Mənzil Məcəlləsi bütün vətəndaşların maraqlarını ifadə edəcək

Səkkiz bölmə 147 maddədən ibarət olan layihədə mənzil hüquqlarının əsasları, bu hüquqların qorunması, məhdudlaşdırılması, mənzil münasibətləri, bu sahədə dövlətin, bələdiyyələrin vəzifələri, mənzil hüquqlarının obyektləri, habelə mənzil fondu, yaşayış sahəsinin təyinatı və ondan istifadə etmək hüdudları, yaşayış sahəsindən istifadə, dövlət qeydiyyatı, yaşayış sahəsinin qeyri-yaşayış sahəsinə və qeyri-yaşayış sahəsinin yaşayış sahəsinə keçirilməsi şərtləri və qaydaları, qəza vəziyyətində olan mənzillərin yenidən qurulması və planlaşdırılması, yaşayış sahəsi mülkiyyətçilərinin hüquq və vəzifələri, dövlət ehtiyacları üçün torpaq alınarkən yaşayış sahəsi mülkiyyətçisinin mənzil hüquqlarının təmin edilməsi, kommunal mənzilin ümumi əmlakının saxlanması, xüsusi təyinatlı mənzil fondunun yaşayış sahələri və digər müddəalar əksini tapmışdır.

Hadi Rəcəblinin sözlərinə görə, son illər ölkəmizdə mənzil fondu bir neçə dəfə artmış, müxtəlif mülkiyyət formaları yaranmışdır. Ona görə müzakirə olunan məsələ bütün xalqın marağını ifadə edir. Mənzil Məcəlləsinin qəbulu ölkədə vətəndaşların mənzil problemlərinin həllini asanlaşdıracaq, dövlətin, bələdiyyələrin və özəl sektorun bu sahədə hüquq və vəzifələrini müəyyənləşdirəcəkdir. Qeyd olundu ki, layihənin parlamentdə birinci oxunuşda müzakirəsindən sonra 100-dən çox maddəsinə əlavələr və dəyişikliklər edilmiş, sənəd əsaslı surətdə təkmilləşdirilmişdir.

Milli Məclisin Hüquq siyasəti və dövlət quruculuğu məsələləri daimi komissiyasının sədri Əli Hüseynov bildirdi ki, Mənzil Məcəlləsi öz əhəmiyyətinə və əhatə dairəsinə görə bütün vətəndaşları əhatə edəcəkdir. Komissiya sədri layihənin birinci oxunuş müzakirəsi zamanı deputatların irəli sürdükləri rəy və təkliflərin böyük əksəriyyətinin işçi qrupu tərəfindən nəzərə alındığını, bu sahə ilə əlaqədar beynəlxalq təcrübənin öyrənildiyini vurğuladı. Əsas məqsəd vətəndaşların Konstitusiyada təsbit olunmuş mənzil və mülkiyyət hüquqlarının məcəllədə də əksini tapmasıdır ki, buna da nail olunub. Əli Hüseynov əlavə və dəyişikliklər barədə ətraflı məlumat verdi.

Milli Məclisin İqtisadi siyasət daimi komissiyasının sədri Ziyad Səmədzadə, İnsan hüquqları daimi komissiyasının sədri Rəbiyyət Aslanova Mənzil Məcəlləsinin ölkəmizdə vətəndaşların mülkiyyət hüquqlarının daha da təkmilləşməsinə və mülkiyyət münasibətlərinin inkişafına xidmət edəcəyini bildirdilər.

İclasda iştirak edən deputatlar sənədlə bağlı rəy və təkliflərini bildirdilər. Mənzil Məcəlləsi layihəsinin ikinci oxunuşda Milli Məclisin müzakirəsinə çıxarılması qərara alındı.

Azərbaycan.-2009.-4 fevral.-S.2.