"Bakı - İslam mədəniyyətinin paytaxtı-2009" Mədəniyyət ilinin açılışı paytaxtda geniş konsert proqramları və atəşfəşanlıqla qeyd edilmişdir

Bu gün dünyanın diqqəti Azərbaycana yönəlmişdir. Qədim və müasir Bakımız yeni bir ənənəyə, tarixə imza atmışdır. Şərqlə Qərbin vəhdətini özündə əks etdirən Bakı həmişə olduğu kimi, bu gün də xüsusilə bəzədilmişdir. Azərbaycanda "Bakı - İslam mədəniyyətinin paytaxtı-2009" Mədəniyyət ilinin təntənəli açılışı münasibətilə təşkil edilmiş silsilə tədbirlər paytaxtımızın sakinlərində və qonaqlarında xoş təəssürat yaratmışdır.

Fevralın 18-də "Bakı - İslam mədəniyyətinin paytaxtı-2009" Mədəniyyət ilinin təntənəli açılışı münasibətilə şəhərimizdə geniş konsert proqramları nümayiş etdirilmişdir.

Paytaxtın Nizami Gəncəvi adına Azərbaycan Ədəbiyyatı Muzeyinin və Abdulla Şaiq adına Dövlət Kukla Teatrının qarşısında təşkil edilmiş bayram şənliklərində tanınmış incəsənət ustaları geniş konsert proqramları ilə çıxış etmişlər. Yüzlərlə tamaşaçı konsertləri maraqla izləmiş və sürəklə alqışlamışdır.

Axşam saat 21-də Bakının səmasını möhtəşəm bayram atəşfəşanlığı işıqlandırmışdır.

AzərTAc

Azərbaycan.-2009.-19 fevral.-S.3.