Dövlət Neft Fondundan vəsait ən vacib layihələrin reallaşması üçün ayrılır

Məlumatda həmçinin deyilir ki, keçən ilin yanvar-sentyabr aylarında Dövlət Neft Fondunun gəlirləri əvvəlki ilin eyni dövrü ilə müqayisədə 6,9 dəfə artaraq 9190,2 milyon manat təşkil edib. Daxilolmaların 99,3 faizi "Əsrin müqaviləsi" ilə əlaqədar neft sazişlərinin həyata keçirilməsi, 0,7 faizi isə fondun aktivlərinin yerinə yetirilməsi və idarə olunması ilə bağlı gəlirlərin payına düşüb.

Həmin dövrdə fondun xərcləri 3,8 dəfə artıb və 2,9 milyon manata çatıb. Xərclərin 86 faizini fondun büdcəsinin icrası ilə bağlı xərclər, 14 faizini büdcədənkənar xərclər təşkil edib.

Neft Fondu büdcəsinin icrası çərçivəsində qaçqın və məcburi köçkün ailələrinin məskunlaşma və sosial-məişət vəziyyətinin yaxşılaşdırılması üzrə tədbirlərin həyata keçirilməsinə 85,5 milyon manat ayrılıb. Oğuz-Qəbələ zonasından Bakı şəhərinə su kəmərinin çəkilişi üçün 135,8 milyon manat, Samur-Abşeron suvarma sisteminin yenidən qurulması üçün 79,5 milyon manat, Bakı-Tbilisi-Qars yeni dəmir yolu üçün 3,7 milyon manat vəsait verilib. Dövlət büdcəsinə 2190 milyon manat köçürülüb. "Azərbaycan gənclərinin xarici ölkələrdə təhsili üzrə Dövlət Proqramı"na uyğun olaraq azərbaycanlı tələbələrin başqa dövlətlərdə təhsili xərclərinin maliyyələşdirilməsinə fond tərəfindən 598,4 min manat vəsait ayrılıb.

Keçən ilin üç rübü ərzində fondun idarə edilməsi ilə bağlı xərclər 3,1 milyon manat təşkil edib.

Neft Fondunun büdcədənkənar xərclərinin 94,5 faizi fondun valyuta aktivlərinin yenidən qiymətləndirilməsi ilə bağlı itkilərin, 5,5 faizi mənfəət vergisi və digər vergilər üzrə ödənişlərin payına düşüb.

Azərbaycan.-2009.-6 fevral.-S.5.