"Xüsusi iqtisadi zonalar haqqında" qanun layihəsi ikinci oxunuşda müzakirə olunacaq

Bu qanunun qəbulunda məqsəd Azərbaycan Respublikasında xüsusi iqtisadi zonaların yaradılması və idarə edilməsi ilə bağlı münasibətləri tənzimləmək və həmin zonalarda sahibkarlıq fəaliyyətinin təşkili qaydalarını müəyyənləşdirməkdir. Sənəd barədə ətraflı məlumat verən Ziyad Səmədzadə qeyd etdi ki, qanun layihəsi birinci oxunuşda müzakirə edildikdən sonra əsaslı surətdə təkmilləşdirilib. Belə ki, layihəyə 60-dan çox düzəliş edilib.

Komissiya sədrinin müavini Çingiz Əsədullayev, deputatlardan Əli Məsimli, Rüfət Quliyev çıxış edərək xüsusi iqtisadi zonaların səmərəliliyi barədə danışdılar.

İclasda iştirak edən İqtisadi İnkişaf Nazirliyinin, Vergilər Nazirliyinin və Gömrük Komitəsinin nümayəndələri məsələ ilə bağlı fikirlərini bildirdilər.

Qanun layihəsi ikinci oxunuşda müzakirə edilmək üçün Milli Məclisin plenar iclasına tövsiyə edildi.

Azərbaycan.-2009.-4 fevral.-S.2