Azərbaycan Prezidenti İlham Əliyev Vyetnam Sosialist Respublikasının ölkəmizdə yeni təyin olunmuş fövqəladə və səlahiyyətli səfiri Buy Din Dinin etimadnaməsini qəbul etmişdir

Azərbaycan Respublikasının Prezidenti İlham Əliyev fevralın 6-da Vyetnam Sosialist Respublikasının ölkəmizdə yeni təyin olunmuş fövqəladə və səlahiyyətli səfiri Buy Din Dinin etimadnaməsini qəbul etmişdir.

Səfir fəxri qarovul dəstəsinin qarşısından keçdi.

Buy Din Din etimadnaməsini Azərbaycan Prezidenti İlham Əliyevə təqdim etdi.

Dövlətimizin başçısı səfirlə xatirə şəkli çəkdirdi.

Sonra Prezident İlham Əliyev diplomatla söhbət etdi. Ölkələrimiz arasında dostluq əlaqələrinin mövcud olduğunu və bu əlaqələrin genişləndirilməsi üçün səylərini əsirgəməyəcəyini söyləyən səfir bu işdə Azərbaycan hökumətinin dəstəyinə arxalandığını vurğuladı.

Dövlətimizin başçısı hər iki ölkənin iqtisadi inkişafının dinamik xarakter daşıdığını xatırlatdı və əlaqələrin inkişafı üçün yaxşı imkanların olduğunu bildirdi. İqtisadi əməkdaşlığın daha da genişləndirilməsi üçün konkret sahələrin müəyyənləşdirilməsinin önəmini vurğulayan Prezident İlham Əliyev səfirə fəaliyyətində uğurlar arzuladı.

AzərTAc

Azərbaycan.-2009.-7 fevral.-S.2.