"Yeni Azərbaycan" təşviqat qrupu Gəncədə referendumla bağlı zona seminar-müşavirəsi keçirmişdir

Azərbaycan Respublikası Konstitusiyasına əlavələr və dəyişikliklərlə bağlı martın 18-nə təyin olunmuş referendumla əlaqədar "Yeni Azərbaycan" təşviqat qrupu Gəncədə zona seminar-müşavirəsi keçirmişdir.

Gəncə ilə yanaşı, Yeni Azərbaycan Partiyası Naftalan, Samux və Kəlbəcər rayon təşkilatları sədrlərinin və fəallarının iştirakı ilə keçirilən seminar-müşavirədə referenduma hazırlığın vəziyyəti və qarşıda duran vəzifələr ətraflı müzakirə edilmişdir.

Seminar-müşavirədə YAP Gəncə şəhər təşkilatının sədri İsrafil İsmayılov, Milli Məclisin deputatları Aydın Abbasov, Rövşən Rzayev və başqaları çıxış edərək Konstitusiyanın 29 maddəsinə ediləcək əlavələr və dəyişikliklər ətrafında fikir mübadiləsi aparmış, bu siyasi kampaniyanın yüksək fəallıq şəraitində keçməsi üçün qarşıda duran vəzifələrdən danışmışlar.

Seminar-müşavirədə iştirakçıları maraqlandıran suallara aydınlıq gətirilmişdir.

AzərTAc

Azərbaycan.-2009.-11 fevral.-S.3.