2008-ci ildə ÜDM istehsalının artımı üzrə ən yüksək göstəriciyə Azərbaycan nail olub

MDB Dövlətlərarası Statistika Komitəsi birlik ölkələrinin ötən ilki makroiqtisadi nəticələrini əks etdirən rəqəmləri açıqlayıb.

Komitənin yaydığı məlumata görə, keçən il MDB ölkələrində pərakəndə əmtəə dövriyyəsinin həcmi 2007-ci ilə nisbətən 14 faiz artıb. Bu göstərici üzrə ən yüksək artım 18,1 faizlə Ukraynada qeydə alınıb. Azərbaycanda isə pərakəndə əmtəə dövriyyəsinin keçən ilki artımı 16,1 faiz təşkil edib. Sonrakı yerlərdə Belarus, Rusiya Federasiyası, Moldova, Qırğızıstan və Qazaxıstan gəlir.

2008-ci ildə dənli bitkilərin istehsalı üzrə də ən yüksək artıma Ukrayna nail olub. Bu ölkədə ötən il 2007-ci ilə nisbətən dənli bitkilər, o cümlədən taxıl istehsalı 82 faiz çoxalıb.

ÜDM istehsalının artımı üzrə isə ən yüksək göstərici son illərdə olduğu kimi, Azərbaycana məxsusdur - 10,8 faiz. Azərbaycandan sonra Belarus (10 faiz) və Özbəkistan (9,4 faiz) ümumi daxili məhsul istehsalında yüksək göstəricilər qazanıblar (Özbəkistan üzrə məlumat 2008-ci ilin yanvar-sentyabr aylarını əhatə edir).

Azərbaycan.-2009.-8 fevral.-S.1.