Ruhun şad olsun, böyük ustad!

Azərbaycan poeziyasının parlaq nümayəndələrindən biri, şeirləri ilə milyonların qəlbində dərin iz salmış xalq şairi, Dövlət mükafatları laureatı, AMEA-nın həqiqi üzvü Bəxtiyar Vahabzadə bu dünyaya əlvida dedi. Yaradıcılığı ilə bədii fikrimizi zənginləşdirən, milli-mənəvi dəyərləri, adət-ənənələrimizin qorunması və yaşanması uğrunda yorulmadan mübarizə aparan söz ustadı Azərbaycan poeziyasında vətəndaşlıq ruhunun qüvvətlənməsində müstəsna xidmət göstərmişdir. Dilimizin poetik imkanlarından məharətlə bəhrələnən Bəxtiyar Vahabzadə tədqiqatçı-alim kimi də zəngin yaradıcılığa malikdir. İstər folklorumuzun, istərsə də müasir Azərbaycan ədəbiyyatının öyrənilməsində, dilimizin saflığının, təmizliyinin qorunması uğrunda mübarizədə Bəxtiyar Vahabzadə həmişə ön sıralarda olmuşdur. Azərbaycan xalqı öz böyük oğlunu ağır, kədərlə haqq dünyasına yola saldı. Şair haqqında ən yaxşı sözü elə öz şeirləri deyir. Ruhun şad olsun, böyük ustad!

QÜRBƏT-VƏTƏN

Anamız birdirsə, Vətən də birdir,

Nə ana, nə Vətən iki olammaz.

Qürbətdə tapdığın xeyir də şərdir,

Qəlbin bu xeyirdən işıqlanammaz.

Qürbətin xeyrinə ay aldanan kəs,

Vətənin şərinə kim ortaq olsun?

Vətəni özünə qürbət sanan kəs,

Sənin anan ölüb, başın sağ olsun!

Hamı həşirdədir güzəranıyla,

Ceyran belindədir bir loxma əppək.

Ana yaralıysa, oğul qanıyla

Onun yaraları yuyulsun gərək.

Yediyim, içdiyim dərddi, qəmdisə,

Neyləmək? Bu ocaq, bu yurd mənimdir.

Göz yaşım axan yer qürbətimdisə,

Qanım axan yerlər öz Vətənimdir.

Harda olursan-ol, qəlbin fəhmi var,

Səni torpaq çəkər, səni qan çəkər.

Qürbətdə Vətənçin gözü yaşlılar

Vətənin naminə canından keçər.

Avqust, 1998

Gizlidir

Qışda bahar, baharda qış,

Seldə, suda od gizlidir.

Ağ buludda yamyaşıl ot,

Yaşıl otda süd gizlidir.

Nədir bu dərd, nədir bu qəm?

Gah bilirəm, gah bilmirəm.

Hər sevincdə bir dərd, ələm,

Hər dərddə umud gizlidir.

Vardan-yoxa bu dövrədə,

Küllü gördüm bir zərrədə.

Bir damcıda, bir qətrədə

Bu boyda vücud gizlidir.

Hər görüşdən bir intizar,

Hər sevincdən bir qəm doğar,

Hər sükutda bir haray var,

Harayda sükut gizlidir.

Hər hakimin məhkumu var,

Hər cökənin hücumu var.

Hər cütdə təkin tumu var,

Hər təkdə bir cüt gizlidir.

Gerçəyi var hər yalanın,

Gen yolu var hər dalanın.

Min bütə səcdə qılanın

Qəbində bir büt gizlidir.

27 iyun, 1993

Məndən Xəbərsiz

Ömrün fəsilləri tez başa gəldi,

Yayı bəhərlidir, qışı bəhərsiz.

Bir vaxt ayıldım ki, heydən düşmüşəm,

İllər öz atını çapdı yəhərsiz.

Amal olan yerə baş qoyan illər,

Toran gözlərimə yaş qoyan illər,

Ey yaşım üstünə yaş qoyan illər,

Hara qaçırsınız məndən xəbərsiz?

Ey ömür! Görünür artıq sahilin,

Əlin qısaldıqca uzanar dilin.

Ömurdən verdiyim yetmiş üç ilin

Zəhəri yetərli, balı yetərsiz.

Öz çiyin yüküdür hər kəsin yaşı,

Dərdi-sirdasıdır, fikri-yoldaşı.

Dönüb xislətimə qəhər, göz yaşı,

Sevinc də, kədər də ötmür qəhərsiz.

Fikirlər selində axandan bəri

Ayıra bildinmi xeyirdən şəri?

Tökülmüş ömrümün yarpaq illəri

Bağçası viranə, bağı çəpərsiz.

Könül o könüldür qoca yaşımda,

Fikirlər qaynaşır yenə başımda.

Yenə hücumdayam söz savaşında

Sözüm təpərlidir, özüm təpərsiz.

Avqust, 1998

Şəki

Azərbaycan.-2009.-15 fevral.-S.5.