Azərbaycan İstanbulda keçirilən Beynəlxalq Turizm Sərgisində iştirak edir

İstanbul Bəylikdüzü Konqress və Sərgi Mərkəzində 50 ölkədən 3 minə yaxın şirkətin iştirak etdiyi 13-cü Şərqi Aralıq dənizi Beynəlxalq Turizm və Səyahət Sərgisini Türkiyənin mədəniyyət və turizm naziri Ərtoğrul Günay açmışdır. Sərgidə Azərbaycanın Mədəniyyət və Turizm Nazirliyi, turizm şirkətləri iştirak edirlər. Ölkəmizin turizm potensialını əks etdirən fotostendlər, ingilis dilində nəşr olunmuş "Böyük İpək Yolu və Azərbaycan", "Azərbaycan xalçaları", "Lahıc", "Bakının əyləncə mərkəzləri və restoranları" kitabçaları, "Azərbaycana xoş gəlmisiniz", "Qobustan" buklet və reklamlar xüsusi salonda nümayiş etdirilir. Azərbaycan Dövlət mahnı və rəqs ansamblının ifasında milli rəqslərimiz sərginin iştirakçılarının böyük marağına səbəb olmuşdur.

Açılış mərasimində çıxış edən nazir Ərtoğrul Günay və suriyalı həmkarı Sadaallah Ağa əl Kalaa on üçüncü dəfədir ki, keçirilən bu sərgiyə bölgə və dünya ölkələrinin böyük maraq göstərdiklərini, turizmin xalqlar arasında körpü rolunu oynadığını söyləmişlər.

Fevralın 15-dək davam edəcək sərgidə turizm şirkətlərinin rəhbərləri seminar və simpoziumlarda iştirak edəcəklər.

Oqtay Bayramov,

AzərTAc-ın xüsusi müxbiri

Ankara

Azərbaycan.-2009.-13 fevral.-S.3.