Azərbaycanın vergi xidməti əməkdaşları peşə bayramlarını qeyd ediblər

Vergilər Nazirliyində vergi xidməti işçilərinin peşə bayramına və Vergilər Nazirliyinin yaradılmasının 9-cu ildönümünə həsr edilmiş kollegiya iclası keçirilmişdir.

Tədbirdə çıxış edən vergilər naziri, 2-ci dərəcəli dövlət vergi xidməti müşaviri Fazil Məmmədov vergi xidməti əməkdaşlarını Vergilər Nazirliyinin yaradılmasının 9-cu ildönümü və vergi işçilərinin peşə bayramı münasibətilə təbrik etmişdir.

Nazir qeyd etmişdir ki, Azərbaycanda müasir vergi xidmətinin yaradılması ümummilli lider Heydər Əliyevin adı ilə bağlıdır. Məhz 9 il bundan əvvəl ulu öndər Heydər Əliyev Baş Dövlət Vergi Müfəttişliyinin bazasında Vergilər Nazirliyinin yaradılması haqqında 2000-ci il 11 fevral tarixli fərman imzalamışdır. Xalqımızın dahi öndərinin rəhbərliyi altında vergi sisteminin müasir standartlar əsasında formalaşdırılması üçün mühüm tədbirlər həyata keçirilmiş, ulu öndərin təşəbbüsü ilə ölkəmizin vergi siyasətinin konsepsiyası müəyyən olunmuş, vergi sistemində aparılan islahatların strategiyası və əsas istiqamətləri təsbit edilmişdir.

Fazil Məmmədov bildirmişdir ki, vergi sistemində genişmiqyaslı islahatların uğurunun təmin edilməsində vahid və səmərəli idarəetmə strukturunun yaradılması mühüm rol oynamışdır. Eyni zamanda, ulu öndər Heydər Əliyevin siyasi kursunun layiqli davamçısı, Prezident İlham Əliyev də fevral ayının 11-ni Azərbaycan Respublikası vergi xidməti işçilərinin peşə bayramı günü kimi təsis etmiş, bununla da müstəqil inkişaf yolunu seçmiş cəmiyyətimizdə vergi xidməti işçilərinin yeri və roluna ölkə rəhbərliyi tərəfindən yenidən yüksək münasibət bildirilmişdir.

Azərbaycan iqtisadiyyatının inkişaf vəziyyətinə toxunan F.Məmmədov qeyd etmişdir ki, cənab İlham Əliyevin hakimiyyəti dövrü də böyük uğurlarla zəngin olmuş, ölkəmiz iqtisadi artım sürətinə görə dünyada lider dövlətə çevrilmişdir. Dövlət başçısı tərəfindən 2003-cü ildə irəli sürülmüş iqtisadiyyatın inkişaf templərinin sürətləndirilməsi strategiyasının ardıcıl surətdə həyata keçirilməsi ölkəmizin davamlı dinamik inkişafını şərtləndirmişdir. Nazir bildirmişdir ki, Azərbaycanın milli iqtisadi inkişaf modelinin reallaşdırılması tələblərinə adekvat olaraq, ölkənin vergi sistemi də bu prosesin tərkib hissəsi kimi təkmilləşdirilmişdir. Vergilər Nazirliyi yarandığı dövrdən sonra aparılan islahatların nəticəsində ölkədə təkmil vergi sistemi formalaşmış, vergi qanunvericiliyi təkmilləşdirilmiş, vergi inzibatçılığı yenidən qurulmuş, vergi ödəyicilərinə xidmətin keyfiyyəti artırılmış, vergi xidmətində müasir informasiya texnologiyalarına əsaslanan idarəetmə sistemləri yaradılmışdır.

Vergilər naziri qeyd etmişdir ki, Prezident İlham Əliyev tərəfindən 12 sentyabr 2005-ci il tarixində təsdiq edilmiş "Vergi inzibatçılığının təkmilləşdirilməsi Dövlət Proqramı" 2005-2007-ci illər ərzində uğurla həyata keçirilmiş, onun reallaşdırılması nəticəsində güclü nəzarəti həyata keçirməyə imkan verən vergi inzibatçılığının formalaşdırılmasına nail olunmuşdur. F.Məmmədov qeyd etmişdir ki, yeni inzibatçılıq mexanizmlərinin tətbiqi vergi ödəyiciləri üçün dünya təcrübəsində tətbiq olunan müasir xidmətləri təqdim etmək imkanları yaratmış, ölkədə "elektron-bəyannamə" sisteminin tətbiqinə başlanılmışdır. Bu prosesə 100 mindən artıq ödəyicinin qoşulduğu, 2008-ci ilin 850 mindən artıq bəyannamənin elektron formatda təqdim edildiyi vurğulanmışdır.

Bununla yanaşı, son iki ildə vergi ödəyicilərinə xidmət üçün kompüter terminallarının qurulmasına başlanmış, 15 belə terminal artıq vergi ödəyicilərinin istifadəsinə verilmişdir. 2008-ci il ərzində bu terminallara 20 minədək vergi ödəyicisi müraciət etmişdir.

Vergilər naziri 2008-ci il yanvarın 1-dən etibarən sahibkarlıq fəaliyyəti subyektlərinin "bir pəncərə" prinsipi üzrə qeydiyyatının aparılması prosesinə də toxunmuş, keçən il 44000-dən artıq sahibkarlıq subyektinin, o cümlədən 6471 kommersiya hüquqi şəxsin vergi orqanlarında dövlət qeydiyyatına alındığını qeyd etmişdir. Qeydə alınan kommersiya hüquqi şəxslərin sayı 2007-ci ilin müvafiq dövrünə nisbətən 30 faiz artmışdır.

Kollegiya iclasında çıxış edən digər natiqlər də ötən 9 il ərzində vergi xidmətinin keçdiyi inkişaf yollarından danışaraq bildirmişlər ki, vergi xidməti əməkdaşları dövlət tərəfindən onlara olan qayğını və diqqəti daim hiss edirlər.

Sonra peşə bayramı münasibətilə bir sıra vergi xidməti əməkdaşlarına nazirliyin fəxri fərmanları və qiymətli hədiyyələri təqdim edilmişdir.

Kollegiya iclasında tədbir iştirakçıları adından Azərbaycan Respublikasının Prezidenti İlham Əliyevə müraciət qəbul olunmuşdur.

Azərbaycan.-2009.-12 fevral.-S.4.