BMT-nin hesabatında Azərbaycanın insan hüquqları sahəsindəki uğurları əksini tapmışdır

Azərbaycanda insan hüquqları və əsas azadlıqlarının təmin olunması istiqamətində bir sıra uğurlar əldə edilmişdir.

Bu fikirlər Cenevrədə BMT Baş Məclisinin 2006-cı il 15 mart tarixli Qətnaməsinə müvafiq olaraq İnsan Hüquqları Şurasının Universal Dövri İcmal Mexanizmi üzrə işçi qrupunun 4-cü sessiyasında Azərbaycanla bağlı qəbul edilən hesabatda əksini tapmışdır.

Hesabatda Azərbaycanın beynəlxalq təşkilatlarla əməkdaşlığı, əldə olunan uğurlar barədə geniş məlumat verilmişdir. Ölkəmizin universal dövri icmal üzrə hazırladığı milli məruzəsində Azərbaycan hökumətinin mövqeyi və BMT-yə üzv olan ölkələrin münasibətləri də geniş yer almışdır.

Azərbaycan Prezidentinin 2009-cu il 13 yanvar tarixli sərəncamına uyğun olaraq, xarici işlər nazirinin müavini X.Xələfovun başçılığı ilə nümayəndə heyəti milli məruzənin təqdimatında iştirak etmişdir.

Azərbaycanın BMT-nin Cenevrə bölməsi və digər beynəlxalq təşkilatlar yanında daimi nümayəndəliyinin rəhbəri, səfir Elçin Əmirbəyovun verdiyi məlumata görə, digər ölkələrlə yanaşı, Azərbaycana da bir sıra tövsiyələr verilmişdir. Ölkəmizlə bağlı hesabatın müzakirəsində 60-a yaxın heyət öz fikrini bildirmişdir və bu da beynəlxalq ictimaiyyətin Azərbaycana göstərdiyi marağın təzahürü idi.

Azərbaycanın tövsiyələrə hansı səviyyədə əməl etməsi məsələsi BMT Baş Məclisinin 2009-cu ilin iyununda keçiriləcək 11-ci sessiyasında müzakirə olunacaqdır.

BMT Baş Məclisinin İnsan Hüquqları Şurasının Universal Dövri İcmal Mexanizmi üzrə işçi qrupunun sessiyası fevralın 13-də başa çatacaqdır. Qurumun sessiyasında Azərbaycanla yanaşı, daha 15 ölkə üzrə hesabat qəbul ediləcəkdir.

AzərTAc

Azərbaycan.-2009.-8 fevral.-S.1.