Xocavəndə gedən yol

Tarixin sərt sınaqlarından üzüağ çıxaraq ötən əsrin sonlarına doğru müstəqil dövlətçiliyinin bərpasına nail olan, onu möhkəmləndirərək yeni inkişaf magistralına çıxaran Azərbaycan xalqı taleyini daim qəlbən inandığı, etimad göstərdiyi siyasi liderə etibar etmişdir. Yeni minilliyin başlanğıcında respublikamız ulu öndər Heydər Əliyevin ən layiqli davamçısı cənab İlham Əliyevin rəhbərliyi altında uğurlu gələcəyinə doğru inamla irəliləyir, bu yolda qarşılaşdığı müxtəlif maneələrə, çətinliklərə mətinliklə sinə gərir. Ötən müddət Heydər Əliyev siyasi kursunun diktə etdiyi sülh, sabitlik və tərəqqi yolunun alternativsizliyini bir daha sübuta yetirmiş, inam və etimad üzərində qərarlaşan, dərin elmi əsaslara söykənən sosial-iqtisadi inkişaf strategiyasının həlledici uğurlarını təmin etmişdir.

Prezident İlham Əliyevin lider və şəxsiyyət kimi ən mühüm keyfiyyətlərindən biri də onun son beş ildə xalq qarşısında verdiyi bütün vədlərə əməl etməsi, ictimai inamı doğrultmaq üçün böyük səylə çalışmasıdır. Hələ 2003-cü ilin prezident seçkiləri ərəfəsində "Azərbaycanda bir dənə də olsun, çadır şəhərciyi qalmayacaq" - deyən dövlət başçısı ötən beş ildə bu vədini gerçəkləşdirmək üçün bütün zəruri tədbirləri həyata keçirmiş, Ermənistanın işğalçılıq siyasəti nəticəsində tarixi torpaqlarından didərgin düşmüş qaçqın və məcburi köçkünlərin həyat səviyyəsinin yaxşılaşdırılması, sosial problemlərinin həlli, faydalı məşğulluğunun təmin edilməsi Azərbaycan iqtidarının xüsusi diqqət yetirdiyi məsələlərdən olmuşdur. Qaçqın və məcburi köçkünlərlə aparılan işi təkmilləşdirmək, bu sahə üzrə beynəlxalq standartlara cavab verən qanunvericilik bazası formalaşdırmaq, mövcud prosesin idarəolunma mexanizmini hüquqi çərçivəyə salmaq və bir sıra təşkilati tədbirləri gerçəkləşdirmək məqsədilə xüsusi dövlət proqramı təsdiqlənərək icra edilmişdir. 2008-ci ildə dövlətin sosialyönümlü tədbirlər sisteminin davamı kimi büdcədən ayrılmış 145 milyon manat vəsait hesabına qaçqın və məcburi köçkünlərin müasir infrastruktura malik yeni qəsəbələrə köçürülməsi prosesi uğurla davam etdirilmiş, sonuncu çadır düşərgəsi də ləğv olunmuş, beləliklə, dövlət başçısının xalq qarşısında verdiyi daha bir vəd uğurlu həllini tapmışdır.

Nazirlər Kabinetinin iclasında çıxış edən dövlət başçısı İlham Əliyev qlobal maliyyə böhranına baxmayaraq 2009-cu ildə Azərbaycanda sosial məsələlərin həllinə böyük diqqət ayrılacağını, xüsusən də, məcburi köçkünlərin yaşayış səviyyəsinin yüksəldilməsi sahəsində tədbirlərin davam etdiriləcəyini xüsusi vurğulamışdır: "İndi Azərbaycanda bir dənə də çadır şəhərciyi yoxdur və növbəti proqramda soydaşlarımızın yataqxanalardan, hərbi hissələrdən, məktəblərdən, digər yararsız binalardan köçürülməsi məsələləri dayanır".

Bu sahədə yeridilən məqsədyönlü və çevik siyasətin nəticəsi olaraq respublikanın işğal altında olan bütün rayon və qəsəbələrinin sakinləri müasir sosial-infrastruktura malik yeni qəsəbələrdə məskunlaşdırılmış, onların faydalı məşğulluğunun təmini istiqamətində məqsədyönlü tədbirlər həyata keçirilmişdir. Ötən beş ildə dövlətin bu qayğıkeş siyasətini Xocavənd rayonundan olan məcburi köçkünlər də yaxından hiss edərək böyük razılıq, minnətdarlıq duyğuları ilə qarşılamışlar. 1991-ci ildə Martuni və Hadrut rayonlarının bazasında yaradılan, ümumi sahəsi 1458 kvadratkilometr, əhalisi 41300 nəfər təşkil edən Xocavənd rayonu 1992-ci il oktyabrın 2-də Ermənistan hərbi birləşmələri tərəfindən işğal olunmuşdur. Rayonun sakinləri respublikanın 37 şəhər və rayonunda müvəqqəti məskunlaşmağa məcbur olmuşlar. Rayon əhalisinin əsas hissəsi Beyləqan, Ağcabədi rayonlarında və Bakı şəhərində yaşayır. Xocavənd Rayonunun İcra Hakimiyyəti, habelə rayonun icra nümayəndəlikləri, idarə və müəssisələr isə Beyləqan şəhərində müxtəlif inzibati binalarda fəaliyyət göstərirlər.

Dövlət tərəfindən Beyləqan rayonunun "Haramı" adlanan inzibati ərazisində "Yeni Tuğ" (172 ailə, 858 nəfər), "Yeni Xocavənd" (230 ailə, 870 nəfər) və "Yeni Qaradağlı" (42 ailə, 215 nəfər) qəsəbələri salınmış, əhalinin bir qismi həmin qəsəbələrdə yerləşdirilmişdir. Azərbaycan Respublikası Prezidentinin 2004-cü il 1 iyul tarixli sərəncamı ilə təsdiq olunmuş Qaçqınların və məcburi köçkünlərin yaşayış şəratinin yaxşılaşdırılması və məşğulluğunun artırılması üzrə Dövlət Proqramının (2004-2008-ci illər) icrası ilə əlaqədar Xocavənd rayonundan olan məcburi köçkünlər üçün nəzərdə tutulan 500 ailəlik qəsəbənin tikintisi başa çatmışdır. Həmin dövlət proqramına 2007-ci il 31 oktyabr tarixli sərəncamla edilmiş əlavələrlə rayonun məcburi köçkünləri üçün 2009-2011-ci illər ərzində "Yeni Tuğ" qəsəbəsində daha 120 evin tikilməsi və eyni zamanda, 200 ailəlik yeni qəsəbənin salınması, "Qarasu" və "Nərgiztəpə" adlanan ərazilərini birləşdirəcək çınqıllı yolun çəkilməsi, "Tuğ" kənd orta məktəbinin 125 illik yubileyinin qeyd olunması, habelə rayon ərazisində 9 subartezian quyusunun qazılması nəzərdə tutulmuşdur. Əlavə tədbirlər sırasında işsizliyin aradan qaldırılması və məşğulluğun təmin olunması məqsədilə məcburi köçkünlərin sıx məskunlaşdıqları ərazilərdə heyvandarlığın, taxılçılığın, toxumçuluğun, tərəvəzçiliyin, üzümçülüyün inkişaf etdirilməsi, kiçik emal müəssisələrinin, tikiş və digər sexlərin yaradılması, məcburi köçkün sahibkarlara, fermer təsərrüfatlarına güzəştli kreditlərin verilməsi nəzərdə tutulur.

2008-ci il oktyabrın 4-də Azərbaycan Prezidenti İlham Əliyevin "Haramı" düzündə məcburi köçkünlər üçün yeni salınmış 500 ailəlik qəsəbənin açılış mərasimində iştirakı isə xocavəndlilərdə böyük ruh yüksəkliyi, sevinc və minnətdarlıq hissləri doğurmuşdur. Dövlət başçısı və xanımı Mehriban Əliyeva məcburi köçkünlərin həyat şəraiti, qayğı və problemləri ilə maraqlanmış, yeni tikilmiş bir sıra obyektlərlə yaxından tanış olmuş, daha sonra Xocavənd rayonunun Qaradağlı kəndindən olan iki şəhid anası Sevil Əzizovanın mənzilinə baş çəkmişlər.

Qəsəbənin bugünkü durumu ilə tanış olmaq, insanların həyat səviyyəsini öyrənmək üçün bura baş çəkməyə ehtiyac duyduq. Qəsəbəyə gedən yolda qələbəlik idi. İri yük maşınlarının çoxluğu insanların qəsəbədə intensiv məskunlaşmasını göstərirdi. Hələ kənardan qəsəbənin ümumi mənzərəsi ilə buranın müasir görkəmini, abadlığını, səliqə-sahmanını müşahidə etmək mümkündür. Beyləqan rayonundan təxminən 8-10 kilometr məsafədə yerləşən qəsəbədə insanların rahatlığı, firavan yaşayışı, zəruri tələb və ehtiyaclarını ödəməsi üçün hər cür imkan yaradılıb. Xətt boyunca səliqə ilə inşa edilmiş evlərin interyeri müasir tələblər səviyyəsindədir. Hər ailəyə 6 sot torpaq ayrılıb, su xətti çəkilib. Məcburi köçkün ailələrinin böyük qismi yaradılmış şəraitdən istifadə edərək özləri üçün kiçik təsərrüfatlar yaradıblar.

Ümumi sahəsi 25885,5 kvadratmetr olan 60 birotaqlı, 245 ikiotaqlı, 180 üçotaqlı, 15 dördotaqlı mənzillərdən ibarət qəsəbədə 360 şagird yerlik orta məktəb, 50 yerlik uşaq bağçası, 25 çarpayılıq xəstəxana, poçt şöbəsi, mədəniyyət evi, icma mərkəzi, baytarlıq məntəqəsi, yanğınsöndürmə deposu, inzibati və anbar binaları tikilərək istifadəyə verilib. Hər cür infrastruktura malik qəsəbənin asfalt döşənmiş yolları da insanların rahatlığını təmin edir. Burada 25 kilometr yol, habelə 30 kilometr su xətti, 30 kilometr hava elektrik xətti çəkilib, "Yeni Beyləqan" yarımstansiyası genişləndirilib, "Xocavənd" yarımstansiyası inşa olunub. Qəsəbənin enerji ilə təminatı üçün 18 müxtəlif gücə malik elektrik transformatorları quraşdırılıb.

Məcburi köçkünlər səliqə-sahmanla yanaşı, təmizliyə, abadlığa da ciddi fikir verir, qəsəbənin müasir görkəmini qoruyub saxlamağa çalışırlar. Qəsəbə mərkəzi sayılan orta məktəbin qarşısındakı izdihamın səbəbi ilə maraqlananda məlum olur ki, Xocavənd rayonunun icra hakimiyyətinin başçısı Eyvaz Hüseynov sakinlərlə açıq görüş keçirir. İcra başçısı sakinləri təmkinlə dinləyərək onların problemlərinin yerindəcə həlli üçün əlaqədar təşkilatlara tapşırıq və tövsiyələrini verir. "Azərbaycan Prezidenti qaçqın və məcburi köçkünlərə yüksək diqqət və qayğının göstərilməsini hökumət üzvləri və hər bir məmur qarşısında mühüm vəzifə kimi müəyyənləşdirib. Hər bir Xocavənd sakininin problem və qayğılarını dinləyib onların həlli üçün lazımi tədbirlər görmək bizim də vəzifə borcumuzdur" - deyə Eyvaz Hüseynov bildirir.

Sonra icra başçısı ilə birgə şəhid anası Sevil Əzizovanın mənzilinə yollanır, onun güzəranı, yaşayışı ilə maraqlanırıq. Sevil xanım iki övladını vətən uğrunda qurban verib. Təsəllisi odur ki, şəhid oğullarının xatirəsi unudulmur, həm dövlət, həm də rayon icra hakimiyyəti tərəfindən onu daim yad edirlər. Fəqət Eyvaz Hüseynov bildirir ki, Sevil Əzizova hər hansı bir çətinliklə, problemlə qarşılaşanda belə, heç bir qapıya üz tutmur, iki şəhid anası adından sui-istifadə etmir. Hər kəs necə, o da o tərzdə qayğılarını həll edir. Əslində, elə igid oğulları dünyaya gətirib, vətənpərvər kimi böyüdən ana belə qürurlu, vüqarlı olmalıdır.

Rahat, səliqəli və isti evdə balaca nəvələrin sevinci yerə-göyə sığmır. Qarabağ elinin qonaqpərvərliyini belə erkən yaşlarından yaşadan bu körpələr biri-birinə aman vermədən onların evinin ilk qonağı olmuş iki şəxsdən məhəbbətlə danışırlar. 7 yaşlı Sevilin "Mehriban nənə mənə hədiyyələr verdi, İlham baba isə soyuducu bağışladı..." sözlərinə 4 yaşlı Aqşin əlavə etdi: "Amma Mehriban nənə məni qucağına aldı, öpdü, İlham baba isə bax, bu böyüklükdə televizoru Bakıdan bura mənə gətirmişdi". Nəvələrinin bu sözlərini kövrəkliklə dinləyən Sevil xanım minnətdarlıqla danışır: "Prezident və Mehriban xanımın bizim evi ziyarət etməsini hələ də unuda bilmirəm. Qəlbim çox fərəhləndi, elə bil Xocavəndi gördüm. Bu insanların öz vətəndaşlarına qarşı necə mehriban, diqqətli olmasını televizordan həmişə izləmişəm. Ancaq deyim ki, üz-üzə danışanda İlham müəllim də, Mehriban xanım da daha sevimli, əziz idilər. Nəvələrimi o qədər sevindirdilər ki... Aqşin də, balaca Sevil də hər saat "İlham baba, Mehriban nənə gör bizə nələr bağışlayıblar" deyə hədiyyələrin başına dolanırlar. Deyirəm ki, ay balalar, onlar cavandırlar, onlara "Prezident" və "Mehriban xanım" deyin. Cavabları da bu olur ki, nə olsun cavandırlar, amma bizim babamız və nənəmizdirlər. Allah, onların yeni dünyaya gəlmiş nəvələrini saxlasın. Həm Prezident, həm də Mehriban xanım bütün Azərbaycan balalarını necə öz övladları, nəvələri kimi himayə edir, qayğılarına qalırsa, qoy ulu Tanrı da bu körpələrin alqışını eşidib onların nəvələrinə kömək olsun". Bu səmimi sözlər uzandıqca uzanır... Evin gəlini Əfruz xanım isə deyir ki, gün o gün olsun, öz doğma Xocavəndimizə qayıdaq və onda öz dədə-baba ocağımızda Prezidentimizi bütün ailəliklə qonaq cağıraq. Hamımızın arzusu bir oldu: "Allah diləyinizə, diləyimizə çatdırsın!".

Şəhid anası Sevil Əzizovanın ailəsi ilə vidalaşıb Prezident İlham Əliyevin qəsəbəyə səfəri zamanı istifadəyə verilmiş müasir orta məktəblə yaxından tanış oluruq. 300 şagird yerlik məktəb müasir tələblərə cavab verən infrastrukturu, tədris şəraiti ilə zövq oxşayır. Böyük ərazidə inşa edilmiş məktəbin həyəti həmişəyaşıl ağac və kollarla bəzədilib. Məktəbin geniş və işıqlı fənn kabinetləri lazımi avadanlıqlarla, əyani tədris vasitələri ilə təmin olunub. Məktəbin yeməkxanası, idman zalı, kompüter otağı, kitabxanası müasir tələblərə cavab verir. Orta məktəbdə 200 şagirdin təlim-tərbiyəsi ilə 27 müəllim məşğul olur.

Pedaqoji təcrübəsi yüksək olan müəllimlər taleyində məcburi köçkünlük acısı yaşayan şagirdlərin təlim-tərbiyəsi, yaxşı tədris alması, ayrı-ayrı fənn tapşırıqlarını düzgün mənimsəməsi üçün əllərindən gələni edirlər. Taleyinə çadır düşərgələrində doğulmaq qisməti yazılmış bu şagirdlər - uşaq və yeniyetmələr gələcəyə böyük inam hissi ilə baxır, yalnız yaxşı təhsil almaqla məqsədlərinə çata biləcəklərini başa düşürlər.

Məktəbin fənn otaqlarından birinə daxil olub müəllim və şagirdlərlə söhbət edir, onların istək və arzuları, düşüncələri ilə maraqlanırıq. Ədəbiyyat fənnini tədris edən əməkdar müəllim Gültəkin Ağayeva bizi böyük sevinc hissi ilə qarşılayır. Az sonra məlum olur ki, Gültəkin xanım həm də Xocavənd Rayon İcra Hakimiyyətinin təsisçiliyi ilə işıq üzü görən "Xocavənd" qəzetinin baş redaktorudur. Bizimlə həm müəllim, həm də həmkar kimi söhbətləşən Gültəkin Ağayeva məcburi köçkünlərin məskunlaşdığı qəsəbədə şagirdlərin təhsilə marağının böyük olduğunu bildirir. "Məcburi köçkünlərə diqqətlə yanaşan kütləvi informasiya vasitələrinə böyük hörmətim var. Müəllimliklə yanaşı, jurnalist fəaliyyəti ilə məşğul olduğum üçün burada insanların sosial vəziyyəti, psixoloji-mənəvi durumu barədə kifayət qədər məlumatım var. Azərbaycan Prezidenti İlham Əliyev tərəfindən məcburi köçkünlərə göstərilən diqqət və qayğı hamını razı salır. İnanırıq ki, Azərbaycan Prezidentinin yeritdiyi uğurlu siyasət nəticəsində yaxın vaxtlarda doğma Qarabağımıza, Xocavəndə qayıda biləcəyik" - deyə o bildirir.

Orta məktəbdə ingilis dili fənni də yüksək səviyyədə tədris edilir. Açığı, məcburi köçkünlərin məskunlaşdığı bir düşərgədə təhsilin keyfiyyətinin yüksək olması bir qədər də təəccüblü görünür. Fənn müəllimi Şəbnəm İbrahimova deyir ki, çadır düşərgələrində məcburi köçkünlərin övladları bir müddət məktəbdən yayınmağa məcbur olsalar da, son illər bu sahədə vəziyyət kökündən dəyişib. Bütün valideynlər uşaqlarının yüksək təhsil alması üçün çalışır, onların qayğısına qalırlar. Yeni istifadəyə verilmiş məktəbimizin müasir tələblərə cavab verən binası isə onların keyfiyyətli təhsil almasına daha yaxşı imkanlar açır. Tənəffüs zamanı isə məktəbin müəllimlər otağına daxil olub əməkdar müəllim Famlet Quliyevlə söhbətləşirik. Famlet müəllim deyir ki, məcburi köçkünlər üçün yeni inşa olunmuş qəsəbələr həm də Azərbaycan təhsilinin inkişafına xidmət edir. Onun sözlərinə görə, uzun illər çadır düşərgələrində yaşamış məcburi köçkün uşaqları obyektiv səbəblərdən keyfiyyətli təhsil almaq imkanından məhrum olmuşlar. Azərbaycan Prezidenti İlham Əliyev çadır düşərgələrini ləğv etməklə, təhsilə yüksək diqqət, qayğı göstərməklə həm də Azərbaycanın gələcəyini düşünür. Məktəbin kompüter otağından internet şəbəkəsinə çıxışın olması da artıq təəccüblü görünmür. İdman zalı özünün müasirliyi, idman qurğularının yeniliyi ilə diqqəti çəkir.

Məktəbdən xoş təəssüratlarla ayrılıb müasirliyi ilə diqqəti cəlb edən qəsəbə xəstəxanasına yollanırıq. Burada bizi gülərüz və qonaqpərvərliyi ilə seçilən tibb personalı qarşılayır. İlk baxışdan aydın görünür ki, 25 çarpayılıq xəstəxana müasir tələblər səviyyəsində inşa edilməklə yanaşı, lazımi tibbi avadanlıqlarla da təmin olunub. Xəstəxanada stomatoloji, rentgen, ultrasəs müayinəsi, cərrahiyyə, doğum, laboratoriya, dəri-zöhrəvi, pediatriya, kardiologiya və təcili yardım şöbələri fəaliyyət göstərir. Bu şöbələrin hər birində quraşdırılmış tibbi avadanlıqlar müasirliyi ilə heç də paytaxtdan geri qalmır. Xəstəxanada çalışan tibb əməkdaşlarının hazırlıq səviyyəsi, təcrübəsi, peşəkarlığı da səhhətində problemi olan sakinləri tam razı salır.

Təcrübəli cərrah Nəcəf Qaraşlı 30 illik iş stajına malikdir. Müharibə illərində hərbi hospitalda cərrah kimi çalışıb, onlarla hərbçimizin sağalıb ailəsinə qovuşması naminə əlindən gələni əsirgəməyib. "Qəsəbədə evlərlə yanaşı, belə müasir tipli xəstəxananın tikilməsi göstərir ki, Azərbaycan dövləti məcburi köçkünlərin fiziki sağlamlığı üçün bütün lazımi tədbirləri həyata keçirir. Həkim kimi bizim üzərimizə düşən əsas vəzifə isə hər bir müraciət edən xəstənin düzgün, keyfiyyətli müayinə və müalicə olunmasına, tez bir zamanda sağalmasına kömək göstərməkdir" - deyən cərrah xəstəxanada mədə, onikibarmaq bağırsaq, öd kisəsi və digər daxili orqanlarda cərrahiyyə əməliyyatlarının aparılması üçün hər cür imkanlara malik olduğunu bildirir. Xəstəxanada müalicə alan pasiyentlər də onlara göstərilən xidmətin səviyyəsindən razılıqla danışdılar.

Xocavənd Rayon İcra Hakimiyyətinin başçısı Eyvaz Hüseynovun müşayiəti ilə qəsəbə ilə tanışlığımızı davam etdiririk. Rastlaşdığımız uşaqlar, yeniyetmələrlə həmsöhbət oluruq. Onların heç biri öz doğma yurdlarını - Xocavəndi görməyiblər. Yalnız böyüklərinin xatirələrindən, söhbətlərindən eşitdikləri məlumatlarla Xocavəndi qəlblərində canlandırırlar. Hamısı da öz el-obalarına tezliklə qayıtmağı arzulayır, döyüşməyə hazır olduqlarını söyləyirlər. Bu kövrək və qürurverici ünsiyyətdən hamımız təsirlənirik. Eyvaz Hüseynovun "Prezidentin sayəsində qısa zamanda hər biriniz öz kəndinizə qayıdacaqsınız və orta təhsili də, inşallah, öz kəndinizdəki məktəbdə bitirəcəksiniz" - diləyi ilə kənd ağsaqqallarına tərəf üz tuturuq.

Köçkünlüyün məşəqqətləri, ağrıları, itkiləri bu insanların üzlərinin qırışlarında, əllərinin qabarında aydın hiss olunur. Ancaq gözlərdən yağan ümid işığı, daxili vüqarları və əyilməzlikləri onların mənəvi ucalığını nümayiş etdirirdi. Eyvaz müəllim bildirir ki: "Ötən 16-17 ildə bu insanlar saysız-hesabsız faciələr, problemlər, itkilərlə üzləşiblər. Ancaq heç bir qayğı onların dəyanətini azaltmayıb, hər zaman doğma torpaqlarına qayıdacaqlarına inanıblar. Bu qəsəbəyə köçməklə isə Xocavəndə yalnız fiziki məsafəcə yox, həm də mənəvi məsafəcə yaxınlaşıblar. İndi xocavəndlilər böyük qələbəyə daha çox əmindirlər". Ağsaqqallar onlara yaradılan şəraitə görə, Prezidentə təşəkkürlərini bildirirlər. Fəxr edirlər ki, onların qəsəbəsinin açılışını məhz cənab İlham Əliyev edib. Prezidentin və onun xanımının xocavəndlilərə böyük qayğısını, diqqətini qəsəbənin hər bir sakini qürurla qeyd edir.

Ümumilikdə, Xocavənd qəsəbəsində məcburi köçkünlər üçün inşa olunmuş qəsəbədəki ürəkaçan vəziyyət həm də göstərir ki, dövlət başçısı İlham Əliyevin bu sahədə müəyyənləşdirdiyi siyasi xətt yerlərdə uğurla icra olunur. Xüsusən, Xocavənd Rayon İcra Hakimiyyəti üzərinə düşən məsuliyyəti düzgün qiymətləndirməklə, öz fəaliyyətini dövlət başçısının yeritdiyi çevik və səmərəli inkişaf strategiyasının mahiyyətinə uyğun qurmağa, qarşıda duran vəzifələri dəqiq müəyyənləşdirərək vaxtında və düzgün icrasına nail olmağa çalışır.

Haramı düzündə inşa olunmuş qəsəbəni nikbin əhval-ruhiyyədə tərk edərkən Mədəniyyət evinin qarşısında qulaqdan qəlbə süzülən həzin bir musiqi səsi bizi bir anlığa ayaq saxlamağa məcbur edir. Musiqi dərnəyinin üzvü olan yeniyetmə həzin, fəqət üsyankar bir səslə oxuyur: "Aləm cənnətə dönsə, yaddan çıxmaz Qarabağ...". Xocavənd barədə təsəvvürü belə, olmayan bu yeniyetmə oxuduğu kövrək musiqi ilə bütün xocavəndlilərin müqəddəs arzusunu ifadə edir. Bəli, Xocavəndin fədakar insanları bu gün normal şəraitlə təmin olunsalar da, hər zaman doğma vətənə qovuşmaq, onun havasını, suyunu udmaq arzusu ilə yaşayırlar. Xocavəndlilər ürəkdən əmindirlər ki, Prezident İlham Əliyevin yeritdiyi müdrik və uzaqgörən siyasət xocavəndlilərin bu arzusunu əvvəl-axır gerçəkliyə çevirəcək.

İxtiyar Hüseynli

Samir Elmanoğlu

Azərbaycan.-2009.-5 fevral.-S.3.