunub saxlanması, habelə füsunkar təbiəti, özünəməxsus xüsusiyyətləri baxımından bənzəri olmayan bir şəhərdir. Xan sarayı cəlbedici və təkraredilməz bir tarixi abidədir. Biz çalışacağıq ki, gələcəkdə bu şəhərə turizm axınının sürətlənməsinə öz töhfəmizi verək".

Turizm infrastrukturunu yaratmaq, təşkilatları, iş adamlarını bu sahənin inkişafı ilə bağlı layihələrə cəlb etmək də həlli vacib məsələlərdəndir.

Şəki Şəhər İcra Hakimiyyəti başçısının təhsil, səhiyyə və mədəniyyət məsələləri üzrə müavini, tarix elmləri namizədi Zərinə Cavadova Şəki ilə maraqlanan, müəyyən əlaqələr qurmağa çalışan şəhərlərin də artdığını bildirdi. Z.Cavadova bu yaxınlarda Prezident İlham Əliyevin Belarusa rəsmi səfəri zamanı ölkələrimiz arasında müxtəlif sahələr üzrə, o cümlədən Şəki ilə Minsk vilayətinin Slutsk rayonu arasında 10 il müddətinə əməkdaşlığa dair saziş imzalanmasını da xatırlatdı.

Z.Cavadova qeyd etdi ki, şəhərlər arasında belə qardaşlaşma münasibəti müəyyən əməkdaşlıq müqaviləsini həyata keçirməkdən əlavə, Şəkinin dünəninin, bu gününün tanıdılması, təbliğ olunması baxımından da böyük əhəmiyyətə malikdir.

Bəli, qədim Şəki müasir dünyanın qapısını bu gün ürəklə döyür. Bir yandan yüksək dövlət qayğısı, bir yandan da şəkililərin yurd məhəbbəti 2,43 min kvadratkilometr əraziyə malik dağlar diyarı Şəkini günü-gündən daha da abadlaşdırır, gözəlləşdirir.

Telman NƏZƏRLİ

Azərbaycan.- 2009.- 16 dekabr.- S.4.